திரையுலகைச் சார்ந்த பிரபலங்கள், குறிப்பாக பெண் ஆளுமைகள், சமூக வலைத்தளங்களில் சந்திக்கும் அநாகரிகமான விமர்சனங்களும், அதற்கு அவர்கள் அளிக்கும் எதிர்வினைகளும் சமீபகாலமாக ஒரு விவாத பொருளாக மாறியுள்ளன. நடிகை த்ரிஷா தனது எக்ஸ் தள பக்கத்தில், ஜூன் 12 அன்று திரையரங்குகளில் வெளியாகவிருக்கும் Double Occupancy திரைப்படத்தின் டிரெய்லரை பகிர்ந்து, “ஆம்பளையா பொம்பளையான்னு தெரியணும், அவ்வளவுதானே?” என்ற படத்தின் வசனத்தை குறிப்பிட்டுப் பதிவிட்டிருந்தார். இந்த திரைப்பட விளம்பர பதிவு, துரதிர்ஷ்டவசமாக சமூக வலைத்தளங்களில் சில விஷமிகளால் மிக மோசமான மற்றும் ஆபாசமான கருத்துகளுடன் சிதைக்கப்பட்டது.
த்ரிஷாவின் இந்த பதிவிற்கு அடியில் ஒரு எக்ஸ் பயனர் த்ரிஷாவை மிகவும் இழிவான வார்த்தைகளால் சாடி, “நீ ஆம்பளையா என்று சொல்” என்ற ரீதியில் வக்கிரமான கமெண்ட் ஒன்று பதிவிடப்பட்டது. பொதுவெளியில் ஒரு முன்னணி நடிகையை நோக்கி வீசப்பட்ட இந்த அநாகரிகமான வார்த்தை, சமூக வலைத்தளவாசிகளிடையே பெரும் அதிர்ச்சியையும் கொந்தளிப்பையும் ஏற்படுத்தியது. பெண்களை போகப்பொருளாகவும், இணையத்தில் எப்படி வேண்டுமானாலும் பேசலாம் என்றும் நினைக்கும் சில நபர்களின் வக்கிர புத்தியையே இந்த கமெண்ட் வெளிப்படுத்தியது.
இந்த அநாகரிகமான பதிவை கண்டு அதிர்ச்சியடைந்த நடிகையும், தயாரிப்பாளருமான குஷ்பூ சுந்தர், த்ரிஷாவிற்கு ஆதரவாக உடனே களத்தில் இறங்கினார். அந்த பயனர் கணக்கை நோக்கி, “உன்னை பெற்றவள் யார் என்று சொல்” என மிக காட்டமாக கேள்வி எழுப்பினார். சக பெண் கலைஞருக்கு நேர்ந்த இந்த அவமரியாதையை தட்டிக்கேட்க வேண்டும் என்ற நோக்கில் குஷ்பூ விடுத்த இந்த எதிர்வினை, இணையத்தில் பெரும் பரபரப்பை ஏற்படுத்தியது.
இருப்பினும், அந்த வக்கிரப் புத்தி கொண்ட நபர் இத்துடன் நிறுத்தாமல், குஷ்பூவின் கேள்விக்கு மேலும் ஆபாசமான மற்றும் கொச்சையான வார்த்தைகளால் பதிலளித்தார். இதனால் ஆத்திரமடைந்த குஷ்பூ, நாகரிகத்தின் எல்லைகளை தாண்டி பேசும் அந்த நபருக்கு அதே பாணியில் பதிலடி கொடுக்க தொடங்கினார். “உன் அம்மா அந்த வேலையை நன்றாக செய்வார்கள் போலிருக்கிறது” என்றும், “ஒரு அப்பனுக்கு பிறந்தவனாக இருந்தால், முகத்தையும் பெயரையும் காட்டி பேசு, ஏன் நீ ஒரு ஐட்டத்திற்கு பிறந்தவன் என்று நிரூபிக்கிறாய்” என்றும் மிக கடுமையான வார்த்தைகளை பயன்படுத்தி வசைபாடினார்.
ஒருபுறம் குஷ்பூவின் இந்த துணிச்சலான மிரட்டல் பதிலடிக்கு சிலர் ஆதரவு தெரிவித்தாலும், மறுபுறம் ஒரு பொறுப்பான பதவியிலும் பொதுவாழ்விலும் இருக்கும் ஒரு பெண்மணி, இவ்வளவு தரம் தாழ்ந்த வார்த்தைகளை பயன்படுத்தி பதிலளித்திருக்க வேண்டுமா என்ற விமர்சனங்களும் எழுந்துள்ளன. இணையத்தில் வக்கிரமாக பேசுபவர்களை சட்ட ரீதியாக எதிர்கொள்வதோ அல்லது புறக்கணிப்பதோ தான் சிறந்தது என்றும், நாமும் அதே நிலைக்கு இறங்கி பேசுவது ஆரோக்கியமானதல்ல என்றும் நடுநிலையாளர்கள் கருத்து தெரிவித்து வருகின்றனர்.
சமூக வலைத்தளங்கள் என்பது கருத்து சுதந்திரத்திற்கான தளம் என்ற போதிலும், பெண் பிரபலங்களை குறிவைத்து நடத்தப்படும் இதுபோன்ற ஆபாச தாக்குதல்கள் நாளுக்கு நாள் அதிகரித்து வருவது கவலைக்குரிய ஒன்றாகும். திரைக்கு பின்னால் இருக்கும் போலி கணக்குகளை தடை செய்வதும், இத்தகைய வக்கிர நபர்கள் மீது கடுமையான இணையவழி குற்றப்பிரிவின் கீழ் நடவடிக்கை எடுப்பதும் மட்டுமே இதற்கு நிரந்தர தீர்வாக அமையும். அதே நேரத்தில், பிரபலங்களும் தங்களின் நிதானத்தை இழக்காமல் சட்டப்படியான வழிகளில் இவர்களை எதிர்கொள்வதே சமூகத்தில் சரியான முன்மாதிரியை உருவாக்கும்.
https://x.com/khushsundar/status/2063632003313127694
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
