தமிழகத்தில் புதிய ஆட்சி பொறுப்பேற்றுள்ள சூழலில், அரசியல் கொண்டாட்டங்கள் என்ற பெயரில் பொதுமக்களின் உயிருக்கு அச்சுறுத்தல் ஏற்படுத்தும் வகையில் பேனர்கள் மற்றும் கொடிக்கம்பங்கள் வைக்கும் கலாச்சாரம் மீண்டும் தலைதூக்கியுள்ளது சமூக ஆர்வலர்களிடையே பெரும் கவலையை ஏற்படுத்தியுள்ளது. குறிப்பாக, சென்னை மற்றும் அதன் புறநகர் பகுதிகளில் ஆங்காங்கே சட்டவிரோதமாக தவெகவினர்களால் வைக்கப்படும் பிரம்மாண்ட பேனர்கள் குறித்து ‘அறப்போர் இயக்கம்’ தனது கடும் கண்டனத்தை பதிவு செய்துள்ளது. “மக்களுக்கு நன்றி சொல்ல வேண்டுமானால் அவர்களுக்கு நல்லது செய்யுங்கள்; இது போன்ற சமூக விரோத செயல்களைச் செய்து அவர்கள் உயிருக்கு உலை வைக்காதீர்கள்” என்று அந்த அமைப்பு ஆவேசமாக சாடியுள்ளது.
கடந்த காலங்களில் சாலை ஓரங்களிலும், நடைபாதைகளிலும் வைக்கப்பட்ட பேனர்கள் சரிந்து விழுந்து வாகன ஓட்டிகள் உயிரிழந்த சம்பவங்களும், பேனர் கம்பங்கள் மேலே செல்லும் உயர் அழுத்த மின்சார வயர்களில் பட்டு இளந்தளிர்கள் கருகிய ரணமான வடுக்களும் இன்னும் மக்கள் மனதை விட்டு நீங்கவில்லை. இத்தனை உயிரிழப்புகள் நடந்த பிறகும், அரசியல் கட்சியினருக்கு இன்னும் அறிவு வரவில்லையா என்ற கேள்வி எழுவது நியாயமானது. விளம்பர மோகத்திற்காக சட்டத்தையும், நீதிமன்ற உத்தரவுகளையும் காலில் போட்டு மிதிக்கும் போக்கு ஜனநாயகத்திற்கு அழகல்ல. சாலைகளில் செல்லும் சாமானிய மனிதனின் உயிர், ஒரு அரசியல்வாதியின் முகத்தை விட மிக முக்கியமானது என்பதை அனைவரும் உணர வேண்டும்.
அறப்போர் இயக்கத்தின் இந்தச் சமூக புகாரைத் தொடர்ந்து, தாம்பரம் மாநகர காவல்துறை விரைவாக பதிலளித்துள்ளது. இந்த புகார் தொடர்பாக சம்பந்தப்பட்ட அதிகாரிகளுக்கு தகவல் தெரிவிக்கப்பட்டு, உரிய தொடர் நடவடிக்கைகள் எடுக்கப்படும் என்று காவல்துறை உறுதி அளித்துள்ளது. டிஜிட்டல் யுகத்தில் ஒரு ட்வீட் மூலம் மக்கள் குறைகளை சுட்டிக்காட்டும்போது, அதற்கு துறைகள் காட்டும் இந்த வேகம் வரவேற்கத்தக்கது. எனினும், நடவடிக்கை என்பது வெறும் பேனர்களை அகற்றுவதோடு நின்றுவிடாமல், அவற்றை வைத்தவர்கள் மீது சட்டரீதியான கடுமையான நடவடிக்கைகளை எடுப்பதில் தான் அதன் வெற்றி அடங்கியுள்ளது.
சட்டவிரோதமாக பேனர்களை வைப்பவர்களுக்கு கடுமையான தண்டனை பெற்று தருவதே இந்த பிரச்சினைக்கு நிரந்தர தீர்வாக அமையும். அரசியல் தலைமையிடமிருந்து முறையான அனுமதி பெறாமல் இதுபோன்ற செயல்களில் ஈடுபடும் நபர்கள் மீது கட்சி ரீதியான நடவடிக்கைகளும், சட்டரீதியான அபராதங்களும் விதிக்கப்பட வேண்டும். காவல்துறை மற்றும் உள்ளாட்சி அமைப்புகள் ஒருங்கிணைந்து செயல்பட்டு, எவ்வித அரசியல் அழுத்தத்திற்கும் பணியாமல் சட்டத்தை நிலைநாட்ட வேண்டும். மக்களின் பாதுகாப்பு என்பது சமரசத்திற்கு அப்பாற்பட்டது என்பதை அரசு இயந்திரம் செயலில் காட்ட வேண்டிய தருணம் இது.
தமிழக வெற்றி கழகத்தின் தலைமை அலுவலகம் ஏற்கனவே தனது தொண்டர்களுக்கு பொதுமக்களுக்கு இடையூறு விளைவிக்கும் வகையில் பேனர்கள் வைக்கக் கூடாது என்று சற்றுமுன் அறிவுறுத்தி இருந்தபோதிலும், சில இடங்களில் நடக்கும் இதுபோன்ற மீறல்கள் அரசின் நற்பெயருக்குக் களங்கம் விளைவிக்கும் என்பதில் ஐயமில்லை. புதிய அரசியல் கலாச்சாரத்தை பேசும் இந்தச் சூழலில், பேனர் கலாச்சாரத்திற்கு முற்றுப்புள்ளி வைப்பதே உண்மையான மாற்றமாக இருக்கும். ஆட்சியாளர்களும், காவல்துறையினரும் இணைந்து இந்த “உயிர்க்கொல்லி” விளம்பரங்களுக்கு நிரந்தரத் தடை விதிப்பார்கள் என்று பொதுமக்கள் ஆவலுடன் எதிர்பார்க்கின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
