2026 தமிழக சட்டமன்ற தேர்தல் வாக்குப்பதிவு நிறைவடைந்ததை தொடர்ந்து, மாநிலத்தின் மூலைமுடுக்கெங்கும் தற்போது விவாத பொருளாக மாறியிருப்பது தேர்தலுக்கு பிந்தைய வாக்குக்கணிப்புகள் தான். வழக்கத்திற்கு மாறாக இந்த முறை ஒவ்வொரு நிறுவனமும் ஒவ்வொரு விதமான முடிவுகளை வெளியிட்டு வருவது வாக்காளர்களிடையே பெரும் குழப்பத்தை ஏற்படுத்தியுள்ளது.
குறிப்பாக, இந்தியா டுடே மற்றும் ஆக்சிஸ் மை இந்தியா போன்ற தேசிய அளவில் புகழ்பெற்ற நிறுவனங்கள் நடிகர் விஜய்யின் தமிழக வெற்றி கழகமே ஆட்சியைப் பிடிக்கும் என்று அதிரடி கிளப்பியுள்ளன. மறுபுறம், சில உள்ளூர் நிறுவனங்கள் அதிமுக தான் தனிப்பெரும்பான்மையுடன் ஆட்சி அமைக்கும் என்று ஆரூடம் கூறியுள்ளன. அதே சமயம், ஏழுக்கும் மேற்பட்ட முன்னணி நிறுவனங்கள் திமுகவே மீண்டும் அரியணையில் அமரும் என்று கணித்துள்ளன. இத்தகைய முரண்பட்ட தகவல்கள் பொதுமக்களிடையே நம்பிக்கையை விட சந்தேகத்தையே அதிகம் விதைத்துள்ளன.
“யாருக்கு ஆதரவாக வாக்களித்தோம் என்பது எங்களுக்கு தெரியும், ஆனால் இந்த நிறுவனங்கள் எதன் அடிப்படையில் ஆளாளுக்கு ஒரு கணக்கை சொல்கிறார்கள்? என்று பொதுமக்கள் சமூக வலைதளங்களில் தங்கள் குமுறல்களை வெளிப்படுத்தி வருகின்றனர். குறிப்பிட்ட கட்சிக்கு சாதகமாக கணிப்புகளை வெளியிடும் நிறுவனங்கள், அந்தந்த கட்சிகளிடம் பணம் பெற்று கொண்டு இத்தகைய முடிவுகளை சொல்கிறார்களா என்ற விமர்சனமும் வலுவாக எழுந்துள்ளது.
“என்னடா கணிச்சு வச்சிருக்கீங்க” என்று சாமானிய மனிதன் கேட்கும் கேள்விக்கு பின்னால், ஜனநாயகத்தின் புனிதமான வாக்குரிமை ஒரு வணிக பொருளாக மாற்றப்படுகிறதோ என்ற அச்சம் ஒளிந்திருக்கிறது. ஒரு சில ஆயிரம் பேரிடம் எடுக்கப்படும் மாதிரிகளை கொண்டு, கோடிக்கணக்கான மக்களின் மனநிலையை தீர்மானிப்பது அறிவியல்பூர்வமாக சரியாக இருக்குமா? என்பதே கேள்விகுறியாகவே உள்ளது.
தமிழக வெற்றி கழகம் ஆட்சி அமைக்கும் என்ற கணிப்பு ஒருபுறம் இளைஞர்களிடையே உற்சாகத்தை ஏற்படுத்தினாலும், அரசியல் முதிர்ச்சி பெற்ற வாக்காளர்கள் இதை சற்று சந்தேகத்துடனேயே பார்க்கின்றனர். ஒரு புதிய கட்சி, அரை நூற்றாண்டு கால திராவிட பாரம்பரியத்தை ஒரே தேர்தலில் வீழ்த்திவிட முடியுமா என்ற தர்க்கரீதியான கேள்வி எழுகிறது. அதேபோல், திமுக மற்றும் அதிமுக ஆகிய இரு கட்சிகளுமே தங்களுக்கு சாதகமாக வந்துள்ள கணிப்புகளை கொண்டாடி வந்தாலும் தனித்து ஆட்சி அமைப்பது கடினம் என்பதையும் இந்த கணிப்புகள் தெளிவாக கூறுகின்றன.
தேர்தல் கணிப்பு நிறுவனங்கள் தங்கள் நம்பகத்தன்மையை மெய்ப்பிக்க வேண்டிய கட்டாயத்தில் உள்ளன. கடந்த காலங்களில் பலமுறை இத்தகைய கணிப்புகள் முற்றிலும் தோல்வியடைந்துள்ளன என்பதை மக்கள் சுட்டிக்காட்டுகின்றனர். குறிப்பாக, “மௌன வாக்குகள்” எனப்படும் அமைதியான வாக்காளர்களின் மனநிலை எப்போதும் எந்த கணிப்பிலும் சிக்காது. அவர்கள் யாருக்கு வாக்களித்தார்கள் என்பது மே மாதம் வாக்கு எந்திரங்கள் திறக்கப்படும்போது மட்டுமே தெரியவரும். அதுவரை, ஒவ்வொரு நிறுவனமும் தங்கள் தரவுகளே சரியானது என்று வாதிடுவது பொதுமக்களின் பார்வையில் வெறும் விளம்பர உத்தியாகவே பார்க்கப்படுகிறது. இந்த முரண்பட்ட கணிப்புகளால் பங்குச்சந்தை முதல் பந்தய சந்தை வரை அனைத்தும் ஒருவித ஊசலாட்டத்திலேயே இருக்கின்றன.
இறுதியாக, எக்சிட் போல் முடிவுகள் என்பது ஒரு பொழுதுபோக்கு அம்சமாக மாறிவிட்டதோ என்ற ஐயம் எழுகிறது. ஊடகங்களின் டிஆர்பி ரேட்டிங்கிற்காக இத்தகைய பரபரப்பான முடிவுகள் வெளியிடப்படுகின்றனவா என்ற பொதுமக்களின் கேள்வி நியாயமானதே. ஜனநாயகத்தில் மக்களின் தீர்ப்பே மகத்தானது; அது எந்த ஒரு குளிரூட்டப்பட்ட அறையில் உட்கார்ந்து போடப்படும் கணக்குகளுக்கும் கட்டுப்பட்டது அல்ல.
மே மாதம் 4ஆம் தேதி வாக்கு எண்ணிக்கை நடைபெறும் நாளில், அனைத்து கணிப்புகளும் தவிடுபொடியாகலாம் அல்லது ஏதேனும் ஒன்று உண்மையாகலாம். ஆனால், அதுவரை நிலவும் இந்த ‘கணிப்பு யுத்தம்’ தமிழக அரசியல் வரலாற்றில் ஒரு சுவாரஸ்யமான, அதே சமயம் சர்ச்சைக்குரிய அத்தியாயமாகவே நிலைத்திருக்கும். மக்களின் உண்மையான குரல் எது என்பதை தேர்தல் ஆணையம் அறிவிக்கும் வரை பொறுத்திருப்பதே சிறந்தது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
