தமிழகத் தேர்தல் களம் 2026-ஐ நோக்கி விறுவிறுப்பாக நகர்ந்து கொண்டிருக்கும் வேளையில், சமூக வலைதளங்களில் வைரலாகி வரும் ஒரு சாமானிய மனிதனின் நேர்காணல் ஒட்டுமொத்த அரசியல் கணக்குகளையும் தலைகீழாக மாற்றியுள்ளது.
ஒரு யூடியூப் சேனலுக்கு அந்த சாமானியர் அளித்த பேட்டியில், புள்ளிவிவரங்களுடன் அவர் முன்வைத்த வாதங்கள், “கூட்டம் ஓட்டாக மாறாது” என்று விமர்சிப்பவர்களுக்கு தெளிவான பதிலடியாக அமைந்துள்ளது. உணர்ச்சிவசப்படாமல், தேர்தல் ஆணையத்தின் தரவுகளை கொண்டு அவர் விளக்கிய விதம், தமிழக வெற்றிக் கழகத்தின் மீதான மக்களின் எதிர்பார்ப்பு எவ்வளவு ஆழமாக இருக்கிறது என்பதைக் காட்டுகிறது.
அந்த நேர்காணலில் அவர் குறிப்பிட்டது போல, தமிழகத்தில் 18 முதல் 50 வயதிற்குட்பட்ட வாக்காளர்களின் எண்ணிக்கை சுமார் 3.75 கோடியாக உள்ளது. இந்த இளைய மற்றும் நடுத்தர வயது வாக்காளர்களில் 70 சதவீதத்தினர் மாற்றத்தை விரும்பி விஜய்க்கு வாக்களித்தால் கூட, அது சுமார் 82 முதல் 85 தொகுதிகளில் வெற்றியை உறுதி செய்யும்.
மாறாக, 51 வயதிற்கு மேற்பட்ட வாக்காளர்களின் எண்ணிக்கை 2.70 கோடி மட்டுமே. இதன் மூலம், இளைய தலைமுறையினரின் ஒட்டுமொத்த ஆதரவு ஒரு பக்கம் திரளும்போது, பாரம்பரிய அரசியல் கட்சிகளின் வாக்கு வங்கி மிகப்பெரிய சரிவைச் சந்திக்கும் என்பது அந்தச் சாமானியரின் கணிப்பாக உள்ளது.
2026 மார்ச் மாத நிலவரப்படி, தமிழகத்தின் மொத்த வாக்காளர் எண்ணிக்கை சுமார் 5.80 கோடியாக இருக்கும் என்று கணிக்கப்பட்டுள்ளது. மும்முனை போட்டி நிலவும் பட்சத்தில், ஒரு கட்சி வலுவாக 3 கோடி வாக்குகளை பெற்றாலே எளிதாக ஆட்சிக்கட்டிலில் அமர்ந்துவிட முடியும்.
விஜய் மக்களுக்குச் சேவை செய்ய வேண்டும் என்கிற எண்ணத்துடன் வந்துள்ளார், அவருக்கு ஒருமுறை வாய்ப்பு கொடுத்துப் பார்ப்போம்” என்கிற அந்த பொதுமக்களின் குரல், தமிழகத்தின் மூலை முடுக்கெல்லாம் எதிரொலிப்பதையே இந்த நேர்காணல் உறுதிப்படுத்துகிறது. ஜாதி மற்றும் மத அரசியல் கணக்குகளை தாண்டி, ஒரு புதிய விடியலை மக்கள் எதிர்நோக்குகின்றனர்.
தூத்துக்குடி மாவட்டத்தின் உதாரணத்தை முன்வைத்து அவர் பேசியது மிகவும் சுவாரசியமானது. ஸ்ரீவைகுண்டம், ஓட்டப்பிடாரம், விளாத்திகுளம், கோவில்பட்டி என தென் தமிழகத்தின் அனைத்து பகுதிகளிலும் விஜய்க்கு என்று ஒரு தனித்துவமான வாக்கு வங்கி இருப்பதை அவர் சுட்டிக்காட்டினார்.
குறிப்பிட்ட சமூகங்களின் வாக்குகள் ஒரு பக்கம் இருந்தாலும், 33-க்கும் மேற்பட்ட இதர சமூகங்களின் வாக்குகளும், நடுநிலை வாக்காளர்களும் விஜய்யின் பக்கம் சாய்வது உறுதி என அவர் தெரிவித்தார். எந்த தொகுதி என்று பார்த்தாலும், சுமார் 80,000 வாக்குகளை பெறும் வேட்பாளரே வெற்றியாளராக மாறப்போகும் சூழலில், விஜய்யின் பலம் அங்கே அசைக்க முடியாததாக இருக்கும்.
இறுதியாக, கடந்த தேர்தல்களில் மற்ற கட்சிகளுக்கு வாக்களித்த விஜய் ரசிகர்கள், இந்த முறை தங்களின் தலைவருக்காகவே உறுதியாக நிற்பார்கள் என்பதை அந்த நேர்காணல் பதிவு செய்துள்ளது. சாமானிய மனிதனின் இந்த தெளிவான அரசியல் பார்வை, தமிழகத்தில் ஒரு மிகப்பெரிய ‘சைலண்ட் புரட்சி’ நடந்து கொண்டிருப்பதை உலகுக்கு உணர்த்துகிறது. இந்த வீடியோ தற்போது இணையத்தில் தீயாய் பரவி, மாற்றத்திற்கான விவாதத்தை இன்னும் தீவிரப்படுத்தியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
