தமிழக அரசியல் களத்தில் தமிழக வெற்றி கழகத்தின் வருகையும், அதன் தலைவர் விஜய்யின் அரசியல் நகர்வுகளும் பெரும் பேசுபொருளாகியுள்ள சூழலில், ஆளுங்கட்சியான திமுக அவரை எதிர்கொள்ளும் விதம் குறித்து பல்வேறு யூகங்கள் எழுந்துள்ளன. குறிப்பாக, விஜய்யையும் அவரது கட்சியையும் விமர்சித்து அவருக்கு தேவையற்ற முக்கியத்துவத்தை கொடுக்க வேண்டாம் என்றும், அவரை ஒரு வலுவான அரசியல் போட்டியாளராகக் கருதாமல் கடந்து செல்லும் போக்கை கடைப்பிடிக்குமாறும் திமுக தலைமை தனது உடன்பிறப்புகளுக்கு ரகசிய உத்தரவு பிறப்பித்துள்ளதாக தகவல் பரவி வருகிறது.
ஒரு புதிய கட்சி உருவெடுக்கும் போது அதை ஆரம்பத்திலேயே விமர்சனங்களால் சீண்டினால், அது அந்த தலைவருக்கு மக்களிடையே அனுதாபத்தையும் தேவையற்ற விளம்பரத்தையும் தேடித்தரும் என்பதை உணர்ந்தே திமுக இத்தகைய நிதானமான அணுகுமுறையை தேர்ந்தெடுத்திருப்பதாக அரசியல் நோக்கர்கள் கருதுகின்றனர்.
திமுகவை பொறுத்தவரை அதன் நீண்டகால அரசியல் வரலாறு மற்றும் கட்டமைப்பிற்கு முன்னால், இப்போதுதான் தடம் பதிக்கும் ஒரு கட்சி ஈடுகொடுக்க முடியாது என்ற பிம்பத்தை உருவாக்க அக்கட்சி விரும்புவது தெளிவாக தெரிகிறது. விஜய் திமுகவுக்கும் தவெகவுக்கும் இடையே தான் போட்டி என்று எழுப்பும் Narrativeவுக்கு இடம் கொடுத்துவிட வேண்டாம் என்றும், அவர் கேட்கும் கேள்விகளுக்கு உடனுக்குடன் பதில் அளிப்பதோ அல்லது அவர் மீது நேரடி தாக்குதல் நடத்துவதோ அவரை திமுகவுக்கு இணையான ஒரு சக்தியாக மக்களிடம் காட்டிவிடும் என்ற அச்சம் ஆளுங்கட்சிக்கு இருக்கிறது.
எனவே, விஜய்யை ஒரு திரை பிரபலமாக மட்டுமே பார்த்து, அரசியல் ரீதியாக அவரை ஒரு பொருட்டாக கருதாதது போன்ற ஒரு Narrative கட்டமைக்கப்பட்டு வருகிறது. இதன் மூலம் தவெக என்பது திமுகவுக்கு போட்டியே இல்லை என்கிற செய்தியை தொண்டர்களிடமும் பொதுமக்களிடமும் ஆழமாக பதிய வைக்க அக்கட்சி முயல்கிறது.
விஜய்யின் அரசியல் வருகை என்பது இளைஞர்கள் மற்றும் ரசிகர்களிடையே ஒரு தாக்கத்தை ஏற்படுத்தினாலும், அது திமுகவின் வாக்கு வங்கியை பெரிய அளவில் சிதைக்காது என்ற நம்பிக்கையில் அக்கட்சி தலைமை இருப்பதாக தெரிகிறது. விஜய்க்கு எதிராக காட்டமான விமர்சனங்களை முன்வைக்காமல், அமைதி காப்பதன் மூலம் அவரது அரசியல் நகர்வுகளின் வீரியத்தை குறைக்க முடியும் என்று திமுக கணக்குப் போடுகிறது.
எந்தவொரு விமர்சனமும் விஜய்க்கு ஒரு ஹீரோ பிம்பத்தை உருவாக்கிவிடும் என்பதால், அவரை பற்றிப் பேசாமல் மௌனம் காப்பதே சிறந்த உத்தி என திமுக நிர்வாகிகள் பலரும் கருதுகின்றனர். இது ஒருவகையில் விஜய்யின் அரசியல் இருப்பை அங்கீகரிக்க மறுக்கும் உளவியல் ரீதியான அரசியல் நகர்வாகவே பார்க்கப்படுகிறது.
அரசியல் களத்தில் ஒருவரை விமர்சனம் செய்யாமல் புறக்கணிப்பது என்பது அவரை அரசியல் ரீதியாக தனிமைப்படுத்துவதற்கான ஒரு வழிமுறையாகும். விஜய் முன்வைக்கும் கொள்கைகளோ அல்லது அவர் எழுப்பும் விமர்சனங்களோ விவாதத்திற்கு உள்ளாக்கப்படும்போதுதான் அவர் ஒரு முழுநேர அரசியல்வாதியாக மக்களால் பார்க்கப்படுவார். அதை தவிர்க்கவே, திமுக தலைமை தனது கட்சியினருக்கு விஜய்யின் விவகாரத்தில் அலட்சியமான போக்கை கடைப்பிடிக்க அறிவுறுத்தியுள்ளதாக சொல்லப்படுகிறது.
அதிமுக, பாஜகவை விமர்சிப்பதில் காட்டும் வேகத்தை தவெக விஷயத்தில் காட்டாமல், “அவர் ஒரு நடிகர், கட்சி தொடங்கியுள்ளார், அவ்வளவுதான்” என்ற ரீதியிலான கருத்துகளே திமுக தரப்பிலிருந்து முன்வைக்கப்படுகின்றன.
மொத்தத்தில் தமிழக வெற்றி கழகத்தை ஒரு சவாலாக ஏற்று கொள்ளாமல், அதை ஒரு சாதாரண நிகழ்வாக கடந்து செல்வதன் மூலம் விஜய்யின் அரசியல் எழுச்சியை கட்டுப்படுத்த முடியும் என திமுக நம்புகிறது. ஆனால் அது எந்த அளவுக்கு மக்களிடம் எடுபடும் என்பதை பொறுத்திருந்து தான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
