மத்திய கிழக்கு பிராந்தியத்தில் நிலவும் போர் பதற்றங்களுக்கு இடையே, ஈரான் மற்றும் பாகிஸ்தான் இடையிலான உறவில் புதிய விரிசல்கள் ஏற்பட்டுள்ளன. சமீபத்தில் ஹோமுஸ் நீரிணை வழியாக சென்ற ‘செலின்’ என்ற பாகிஸ்தானிய சரக்கு கப்பலை ஈரானின் புரட்சிகர பாதுகாப்புப் படை தடுத்து நிறுத்தியது. முறையான அனுமதி இல்லை மற்றும் நெறிமுறைகளை மீறியதாக கூறி, அந்த கப்பலை ஈரான் எச்சரித்து திருப்பி அனுப்பியுள்ளது. இது ஒரு சாதாரண கடல்சார் நடவடிக்கை என்பதை தாண்டி, பாகிஸ்தானுக்கு ஈரான் விடுத்திருக்கும் மிகத்தெளிவான அரசியல் எச்சரிக்கையாகவே பார்க்கப்படுகிறது.
இந்த சம்பவம் குறித்து காபூலில் உள்ள ஈரான் தூதரகம் மூலமாக ட்விட்டரில் ஒரு செய்தி பகிரப்பட்டது மிகவும் முக்கியமானது. பாகிஸ்தானின் தலைநகரான இஸ்லாமாபாத் தூதரகம் வழியாக இந்த செய்தியை வெளியிடாமல், ஆப்கானிஸ்தானின் காபூல் வழியாக வெளியிட்டது ஈரானின் ராஜதந்திர நகர்த்தலாகும். பாகிஸ்தானின் எல்லை பகுதிகளில் குறிப்பாக ஆப்கானிஸ்தான் பகுதியில் ஈரானின் செல்வாக்கு இருப்பதை இது உணர்த்துகிறது. “எங்கள் பக்கம் நில்லுங்கள், இல்லையெனில் கடுமையான விளைவுகளை சந்திக்க நேரிடும்” என்ற மறைமுக செய்தியை இதன் மூலம் ஈரான் பாகிஸ்தானுக்கு உரக்க சொல்லியுள்ளது.
அமெரிக்காவிற்கும் ஈரானுக்கும் இடையே ஒரு சமரச தூதராக பாகிஸ்தான் தன்னை முன்னிறுத்தி கொள்ள முயன்றாலும், ஈரான் அதன் மீது துளியும் நம்பிக்கை வைக்கவில்லை. பாகிஸ்தானின் இரட்டை வேட அரசியலை ஈரான் நன்கு அறிந்திருப்பதால், ஒரு தூதராக பாகிஸ்தானுக்கு எந்தவிதமான சிறப்பு சலுகைகளையும் வழங்க ஈரான் தயாராக இல்லை. ஈரான் மற்றும் அமெரிக்கா இடையிலான 15 அம்ச அமைதித் திட்ட பேச்சுவார்த்தைகளில் பாகிஸ்தான் ஒரு தபால்காரராக மட்டுமே பயன்படுத்தப்படுகிறது. ஈரானின் நம்பிக்கைக்குரிய நட்பு வட்டத்திற்குள் பாகிஸ்தான் இல்லை என்பதை இந்த சம்பவம் உறுதிப்படுத்தியுள்ளது.
இதே காலகட்டத்தில் இந்திய கப்பல்களின் இயக்கம் குறித்து எழுந்துள்ள செய்திகள் பாகிஸ்தானின் பலவீனத்தை இன்னும் அப்பட்டமாக்குகின்றன. இந்தியாவின் கப்பல் போக்குவரத்து துறை அமைச்சகம் வெளியிட்டுள்ள தகவலின்படி, இந்திய கப்பல்கள் ஈரானிடம் எந்தவிதமான நேரடி அனுமதியையும் கோருவதில்லை; மாறாக, முறையான ஒருங்கிணைப்பு மட்டுமே செய்யப்படுகிறது. இந்திய கப்பல்கள் அந்த பகுதியில் செல்வதற்கு ஈரான் எந்தத் தடையும் விதிக்கவில்லை என்பதோடு, இந்திய கப்பல்களுக்கு ஈரான் உதவி வருவதாகவும் தகவல்கள் தெரிவிக்கின்றன. இது ஒரு நடுநிலையான மற்றும் வலிமையான நாட்டிற்கும், பாகிஸ்தான் போன்ற ஒரு நாட்டின் தகுதிக்கும் உள்ள வேறுபாட்டைக் காட்டுகிறது.
ஈரான் தனது எல்லையில் உள்ள பலூசிஸ்தான் மற்றும் ஆப்கானிஸ்தான் விவகாரங்களில் பாகிஸ்தானை நெருக்கும் வல்லமை கொண்டது. பாகிஸ்தானின் கப்பலை தடுத்து நிறுத்தியதன் மூலம், தனது எல்லை பாதுகாப்பு மற்றும் கடல்சார் உரிமைகளில் தான் சமரசம் செய்துகொள்ள போவதில்லை என்பதை ஈரான் காட்டியுள்ளது. அதே நேரத்தில், சவுதி அரேபியா போன்ற நாடுகளுக்கும் ஈரான் ஒரு செய்தியை அனுப்பியுள்ளது. அமெரிக்காவின் ஆதரவு பெற்ற நாடுகளோ அல்லது அவற்றின் பிரதிநிதிகளோ ஈரானின் ஆதிக்க பகுதியில் தடையின்றி உலவ முடியாது என்பதை ஈரான் இதன் மூலம் நிரூபித்துள்ளது.
இறுதியாக, பாகிஸ்தான் தற்போது ஒரு நிதி நெருக்கடியிலும், சர்வதேச அழுத்தத்திலும் சிக்கியுள்ளது. இத்தகைய சூழலில் ஈரானின் இத்தகைய நடவடிக்கைகள் பாகிஸ்தானின் கடல்சார் காப்பீட்டு பிரீமியங்களை உயர்த்தும் அபாயம் உள்ளது, இது அதன் பொருளாதாரத்தை மேலும் பாதிக்கும். அமெரிக்காவால் பயன்படுத்தப்பட்டு, ஈரானால் சோதிக்கப்பட்டு, இறுதியில் ஒரு தோல்வியடைந்த தூதராக பாகிஸ்தான் தனிமைப்படுத்தப்படும் சூழலே உருவாகியுள்ளது. ஈரானின் இந்த எச்சரிக்கையை பாகிஸ்தான் சரியான முறையில் புரிந்துகொண்டு தனது வெளியுறவு கொள்கையை மாற்றிக்கொள்ளத் தவறினால், வரும் காலங்களில் இன்னும் பலத்த அடிகளை சந்திக்க நேரிடும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
