தமிழக அரசியல் களம் 2026 சட்டமன்ற தேர்தலை நோக்கி ஒரு பெரும் மாற்றத்தை சந்தித்து வருகிறது. இதுவரை திராவிட கட்சிகளுக்கு மாற்றாக கருதப்பட்ட நாம் தமிழர் கட்சியின் ஒருங்கிணைப்பாளர் சீமான், பாஜகவின் மாநிலத் தலைவர் அண்ணாமலை மற்றும் விசிக தலைவர் திருமாவளவன் ஆகியோரின் வாக்கு வங்கிகள், தற்போது விஜய்யின் தமிழக வெற்றி கழகத்தை நோக்கி நகர தொடங்கியுள்ளன. இது வெறும் யூகமல்ல, களத்தில் நிலவும் இளைஞர்களின் மனமாற்றத்தை பிரதிபலிக்கும் ஒரு முக்கிய அரசியல் நகர்வாகும். சீமானின் தீவிர தமிழ் தேசியம் மற்றும் அண்ணாமலையின் ஊழல் எதிர்ப்பு அரசியல் ஆகியவற்றால் ஈர்க்கப்பட்ட இளைஞர்கள், இப்போது விஜய்யிடம் ஒரு புதிய நம்பிக்கையை காண்பதே இதற்கு முக்கிய காரணமாகும்.
விஜய்யின் அரசியல் வருகை என்பது வெறும் திரைத்துறை கவர்ச்சியை மட்டும் அடிப்படையாக கொண்டது அல்ல; அது ஒரு சமூக மாற்றத்திற்கான அடித்தளமாக பார்க்கப்படுகிறது. குறிப்பாக, விடுதலை சிறுத்தைகள் கட்சியின் வாக்கு வங்கியில் ஒரு பகுதி, குறிப்பாக இளைஞர் மற்றும் தலித் இளைஞர்கள் விஜய்யின் பக்கம் சாய்வது விசிக தலைமைக்கு ஒரு பெரிய சவாலாக மாறியுள்ளது. அதேபோல், சிறுபான்மையின மக்களும் இதுவரை திமுகவை மட்டுமே தங்களின் பாதுகாவலராக கருதி வந்த நிலையில், விஜய்யின் மதச்சார்பற்ற நிலைப்பாடு மற்றும் சமூக நீதி குறித்த அவரது தெளிவான பேச்சுகள் அவர்களைக் கவர தொடங்கியுள்ளன. இது தமிழகத்தின் பாரம்பரிய வாக்கு வங்கியில் ஒரு மிகப்பெரிய விரிசலை ஏற்படுத்தியுள்ளது.
பெண்கள் மற்றும் முதல்முறை வாக்காளர்களின் ஆதரவு என்பது எந்தவொரு தேர்தலிலும் வெற்றியை தீர்மானிக்கும் ஒரு துருப்பு சீட்டாகும். விஜய் தனது படங்களில் குடும்ப உறவுகளுக்கும், பெண்களின் முன்னேற்றத்திற்கும் கொடுத்து வந்த முக்கியத்துவம், நிஜ வாழ்க்கையில் அவருக்கு ஒரு ‘அண்ணன்’ அல்லது ‘மகன்’ என்ற பிம்பத்தை ஏற்படுத்தியுள்ளது. இந்த பாச பிணைப்பு, தேர்தல் களத்தில் வாக்குகளாக மாறும் பட்சத்தில், அது மற்ற கட்சிகளுக்கு பெரும் பின்னடைவைத் தரும். இளைஞர்களை பொறுத்தவரை, அவர்களுக்கு ஒரு ‘ஐகான்’ தேவைப்படுகிறது; அந்த தேவையை விஜய் மிகச்சரியாக பூர்த்தி செய்கிறார்.
விஜய் ஒரு ‘கிங் மேக்கராக’ இருந்து மற்றவர்களை ஆட்சியில் அமர்த்துவார் என்று பலரும் நினைத்து கொண்டிருக்கும் வேளையில், அவர் நேரடியாக ‘கிங்’ ஆக உருவெடுக்கும் வாய்ப்புகள் பிரகாசமாகியுள்ளன. அவர் வெறும் வாக்குகளை பிரிப்பவர் மட்டுமல்ல, சிதறி இருக்கும் வாக்குகளை ஒருங்கிணைத்து ஆட்சியை பிடிக்கும் கேம் சேஞ்சர். திமுக மற்றும் அதிமுக ஆகிய இரு பெரும் கட்சிகளும் தங்களின் கோட்டைகளை பாதுகாக்க போராடும் வேளையில், விஜய் ஒரு அமைதியான புரட்சியை அடிமட்ட அளவில் முன்னெடுத்து வருகிறார்.
சமூக வலைதளங்களில் நிலவும் விவாதங்களும், கள ஆய்வுகளும் விஜய்க்கு இருக்கும் ஆதரவு என்பது ஒரு குறிப்பிட்ட சமூகத்திற்கோ அல்லது பகுதிக்கோ மட்டானது அல்ல என்பதை உறுதிப்படுத்துகின்றன. டெல்டா மாவட்டங்கள் முதல் கொங்கு மண்டலம் வரை அனைத்து இடங்களிலும் விஜய்யின் தமிழக வெற்றி கழகத்திற்கு ஒரு சீரான ஆதரவு பெருகி வருகிறது. மற்ற கட்சிகளின் அதிருப்தி வாக்குகளும், நடுநிலை வாக்காளர்களும் விஜய்யின் பக்கம் திரும்புவது, 2026-ல் ஒரு புதிய அரசியல் அத்தியாயம் எழுதப்பட போவதை உணர்த்துகிறது. இது ஒரு ஐந்து முனை போட்டியாக இருந்தாலும், விஜய் மையப்புள்ளியாக மாறியுள்ளார்.
இறுதியாக, 2026 மே 4-ம் தேதி வெளியாகும் தேர்தல் முடிவுகள் தமிழக அரசியலில் ஒரு மிகப்பெரிய சுனாமியை ஏற்படுத்தக்கூடும். சிதறிக்கிடக்கும் மாற்றத்திற்கான வாக்குகளை ஒன்றுதிரட்டி, ஒரு தனிப்பெரும் சக்தியாக விஜய் உருவெடுத்தால், அது திராவிட அரசியலின் அரை நூற்றாண்டு கால ஆதிக்கத்திற்கு ஒரு முற்றுப்புள்ளியாக அமையலாம். மற்றவர்கள் கணிப்பது போல அவர் வெறும் ஒரு சதவீத வாக்குகளை மட்டும் பெறுபவர் அல்ல, மாறாக ஆட்சியை தீர்மானிக்கும் அல்லது ஆட்சியை கைப்பற்றும் ஒரு மாபெரும் சக்தியாக தன்னை நிலைநிறுத்தி கொண்டுள்ளார். மே 4-ல் மக்கள் தீர்ப்பு இதை உலகிற்கு உரக்க சொல்லும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
