தமிழக அரசியல் வரலாற்றில் சினிமா நட்சத்திரங்கள் அரசியலுக்கு வருவது ஒன்றும் புதிய விஷயமல்ல. ஆனால், நடிகர் விஜய் தொடங்கியுள்ள தமிழக வெற்றி கழகம் ஏற்படுத்தியுள்ள தாக்கம், இதற்கு முன் வந்த நடிகர்களின் வருகையிலிருந்து முற்றிலும் மாறுபட்டதாக பார்க்கப்படுகிறது. மறைந்த கேப்டன் விஜயகாந்த் அல்லது உலகநாயகன் கமல்ஹாசன் போன்றவர்களால் ஒரு குறிப்பிட்ட சதவீத வாக்குகளை மட்டுமே பெற முடிந்தது என்பதையும், சூப்பர் ஸ்டார் ரஜினிகாந்த் கடைசி நேரத்தில் பின்வாங்கியதையும் அரசியல் ஆய்வாளர்கள் சுட்டிக்காட்டுகின்றனர். ஆனால், விஜய்யின் அரசியல் நகர்வுகள் ஒரு திட்டமிட்ட ராணுவ கட்டமைப்பை போல மிக நிதானமாகவும், அதே சமயம் அதிரடியாகவும் அமைந்துள்ளன.
விஜயகாந்த் அல்லது கமல் போன்றவர்களுக்கு பின்னால் இருந்தது வெறும் ரசிகர் கூட்டமாக மட்டுமே பார்க்கப்பட்டது. ஆனால் விஜய்யை பொறுத்தவரை, அவர் ஒரு மிகப்பெரிய ‘இளைஞர் படையை’ தன்வசம் வைத்துள்ளார். இன்றைய காலகட்டத்தின் டிஜிட்டல் தலைமுறை மற்றும் முதல்முறை வாக்காளர்களின் ஆதரவு அவருக்கு பெருமளவில் இருப்பது மற்ற அரசியல் கட்சிகளுக்கு ஒரு பெரிய சவாலாக மாறியுள்ளது. ரஜினிகாந்த் அரசியலுக்கு வரப்போகிறார் என்று சொல்லப்பட்ட போது நிலவிய அரசியல் அழுத்தங்கள் மற்றும் மிரட்டல்கள் விஜய்யிடம் எடுபடவில்லை என்பது அவரது துணிச்சலான அறிவிப்புகள் மூலம் தெளிவாகிறது.
சமூக வலைத்தளங்களில் விஜய்யின் அரசியல் வருகை ஒரு ‘புரட்சிப் புயலாக’ வர்ணிக்கப்படுகிறது. “விஜய் என்பது வெறும் பெயர் அல்ல, அது ஒரு அடையாளம்” என்ற முழக்கம் இளைஞர்களிடையே காட்டுத்தீயாகப் பரவி வருகிறது. மற்ற நடிகர்களுக்கு இருப்பது வெறும் ரசிகர்கள் மட்டுமே, ஆனால் விஜய்க்கு இருப்பது மாற்றத்திற்காகக் காத்திருக்கும் ஒரு இளைஞர் ராணுவம் என்ற கருத்து சமூக ஊடகங்களில் ட்ரெண்டாகி வருகிறது. இந்த இளைஞர் படைதான் 2026 சட்டமன்றத் தேர்தலில் ஒரு மிகப்பெரிய அரசியல் மாற்றத்தை ஏற்படுத்தும் கருவியாக இருக்கும் என்று நம்பப்படுகிறது.
திமுக மற்றும் அதிமுக ஆகிய இரு பெரும் திராவிட கட்சிகளும் பல ஆண்டுகளாக தமிழக அரசியலை ஆதிக்கம் செலுத்தி வருகின்றன. இந்த இரு கட்சிகளுக்கும் மாற்றாக ஒரு வலுவான சக்தியை மக்கள் தேடிக்கொண்டிருக்கும் வேளையில், விஜய்யின் வருகை அந்த வெற்றிடத்தை நிரப்பும் என்று எதிர்பார்க்கப்படுகிறது. மற்ற நடிகர்களை போல வெறும் அறிக்கைகளுடன் நின்றுவிடாமல், அடிமட்ட அளவில் கிளை கழகங்களை வலுப்படுத்துவது மற்றும் உறுப்பினர் சேர்க்கையில் காட்டும் வேகம் ஆகியவை விஜய்யின் அரசியல் முதிர்ச்சியை காட்டுகின்றன.
இளைஞர்கள் கையில் அதிகாரம் கிடைத்தால் மட்டுமே ஒரு மாநிலம் முன்னேறும் என்ற கருத்தை விஜய் தனது மேடை பேச்சுகள் மூலம் விதைத்து வருகிறார். இதனால் ஈர்க்கப்பட்ட லட்சக்கணக்கான இளைஞர்கள், தங்களின் எதிர்காலத்தை தீர்மானிக்கும் சக்தியாக விஜய்யை கருதுகின்றனர். “இனிமேல் எல்லாமே அதிரடிதான்” என்று அவரது ஆதரவாளர்கள் பதிவிட்டு வருவது, வரப்போகும் தேர்தல் களம் எவ்வளவு சூடுபிடிக்க போகிறது என்பதற்கான அறிகுறியாகும். பழைய அரசியல் முறைகளை உடைத்து, ஒரு புதிய அரசியல் அத்தியாயத்தை விஜய் எழுத தொடங்கிவிட்டார் என்றே சொல்லலாம்.
மொத்தத்தில் 2026 சட்டமன்றத் தேர்தல் முடிவுகள் எத்தகைய மாற்றத்தை கொண்டுவரும் என்பது இன்னும் சில மாதங்களில் தெரிந்துவிடும். ஆனால், அதற்கு முன்னதாகவே தமிழக அரசியலின் திசையை விஜய் மாற்றியமைத்துவிட்டார் என்பது மட்டும் மறுக்க முடியாத உண்மை. ரசிகர்களை தொண்டர்களாகவும், தொண்டர்களை ஒரு பெரும் படையாக மாற்றியிருக்கும் விஜய்யின் இந்த அரசியல் பயணம், வெற்றியை நோக்கி செல்லுமா அல்லது மற்ற நடிகர்களை போல சரிவை சந்திக்குமா என்பதை மே 4-ம் தேதி மக்கள் தீர்ப்பு உறுதி செய்யும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
