அமெரிக்க அதிபர் டொனால்ட் டிரம்ப் மேற்காசிய பகுதியில் எடுத்து வரும் ராணுவ நடவடிக்கைகள் மற்றும் ஈரான் உடனான மோதல் போக்கு சர்வதேச அளவில் பெரும் விவாதத்தை ஏற்படுத்தியுள்ளது. குறிப்பாக, ஹார்மோஸ் ஜலசந்தியை ஈரானின் பிடியிலிருந்து மீட்க நட்பு நாடுகளுக்கு டிரம்ப் விடுத்த அழைப்பை ஜப்பான், பிரான்ஸ் உள்ளிட்ட முக்கிய நாடுகள் கண்டுகொள்ளாதது அமெரிக்காவிற்கு பெரும் பின்னடைவாக கருதப்படுகிறது. ஈரானுக்கும் இஸ்ரேலுக்கும் இடையிலான இந்த மோதல் என்பது வெறும் நிலப்பரப்பு சார்ந்தது மட்டுமல்ல, இது டாலரின் ஆதிக்கத்திற்கும் சீன யுவானின் வளர்ச்சிக்கும் இடையிலான ஒரு பொருளாதார போராகவும் உருவெடுத்துள்ளது. ஈரான் தனது கச்சா எண்ணெயை சீன கரன்சியான யுவானில் விற்க தொடங்கியதே, அமெரிக்கா இந்த போரை தீவிரப்படுத்த ஒரு முக்கிய காரணமாகப் பார்க்கப்படுகிறது.
அமெரிக்க ராணுவத்தின் முதுகெலும்பாக கருதப்படும் பெண்டகன் மற்றும் அமெரிக்க கடற்படை தளபதிகள் அதிபர் டிரம்பின் முடிவுகளில் அதிருப்தியில் இருப்பதாக பாதுகாப்புத்துறை நிபுணர்கள் சுட்டிக்காட்டுகின்றனர். ஈரானின் துல்லியமான ஏவுகணை தாக்குதல்கள் அமெரிக்காவின் ரேடார் மற்றும் வான்பாதுகாப்பு அமைப்புகளை நிலைதடுமாற செய்துள்ளன. ஒருபுறம் அதிநவீன ‘டாமாஹாக்’ மற்றும் ‘தாட்’ ஏவுகணைகளை அமெரிக்கா பயன்படுத்தினாலும், அவற்றின் உற்பத்தி செலவு மற்றும் இருப்பு குறைந்து வருவது அந்நாட்டு ராணுவத்திற்கு பெரும் கவலையை அளிக்கிறது. ஒரு ஏவுகணையை உற்பத்தி செய்ய ஆகும் பல மில்லியன் டாலர் செலவுடன் ஒப்பிடுகையில், ஈரான் மிகக் குறைந்த செலவில் தயாரிக்கும் ‘ஷஹீத்’ ட்ரோன்கள் அமெரிக்காவிற்கு பொருளாதார ரீதியாகவும் ராணுவ ரீதியாகவும் பெரும் சவாலாக மாறியுள்ளன.
ஈரானின் போர் வியூகம் மிகவும் தெளிவானது; தங்களுக்கு பாதிப்பு ஏற்படும்போது எதிராளியையும் சேர்த்தே மூழ்கடிக்கும் ‘தற்கொலைப்படை’ போன்றதொரு அணுகுமுறையை அவர்கள் கையாண்டு வருகின்றனர். ஹார்மோஸ் ஜலசந்தி வழியாக வரும் கச்சா எண்ணெய் போக்குவரத்து முடக்கப்பட்டுள்ளதால், உலக நாடுகளுக்கு வர வேண்டிய எரிவாயு மற்றும் எண்ணெய் விநியோகத்தில் 30 சதவீதத்திற்கும் அதிகமான தட்டுப்பாடு ஏற்பட்டுள்ளது. இது அமெரிக்காவை விட ஆசிய மற்றும் ஐரோப்பிய நாடுகளையே அதிகம் பாதிக்கிறது.
மறுபுறம், நேட்டோ அமைப்பில் உள்ள நாடுகளும் டிரம்பின் தன்னிச்சையான முடிவுகளால் கடும் கோபத்தில் உள்ளன. உக்ரைன் போரினால் ஏற்கனவே பொருளாதார சிக்கலில் இருக்கும் ஐரோப்பிய நாடுகள், மற்றொரு பெரும் போரில் அமெரிக்காவிற்கு துணை நிற்க விரும்பவில்லை. பிரிட்டன், பிரான்ஸ் மற்றும் சுவிட்சர்லாந்து போன்ற நாடுகள் இந்த விவகாரத்தில் நடுநிலை வகிக்கவே முன்னுரிமை அளிக்கின்றன. துருக்கியில் உள்ள நேட்டோ தளங்கள் மீது ஈரான் நடத்திய தாக்குதல்கள், இந்தப் போர் ஒரு பிராந்திய மோதலாக இல்லாமல் உலகளாவிய போராக மாறும் அபாயத்தை உணர்த்துகின்றன. அமெரிக்கா தனது ராணுவ தளவாடங்களை மீண்டும் நிரப்ப சவூதி, குவைத் போன்ற நாடுகளை நம்பியிருந்தாலும், அந்த நாடுகளின் பாதுகாப்பும் தற்போது கேள்விக்குறியாகியுள்ளது.
இந்த போரை முடிவுக்குக் கொண்டு வரக்கூடிய வல்லமை தற்போது இந்தியாவிடம் மட்டுமே இருப்பதாக பாதுகாப்பு வல்லுநர்கள் கருதுகின்றனர். சீனா அல்லது ரஷ்யாவை விட, இஸ்ரேலுடன் மிக நெருக்கமான உறவை கொண்டுள்ள ஒரே நாடு இந்தியா தான். உக்ரைன் போரை முடிவுக்கு கொண்டு வர இந்தியா எடுத்த முயற்சிகளை போலவே, மேற்காசியாவிலும் அமைதியை நிலைநாட்ட இந்தியா ஒரு தூதுவராக செயல்பட வேண்டும் என்ற எதிர்பார்ப்பு எழுந்துள்ளது. பிரிக்ஸ் அமைப்பிற்குள் இந்த போர் ஒரு பிளவை ஏற்படுத்தாமல் தடுக்கவும், உலக பொருளாதாரத்தை பாதுகாக்கவும் இந்தியா இந்த விவகாரத்தில் நேரடியாக தலையிட வேண்டிய நிர்ப்பந்தம் ஏற்பட்டுள்ளது.
இறுதியாக, அமெரிக்காவின் உள்நாட்டு அரசியலிலும் டிரம்பிற்கு பெரும் நெருக்கடி உருவாகியுள்ளது. அவரது வயது மற்றும் சிந்தனை திறன் குறித்து எழுப்பப்படும் விமர்சனங்கள் ஒருபுறம் இருக்க, பெண்டகன் தளபதிகளுக்கும் டிரம்பிற்கும் இடையிலான விரிசல் ராணுவப்புரட்சி ஏற்படுமோ என்ற அச்சத்தைக்கூட சில வட்டாரங்களில் ஏற்படுத்தியுள்ளது. ஈரானின் ‘செஜில்’ போன்ற அதிவேக ஏவுகணைகள் அமெரிக்காவின் முக்கிய தளங்களை துல்லியமாக தாக்கி வருவது அமெரிக்காவின் உலகளாவிய ஆதிக்கத்தை சந்தேகத்திற்கு உள்ளாக்கியுள்ளது. போரை தொடங்குவது எளிது, ஆனால் அதை முடிப்பது மிக கடினம் என்பதை டிரம்ப் தற்போது உணர தொடங்கியுள்ளார். அமைதி பேச்சுவார்த்தை ஒன்றே இந்த பேரழிவை தடுப்பதற்கான ஒரே வழியாக தெரிகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
