அமெரிக்கா மற்றும் ஈரான் இடையிலான மோதல் உச்சகட்டத்தை எட்டியுள்ள இந்த சூழலில், இந்தியா தனது தேசிய நலன்களை பாதுகாப்பதற்காக ஈரானுடன் ஒரு ரகசியமான மற்றும் மிக முக்கியமான இராஜதந்திர பேச்சுவார்த்தையில் ஈடுபட்டு வருவதாக தெரிகிறது. இந்தியாவின் மிக முக்கியமான தேவையாக இருப்பது பாரசீக வளைகுடாவில் உள்ள ஹார்முஸ் ஜலசந்தி வழியாக தடையற்ற கடல்வழி போக்குவரத்து தொடர்வதாகும். உலகளாவிய எரிசக்தி தேவையில் பெரும் பகுதி இந்த வழியாகவே கடந்து செல்வதால், ஈரான் இங்கு மேற்கொள்ளும் தற்காலிக தாக்குதல்கள் இந்திய கப்பல்களின் பாதுகாப்பை கேள்விக்குறியாக்கியுள்ளன. இதை கருத்தில் கொண்டு, இந்திய பிரதமர் நரேந்திர மோடி மற்றும் வெளியுறவுத் துறை அமைச்சர் ஜெய்சங்கர் ஆகியோர் ஈரான் தலைமையுடன் பலமுறை தொலைபேசி வாயிலாக பேசி வருகின்றனர். இந்த பேச்சுவார்த்தைகளின் நோக்கம் இந்தியாவுக்கான பிரத்யேக கடல்வழி பாதுகாப்பை உறுதி செய்வதாகும்.
இந்த இராஜதந்திர நகர்வின் ஒரு முக்கிய அங்கமாக, இந்தியாவில் உள்ள கொச்சி துறைமுகத்தில் நிறுத்தி வைக்கப்பட்டுள்ள ஈரான் கடற்படைக்கு சொந்தமான ‘ஐஆர்ஐஎஸ் லவான்’ கப்பலின் மாலுமிகளை திருப்பி அனுப்ப இந்தியா முடிவு செய்துள்ளது. இது ஈரானுக்கு விடுக்கப்படும் ஒரு நேர்மறையான சமிக்ஞையாக பார்க்கப்படுகிறது. இதன் மூலம், அமெரிக்காவின் போரில் இந்தியாவுக்கு விருப்பமில்லை என்பதும், இந்தியா ஒரு நடுநிலையான கடல்வழி வல்லரசாகவே செயல்பட விரும்புகிறது என்பதும் ஈரானுக்கும், அமெரிக்காவுக்கும் மற்றும் வளைகுடா நாடுகளுக்கும் தெளிவாக உணர்த்தப்பட்டுள்ளது. வாஷிங்டனின் அழுத்தங்களுக்கு பணியாமல், தனது சொந்த நலன்களின் அடிப்படையில் இந்தியா இந்த முடிவை எடுத்துள்ளது, சர்வதேச அரங்கில் இந்தியாவின் தனித்துவமான வெளியுறவு கொள்கையை மீண்டும் ஒருமுறை நிரூபித்துள்ளது.
ஹார்முஸ் ஜலசந்தி இந்தியாவின் எரிசக்தி பாதுகாப்பிற்கு மிகவும் அவசியமானது. இங்கிருந்துதான் இந்தியாவுக்குத் தேவையான எல்பிஜி , கச்சா எண்ணெய், உரங்கள் மற்றும் பிற ரசாயன பொருட்கள் வருகின்றன. இந்த வழித்தடம் இரண்டு வாரங்களுக்கு முடக்கப்பட்டால் கூட இந்திய பொருளாதாரம் பெரும் பாதிப்பை சந்திக்கும். எனவே, இந்திய கொடி ஏந்திய கப்பல்கள் மற்றும் இந்தியாவிற்கு சரக்குகளை ஏற்றி வரும் கப்பல்கள் மீது ஈரான் எந்த தாக்குதலையும் நடத்த கூடாது என்பதற்கான உத்தரவாதம் ஒன்றை இந்தியா ஈரானிடம் கோரியுள்ளது. மேலும், அந்த பகுதியில் ஈரான் ஏதேனும் இராணுவ நடவடிக்கைகளை திட்டமிட்டால், அது குறித்து இந்தியாவிற்கு முன்முச்சரிக்கை தகவல் வழங்கப்பட வேண்டும் என்பதும் இந்தியாவின் முக்கிய நிபந்தனையாகும்.
ஈரான் ஏன் இந்தியாவின் இந்த நிபந்தனைகளுக்கு உடன்பட வேண்டும் என்ற கேள்வி எழலாம். அதற்கு பல காரணங்கள் உள்ளன. முதலாவதாக, மேற்கு நாடுகள் ஈரானை தனிமைப்படுத்த முயற்சிக்கும் போது, இந்தியா போன்ற ஒரு நடுநிலை நாடு தங்களுக்கு துணையாக இருப்பதை ஈரான் விரும்புகிறது. போர் முடிவுக்கு வந்த பிறகு ஈரானுக்கு தேவைப்படும் மருந்து பொருட்கள் மற்றும் மனிதாபிமான உதவிகளை வழங்க இந்தியா ஒரு சிறந்த இடமாகும். மேலும், சாபஹார் துறைமுக திட்டத்தின் வெற்றி இரு நாடுகளுக்கும் பொதுவான நலன்களை கொண்டுள்ளது. சீனாவுடன் ஈரான் கொண்டுள்ள உறவை சமநிலைப்படுத்தவும், சர்வதேச அளவில் ஒரு அங்கீகாரத்தை பெறவும் மோடியுடன் பேச்சுவார்த்தை நடத்துவது ஈரானுக்கு பெரிய பலமாக அமைகிறது.
இந்த ரகசிய ஒப்பந்தம் ஒருபோதும் பொது வெளியில் அதிகாரப்பூர்வமாக அறிவிக்கப்படாது. ஏனெனில், இது போன்ற ஒரு பிரத்யேக ஒப்பந்தம் வெளிவந்தால் மற்ற நாடுகள் ஈரானுக்கு அழுத்தம் கொடுக்க வாய்ப்புள்ளது. இருப்பினும், எதிர்காலத்தில் இந்திய கப்பல்கள் எவ்வித தடையுமின்றி இந்த பகுதியில் பயணிப்பதை கொண்டு இத்தகைய ஒப்பந்தம் வெற்றிகரமாக செயல்படுவதை நாம் உணர முடியும். இந்தியா இந்த விஷயத்தில் தனது சொந்த நலன்களுக்கு மட்டுமே முக்கியத்துவம் அளிக்கிறது. ஐரோப்பிய அல்லது மேற்கத்திய கப்பல்கள் எதிர்கொள்ளும் சவால்கள் குறித்து கவலைப்படாமல், இந்தியாவின் விநியோக சங்கிலி பாதிக்கப்படாமல் இருப்பதை உறுதி செய்வதே இந்தியாவின் முதன்மையான இலக்காகும்.
அமெரிக்காவை பொறுத்தவரை, உலகளாவிய எண்ணெய் சந்தையை நிலைப்படுத்துவதற்கு இந்தியாவின் ஒத்துழைப்பு தற்போது மிகவும் அவசியமாகிறது. எனவே, இந்தியா ஈரானுடன் மேற்கொள்ளும் இத்தகைய தனிப்பட்ட பேச்சுவார்த்தைகளை அமெரிக்கா பெரிதாக எதிர்க்க வாய்ப்பில்லை. தனது ஆற்றல் தேவைகளை பூர்த்தி செய்யவும், அதே நேரத்தில் எந்த போர்ச்சூழலிலும் சிக்கிக் கொள்ளாமல் இருக்கவும் இந்தியா மேற்கொள்ளும் இந்த ரகசிய ஒப்பந்தம் மிகவும் நுணுக்கமானது. சுருக்கமாக சொன்னால், இந்தியா தனது பொருளாதார நலன்களை காப்பதற்காக ஈரானுடன் ஒரு கண்ணுக்கு தெரியாத இராஜதந்திர பாலத்தை அமைத்துள்ளது, இது வரும் காலங்களில் இந்தியாவிற்கு பெரும் நன்மைகளை தரும் என்று எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
