தமிழக அரசியல் வரலாற்றில் தேசியக் கட்சியான காங்கிரஸ், திராவிடக் கட்சிகளின் நிழலில் கடந்த இரு தசாப்தங்களாகத் தனது தனித்துவத்தை இழந்து வருவதாக அரசியல் விமர்சகர்கள் கருதுகின்றனர். 2006-ஆம் ஆண்டு முதல் திமுக கூட்டணியில் அங்கம் வகிக்கும் காங்கிரஸ் கட்சிக்கு, தேர்தல் வெற்றிகள் கிடைத்தாலும், அதிகாரப் பங்கீடு என்று வரும்போது வெறும் ‘வெளியிலிருந்து ஆதரவு’ தரும் கட்சியாகவே முடக்கப்பட்டுள்ளது. 2006-ல் திமுகவுக்குத் தனிப்பெரும்பான்மை கிடைக்காத நிலையிலும், 34 எம்.எல்.ஏ-க்களைக் கொண்டிருந்த காங்கிரஸ், அமைச்சரவையில் இடம் கோராமல் கைகொடுத்தது. அந்த ஒரு வாய்ப்பைத் தவறவிட்டதுதான், கடந்த 20 ஆண்டுகளாகக் காங்கிரஸ் தமிழகத்தில் ஒரு ‘ஜூனியர் பார்ட்னர்’ என்ற நிலைக்குத் தள்ளப்பட முதன்மைக் காரணம்.
கடந்த 20 ஆண்டுகளில் தமிழக காங்கிரஸின் வாக்கு வங்கி கணிசமாக குறைந்துள்ளதை தேர்தல் புள்ளிவிவரங்கள் சுட்டிக்காட்டுகின்றன. 2011-ல் 9.3 சதவீதமாக இருந்த வாக்கு விகிதம், 2021-ல் 4.27 சதவீதமாகச் சரிந்துள்ளது. ஒவ்வொரு தேர்தலிலும் திமுக ஒதுக்கும் தொகுதிகளின் எண்ணிக்கையும் 63, 41, 25 என தொடர்ந்து குறைந்து கொண்டே வருகிறது. ஒரு காலத்தில் தமிழகத்தை ஆண்ட பேரியக்கம், இன்று ஒரு சில தொகுதிகளுக்காக திராவிடக் கட்சிகளிடம் கையேந்தும் நிலைக்கு தள்ளப்பட்டிருப்பது அக்கட்சியின் தொண்டர்களிடையே பெரும் சலிப்பை ஏற்படுத்தியுள்ளது. இந்த 20 ஆண்டு கால பயணம் காங்கிரஸின் வளர்ச்சிக்கு எந்தவிதமான உத்வேகத்தையும் அளிக்கவில்லை என்பதே நிதர்சனம்.
தற்போதைய அரசியல் சூழலில், 2026 சட்டமன்ற தேர்தல் காங்கிரஸுக்கு ஒரு வாழ்வா சாவா போராட்டமாகும். ஏனெனில், தமிழக முதல்வர் மு.க. ஸ்டாலின் அவர்கள் “ஆட்சியில் பங்கு என்ற பேச்சுக்கே இடமில்லை” என்று மிக தெளிவாகவும் கறாராகவும் அறிவித்துவிட்டார். இவ்வளவு காலமும் விசுவாசமான கூட்டாளியாக இருந்தும், அதிகார பகிர்வு மறுக்கப்படுவது காங்கிரஸை ஒரு முட்டுச்சந்தில் நிறுத்தியுள்ளது. இந்த நிலையில், ராகுல் காந்தி மற்றும் பிரியங்கா காந்தி ஆகியோர் தமிழகத்தில் கட்சியின் எதிர்காலத்தை வளர்க்க வேண்டுமெனில், பழைய பாணியிலான அதே கூட்டணி வியூகத்தை மாற்றியமைக்க வேண்டிய கட்டாயத்தில் உள்ளனர்.
நடிகர் விஜய் தலைமையிலான ‘தமிழக வெற்றிக் கழகம்’ தற்போது தமிழக அரசியலில் ஒரு புதிய துருவமாக உருவெடுத்துள்ளது. தவெக ஏற்கனவே காங்கிரஸை தனது ‘இயற்கையான கூட்டாளி’ என்று வர்ணித்துள்ளதோடு, ஆட்சியில் பங்கு என்ற வாக்குறுதியையும் முன்வைத்துள்ளது. காங்கிரஸின் ஒரு தரப்பு நிர்வாகிகள், தவெகவுடன் கூட்டணி அமைத்தால் மட்டுமே அதிக தொகுதிகளில் போட்டியிட முடியும் என்றும், அதன் மூலம் கட்சியின் வாக்கு வங்கியை மீண்டும் 10 சதவீதத்திற்கு மேல் உயர்த்த முடியும் என்றும் நம்புகிறார்கள். ஒரு புதிய கட்சியுடன் கைகோர்ப்பது காங்கிரஸுக்கு தமிழகத்தில் ஒரு மறுமலர்ச்சியை ஏற்படுத்த வாய்ப்பாக அமையும்.
இருப்பினும், டெல்லியில் உள்ள காங்கிரஸ் தலைமை இன்னும் ஒரு குழப்பமான நிலையிலேயே இருப்பதாக தெரிகிறது. ராகுல் காந்தி அவர்களை பொறுத்தவரை, தேசிய அளவில் இந்தியா கூட்டணியின் வலுவான அங்கமாக இருக்கும் திமுகவை அவ்வளவு எளிதில் பகைத்து கொள்ள விரும்பவில்லை. ஆனால், மாநில அளவில் பாஜகவின் வளர்ச்சி வேகத்தை கட்டுப்படுத்தவும், தனது வாக்கு வங்கியை தக்கவைக்கவும் காங்கிரஸுக்கு ஒரு வலுவான தளம் தேவைப்படுகிறது. திமுகவின் நிழலிலேயே தொடர்ந்தால், இன்னும் பத்து ஆண்டுகளில் தமிழகத்தில் காங்கிரஸின் அடையாளம் முழுமையாக மறைந்துவிடும் என்ற அச்சம் தரைமட்ட தொண்டர்களிடம் மேலோங்கியுள்ளது.
இறுதியாக, 2026 தேர்தல் என்பது காங்கிரஸுக்கு தனது அதிகாரத்தை மீட்டெடுப்பதற்கான ஒரு பொன்னான வாய்ப்பு. ஆட்சியில் பங்கு, அதிக தொகுதிகள் மற்றும் தனித்துவமான அடையாளம் ஆகியவற்றை உறுதி செய்யும் ஒரு கூட்டணியை தேர்வு செய்வதே புத்திசாலித்தனமாக இருக்கும். ஒருவேளை காங்கிரஸ் தலைமை இந்த முறையும் திமுகவின் பிடிவாதத்திற்கு பணிந்து போனால், அது தமிழக அரசியலில் காங்கிரஸின் முடிவுக்கு ஆரம்பமாகக்கூட அமையலாம். ராகுலும் பிரியங்காவும் இந்த தேர்தலை ஒரு மாநில தேர்தலாக மட்டும் பார்க்காமல், தமிழகத்தில் காங்கிரஸை காப்பாற்ற வேண்டிய இறுதி போராக கருதி முடிவெடுக்க வேண்டும் என்பதே நடுநிலையாளர்களின் கருத்தாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
