இந்திய அரசியல் சதுரங்கத்தில் அமித்ஷா என்பவர் வெறும் அமைச்சர் மட்டுமல்ல, எதிரிகளின் கோட்டைகளை தகர்க்கும் ஒரு தேர்ந்த வியூகதாரி என்பதை 2026 சட்டமன்ற தேர்தல் களம் மீண்டும் நிரூபிக்க தொடங்கியுள்ளது. தெற்கே மு.க.ஸ்டாலின், கிழக்கே மம்தா பானர்ஜி, மேற்கே பினராயி விஜயன் மற்றும் தெலுங்கானாவில் ரேவந்த் ரெட்டி என வலுவான பிராந்திய தலைவர்களை குறிவைத்து அமித்ஷா தனது காய்நகர்த்தல்களை தொடங்கியுள்ளார். இந்த நான்கு தூண்களையும் ஆட்சியில் இருந்து இறக்கிவிட்டால், இந்தியா முழுவதும் பாஜக மயம் என்ற இலக்கை எளிதில் எட்டிவிடலாம் என்பதே டெல்லி தலைமையின் கணக்கு. “குறி வச்சா இரை விழனும்” என்ற ஒற்றை இலக்கோடு, ஒவ்வொரு மாநிலத்திற்கும் தனித்தனி ‘மாஸ்டர் பிளான்’களை அவர் தயார் செய்து வருகிறார்.
அமித் ஷாவின் தற்போதைய பாணி, “எதிரிக்கு எதிரி நண்பன்” என்ற பழைய தத்துவத்தை தாண்டி, “எதிரிக்கே தெரியாமல் அவன் கூட்டத்தையே உடைப்பது” என்ற நவீன மேஜிக் கணக்காக மாறியுள்ளது. தமிழகத்தில் திமுகவின் பலமான கூட்டணி கட்டமைப்பை சிதைக்க, காங்கிரஸை இரண்டாக பிரித்து ஒரு பகுதியை தன்பக்கமும், மற்றொரு பகுதியைத் தவெக பக்கமும் தள்ளும் சத்தமில்லாத வேலைகள் நடக்கின்றன. அதேபோல், கேரளாவில் எல்.டி.எஃப் மற்றும் யு.டி.எஃப் ஆகிய இரண்டு அணிகளுக்குமே மாற்று நாங்கள்தான் என்பதை நிலைநிறுத்த, உள்ளூர் கலாச்சார விழுமியங்களை பாஜக கையில் எடுத்துள்ளது. எதிரிகள் சுதாரிப்பதற்கு முன்பே அவர்களின் வாக்கு வங்கியில் விரிசலை ஏற்படுத்துவதுதான் அமித் ஷாவின் தனிச்சிறப்பு.
மேற்கு வங்கத்தில் மம்தா பானர்ஜியின் அசைக்க முடியாத பிடியை தளர்த்த, பூத் மட்டத்திலான தரவுகளை மிக துல்லியமாக அமித் ஷா கையாண்டு வருகிறார். “கங்கா பீகாரில் இருந்து வங்காளத்திற்கு பாய்கிறது” என்ற பிரதமர் மோடியின் முழக்கத்தை தொடர்ந்து, வங்காளத்தின் கிராமப்புறங்களில் பாஜக-வின் செல்வாக்கு மௌனமாக வளர்ந்து வருகிறது. தலித் மற்றும் மத சிறுபான்மையினரின் வாக்குகளை பிரிப்பதன் மூலம், மம்தாவின் வெற்றி சூத்திரத்தை முறியடிக்க அமித் ஷா வகுத்துள்ள திட்டம் 2026-ல் பெரும் மாற்றத்தை உருவாக்கும் என்று எதிர்பார்க்கப்படுகிறது. ஊழல் புகார்கள் மற்றும் அதிகார துஷ்பிரயோகங்களை முன்வைத்து மம்தாவை அரசியல் ரீதியாக தனிமைப்படுத்தும் வேலைகள் முழுவீச்சில் நடக்கின்றன.
தெலுங்கானாவில் ரேவந்த் ரெட்டியின் வளர்ச்சியை தடுக்க, பழைய பிஆர்எஸ் கட்சியின் வாக்கு வங்கியை தன்வசம் இழுக்கும் முயற்சியில் பாஜக வெற்றி பெற்று வருகிறது. “தேசிய அளவில் காங்கிரஸ், மாநில அளவில் பிராந்திய கட்சிகள்” என்ற நிலையை மாற்றி, எல்லா இடங்களிலும் பாஜகவே நேரடிப் போட்டியாளர் என்ற பிம்பத்தை அமித் ஷா உருவாக்கி வருகிறார். ரேவந்த் ரெட்டியின் ஆட்சி மீதான சிறு அதிருப்திகளை கூட பெரிய அளவில் மக்கள் மத்தியில் கொண்டு செல்வதற்கும், சமூக வலைதளங்கள் மூலம் இளைய தலைமுறையினரை ஈர்ப்பதற்கும் பாஜக ஐடி விங் தீவிரமாக பணியாற்றி வருகிறது. மத்தியில் உள்ள அதிகார பலமும், மாநிலத்தில் உள்ள தேர்தல் வியூகமும் இணையும்போது ரேவந்த் ரெட்டியின் சவால்கள் இன்னும் அதிகமாகும்.
தமிழக அரசியலை பொறுத்தவரை, அண்ணாமலையை தொடர்ந்து நயினார் நாகேந்திரன் போன்ற அனுபவம் வாய்ந்த தலைவர்களை முன்னிறுத்தி, அதிமுக-பாஜக கூட்டணியை மீண்டும் ஒரு பலமான சக்தியாக அமித் ஷா மாற்றியுள்ளார். “திமுக இல்லாத தமிழகம்” என்ற இலக்கை அடைய, ஆளுங்கட்சி மீதான ஊழல் வழக்குகள் மற்றும் போதைப்பொருள் புழக்கம் போன்ற தீவிரமான குற்றச்சாட்டுகளை பிரதமர் மோடி முதல் அமித் ஷா வரை அனைவரும் ஒரே குரலில் ஒலிக்கின்றனர். அமைச்சர்கள் மீதான சட்ட ரீதியான நடவடிக்கைகள் மற்றும் அமலாக்கத்துறையின் விசாரணைகள், தேர்தல் நேரத்தில் திமுக-விற்கு பெரும் தலைவலியாக மாறும் வகையில் திட்டமிடப்பட்டுள்ளன.
இறுதியாக, அமித் ஷா வைத்துள்ள குறி தப்புவதற்கு வாய்ப்பே இல்லை என்று பாஜக தொண்டர்கள் நம்பிக்கையுடன் உள்ளனர். மகாராஷ்டிரா மற்றும் பீகார் மாநிலங்களில் நிகழ்த்திய தேர்தல் ‘ஸ்வீப்’களை போலவே, 2026-லும் ஒரு மிகப்பெரிய வெற்றியை அறுவடை செய்ய அவர் தயாராகிவிட்டார். பிராந்திய தலைவர்களின் ஆதிக்கத்தை வீழ்த்தி, “ஒரே நாடு, ஒரே தேர்தல்” என்ற முழக்கத்திற்கு வலு சேர்க்கும் வகையில் இந்த நான்கு மாநிலங்களின் முடிவுகள் அமைய போகின்றன. அமித் ஷாவின் இந்த அரசியல் வேட்டை, இந்தியாவின் வரைபடத்தையே காவி நிறமாக மாற்றும் ஒரு வரலாற்று நகர்வாக இருக்கும் என்பதில் மாற்று கருத்து இல்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
