2026 தமிழக சட்டமன்ற தேர்தலை முன்னிட்டு திமுக கூட்டணியில் நிலவும் தொகுதி பங்கீடு குறித்த விவாதங்கள் அரசியல் களத்தில் பெரும் பரபரப்பை ஏற்படுத்தியுள்ளன. காங்கிரஸுக்கு 25, விசிக, மதிமுக மற்றும் கம்யூனிஸ்ட் கட்சிகளுக்குச் சேர்த்து 24, கமல்ஹாசனின் மக்கள் நீதி மய்யம் மற்றும் இதர சிறிய கட்சிகளுக்கான ஒதுக்கீடு என பார்த்தால், ஆளும் கட்சியான திமுக தன்னிடம் சுமார் 150 தொகுதிகளை மட்டுமே வைத்துக் கொள்ளும் சூழல் உருவாகியுள்ளது. 234 தொகுதிகள் கொண்ட சட்டப்பேரவையில் தனிப் பெரும்பான்மைக்கு 118 இடங்கள் தேவைப்படும் நிலையில், மிக குறைந்த தொகுதிகளில் போட்டியிட்டு அந்த மேஜிக் நம்பரை எட்டுவது திமுகவுக்கு ஒரு இமாலய சவாலாகவே இருக்கும்.
கூட்டணி பலமாக இருந்தால்தான் வெற்றி நிச்சயம் என்ற கணக்கில், புது வரவான பாமக, தேமுதிக போன்ற கட்சிகளையும் இணைக்க திமுக முயன்றால், இடங்களின் எண்ணிக்கை மேலும் குறையும். 150-க்கும் குறைவான இடங்களில் போட்டியிட்டு, அதில் 120-க்கும் அதிகமான இடங்களை வெல்வது என்பது 80 சதவீதத்திற்கும் மேலான வெற்றி விகிதத்தை கோருகிறது. இது ஒருபுறம் இருக்க, கூட்டணி கட்சிகள் தங்களின் பலத்தைக் காட்டி கூடுதல் இடங்களைக் கேட்பதுடன், ஆட்சி அதிகாரத்தில் பங்கையும் வலியுறுத்தத் தொடங்கியுள்ளன. இதனால் திமுக தனித்து ஆட்சி அமைக்கும் கனவு தள்ளிப் போய், ‘கூட்டணி ஆட்சி’ என்ற நிர்ப்பந்தத்திற்கு உள்ளாகும் அபாயம் இருப்பதாக அரசியல் விமர்சகர்கள் கருதுகின்றனர்.
கூட்டணி ஆட்சி என்ற கோரிக்கை திமுகவுக்கு புதியதல்ல என்றாலும், நீண்ட காலத்திற்கு பிறகு அத்தகைய சூழலை ஏற்பது கட்சியின் தலைமைக்கு தர்மசங்கடத்தை ஏற்படுத்தலாம். குறிப்பாக, விசிக போன்ற கட்சிகள் அதிகார பகிர்வை வெளிப்படையாகவே பேசி வரும் நிலையில், இட ஒதுக்கீட்டில் கறார் காட்டினால் கூட்டணி உடையும் அபாயமும் உண்டு. ஆட்சியை தக்கவைக்க வேண்டும் என்றால் கூட்டணி கட்சிகளைத் திருப்திப்படுத்த வேண்டும், அதே சமயம் அதிக இடங்களை விட்டுக் கொடுத்தால் தனித்து மெஜாரிட்டி பெற முடியாது என்ற இருதலைக் கொள்ளி எறும்பு நிலையில் திமுக தலைமை உள்ளது.
இந்தச் சிக்கலை சமாளிக்க திமுக இரண்டு முக்கிய வியூகங்களை முன்னெடுக்க வாய்ப்புள்ளது. முதலாவதாக, ‘உதயசூரியன்’ சின்னத்தில் சிறிய கட்சிகளை போட்டியிட செய்வதன் மூலம், தொழில்நுட்ப ரீதியாக திமுகவின் கணக்கில் அதிக இடங்களை காட்ட முயலலாம். இதன் மூலம், கூட்டணி கட்சிகளுக்கு தொகுதி கொடுத்த திருப்தியும் கிடைக்கும், அதே நேரத்தில் சட்டமன்றத்தில் திமுகவின் பலம் குறையாமல் பார்த்து கொள்ளவும் முடியும். ஆனால், சுயமரியாதையை பேசும் தற்கால அரசியல் கட்சிகள் இந்தச் சின்னம் மாற்றத்தை எந்த அளவுக்கு ஏற்கும் என்பது கேள்விக்குறியே.
இரண்டாவதாக, எதிர்க்கட்சிகளின் வாக்குகள் சிதறுவதை சாதகமாக்கி கொண்டு, வலுவான தொகுதிகளை மட்டும் தன்னிடம் வைத்துக்கொண்டு, இழுபறி தொகுதிகளை கூட்டணிக் கட்சிகளுக்குத் தள்ளிவிடுவது. ஒருவேளை திமுக கூட்டணி ஆட்சிக்கு சம்மதிக்க வேண்டிய சூழல் ஏற்பட்டால், அது 2029 மக்களவை தேர்தலை பாதிக்கும் என்பதால், முதல்வர் ஸ்டாலின் தலைமையிலான குழு மிகவும் நுணுக்கமான பேச்சுவார்த்தைகளில் ஈடுபட்டு வருகிறது. ஒவ்வொரு தொகுதியிலும் உள்ள சாதக பாதகங்களை ஆராய்ந்து, ‘வெற்றி வாய்ப்பு’ என்ற ஒற்றை புள்ளியில் கூட்டணிக் கட்சிகளைச் சமாதானப்படுத்தத் திட்டமிடப்பட்டுள்ளது.
இருப்பினும், 2026 தேர்தல் களம் விஜய்யின் வருகை, அதிமுகவின் வலுவான கூட்டணி முயற்சி என பலமுனை போட்டிகளை கொண்டிருப்பதால், திமுக தனது பிடியைத் தளர்த்தாமல் காய்களை நகர்த்த வேண்டியுள்ளது. ஆட்சி அதிகாரமா அல்லது கட்சியின் கௌரவமா என்ற கேள்வி எழும்போது, ஆட்சியை தக்கவைக்கவே எந்த ஒரு கட்சியும் முன்னுரிமை அளிக்கும். அந்த வகையில், திமுக தனது நீண்ட கால கூட்டணி கொள்கையை சற்று தளர்த்தி, ஒரு ‘நெகிழ்வான’ தொகுதி பங்கீட்டை அறிவிக்க கூடும். இந்த சதுரங்க ஆட்டத்தில் திமுகவின் அடுத்த கட்ட நகர்வு என்னவாக இருக்கும் என்பதைப் பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
