பிரிக்ஸ் 2026 கூட்டமைப்பின் இலச்சினையை இந்தியா அண்மையில் வெளியிட்டு, உலக நாடுகளிடையே ஒற்றுமை மற்றும் வளர்ச்சியை வலியுறுத்திய அதே வேளையில், சீனா மீண்டும் தனது ஆதிக்க போக்கை காட்டியுள்ளது. ஜம்மு காஷ்மீரின் காரகோரம் மலைத்தொடருக்கு வடக்கே அமைந்துள்ள ‘ஷக்ஸ்காம் பள்ளத்தாக்கு’ பகுதியில் சீனா சட்டவிரோதமாக சாலை அமைத்து வருவது தற்போது பெரும் சர்வதேச விவாதமாக மாறியுள்ளது.
1963-ஆம் ஆண்டு பாகிஸ்தான் தனக்கு சொந்தமில்லாத இந்தியாவின் இந்த நிலப்பரப்பை சீனாவிற்கு சட்டவிரோதமாக பரிசாக வழங்கியது. தற்போது அந்த பகுதியில் சீனா 75 கிலோமீட்டர் நீளமும் 10 மீட்டர் அகலமும் கொண்ட அனைத்து காலநிலைகளுக்கும் ஏற்ற சாலையை அமைத்து வருவது, இந்தியாவின் இறையாண்மைக்கு விடுக்கப்பட்ட நேரடி சவாலாகும்.
ஷக்ஸ்காம் பள்ளத்தாக்கு என்பது வெறும் நிலப்பரப்பு மட்டுமல்ல, அது இந்தியாவின் பாதுகாப்பு அரணான சியாச்சின் பனிச்சிகரத்திற்கு மிக அருகில் அமைந்துள்ள ஒரு கேந்திர முக்கியத்துவம் வாய்ந்த பகுதியாகும். இந்த சாலை அமைப்பதன் மூலம் சீனா தனது ராணுவ தளவாடங்களையும் வீரர்களையும் மிகக்குறுகிய காலத்தில் இந்தியாவின் எல்லை பகுதிக்கு கொண்டு வர முடியும். இந்தியாவின் வெளியுறவு துறை அமைச்சகம் இது குறித்துக் கடும் கண்டனம் தெரிவித்துள்ளதோடு, இந்தியாவின் நிலப்பரப்பில் மேற்கொள்ளப்படும் இத்தகைய மாற்றங்கள் செல்லாது என்றும், இது 1963-ஆம் ஆண்டு பாகிஸ்தான்-சீனா இடையே போடப்பட்ட சட்டவிரோத எல்லை ஒப்பந்தத்தின் தொடர்ச்சி என்றும் சாடியுள்ளது. இந்திய ராணுவம் தனது பாதுகாப்பு நலன்களை காக்க தேவையான நடவடிக்கைகளை எடுக்கும் என்றும் எச்சரித்துள்ளது.
வரலாற்று ரீதியாக பார்த்தால், 1947-48 பாகிஸ்தான் ஆக்கிரமிப்பின் போது இந்த பகுதி பாகிஸ்தானால் சட்டவிரோதமாக கைப்பற்றப்பட்டது. பின்னர் 1962 இந்திய-சீன போருக்கு பிறகு, சீனாவை திருப்திப்படுத்த பாகிஸ்தான் சுமார் 5,180 சதுர கிலோமீட்டர் பரப்பளவு கொண்ட இந்த நிலத்தை சீனாவிற்குத் தூக்கி கொடுத்தது. இந்தியா இந்த ஒப்பந்தத்தை ஒருபோதும் அங்கீகரித்ததில்லை. தற்போதைய நிலையில், சீனா-பாகிஸ்தான் பொருளாதார வழித்தடத்தின் ஒரு பகுதியாக இந்த உள்கட்டமைப்பு பணிகள் வேகமெடுத்துள்ளன. பாகிஸ்தான் ஆக்கிரமிப்பு காஷ்மீர் மற்றும் கில்கித்-பால்டிஸ்தான் வழியாக செல்லும் இத்தகைய திட்டங்கள் அனைத்தும் சர்வதேச சட்டங்களுக்கு புறம்பானவை என்பதே இந்தியாவின் உறுதியான நிலைப்பாடாகும்.
இந்த விவகாரத்தில் சீனாவின் அணுகுமுறை மிகவும் தந்திரமானது. ஒருபுறம் அமைதி பேச்சுவார்த்தை மற்றும் சர்வதேச கூட்டமைப்புகளில் இந்தியாவுடன் இணைந்திருப்பது போல காட்டிக்கொண்டாலும், மறுபுறம் ‘ஸலாமி ஸ்லைசிங்’ எனப்படும் மெல்ல மெல்ல நிலத்தை ஆக்கிரமிக்கும் உத்தியை அது கையாள்கிறது. கல்வான் பள்ளத்தாக்கு மோதலுக்கு பிறகு, எல்லையில் அமைதியை நிலைநாட்ட பல ஒப்பந்தங்கள் போடப்பட்டாலும், சீனா எதையும் மதிப்பதாக தெரியவில்லை. 1993 முதல் 2013 வரை இந்திய பிரதமர்கள் மற்றும் வெளியுறவுத் துறை அதிகாரிகள் மட்டத்தில் போடப்பட்ட ஐந்து முக்கிய ஒப்பந்தங்களை தூக்கியெறிந்துவிட்டு, சீனா தனது தன்னிச்சையான ஆக்கிரமிப்பு பணிகளை தொடர்கிறது.
சீனாவின் இந்த சாலைத் திட்டம் இந்தியாவின் சியாச்சின் மற்றும் லடாக் பகுதிகளுக்கு புதிய அச்சுறுத்தலை உருவாக்கியுள்ளது. இதுவரை சியாச்சின் பகுதியில் பாகிஸ்தானை மட்டுமே எதிர்கொண்டு வந்த இந்திய ராணுவம், இனி வடக்கே சீனாவையும் கவனிக்க வேண்டிய இரட்டை முனைப் போர் சூழலுக்கு தள்ளப்பட்டுள்ளது. இந்த சாலை வழியாக காரகோரம் கணவாயை சீனா எளிதில் அணுக முடியும் என்பதால், இந்தியாவின் நிலப்பரப்பு கண்காணிப்பு வளையத்திற்குள் வரும் அபாயம் உள்ளது. இது ராணுவ ரீதியாக இந்தியா தனது வியூகங்களை மாற்றியமைக்க வேண்டிய கட்டாயத்தை ஏற்படுத்தியுள்ளது.
முடிவாக, சீனா போன்ற ஒரு நாடு காகித ஒப்பந்தங்களுக்கு கட்டுப்படுவதில்லை, அது வலிமைக்கு மட்டுமே பணியும் என்பதை வரலாறு உணர்த்துகிறது. ஷக்ஸ்காம் பள்ளத்தாக்கில் சீனா மேற்கொண்டு வரும் கட்டுமான பணிகள், இந்தியாவின் தேசிய பாதுகாப்பிற்கு விடுக்கப்பட்ட எச்சரிக்கை மணியாகும். சர்வதேச அரங்கில் ராஜதந்திர ரீதியாக அழுத்தம் கொடுப்பதோடு மட்டுமல்லாமல், எல்லையில் ராணுவ கட்டுமானங்களை வலுப்படுத்துவது மட்டுமே இதற்கு தீர்வாக அமையும். இந்த நிலையில் இந்தியா தனது எல்லைகளை பாதுகாப்பதில் இன்னும் தீவிரமான மற்றும் தீர்க்கமான நடவடிக்கைகளை எடுக்க வேண்டிய தருணம் இதுவே.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
