தமிழக அரசியல் களம் தற்போது எதிர்பாராத திருப்பங்களையும், கூட்டணி குறித்த குழப்பங்களையும் சந்தித்து வருகிறது. குறிப்பாக, அதிமுகவிலிருந்து நீக்கப்பட்டு தனித்து செயல்படும் ஓ. பன்னீர்செல்வம் மற்றும் டிடிவி தினகரன் ஆகியோருக்கு எந்த பிரதான தமிழக கட்சியும் கதவை திறக்காத நிலையில், இவர்களின் அரசியல் எதிர்காலம் கேள்விக்குறியாகியுள்ளது. மறுபுறம், புதிதாக களமிறங்கியுள்ள நடிகர் விஜய்யின் தமிழக வெற்றிக் கழகம், இந்த இருவருடனும் கூட்டணி இல்லை என்ற முடிவில் உறுதியாக உள்ளது. இதனால், ஓபிஎஸ் மற்றும் டிடிவிக்கு தவெகவில் இடமில்லை என்பது தெளிவாகிறது.
மேலும், திராவிட கொள்கை முரண்பாடுகளாலும், ஈபிஎஸ்ஸின் பிடிவாதத்தாலும், திமுக மற்றும் அதிமுகவின் கதவுகள் இவர்களுக்கு அடைக்கப்பட்டுள்ளன. இவ்வாறாக, பிரதான தமிழகக் கட்சிகளின் கதவுகள் மூடப்பட்ட நிலையில், தங்கள் இருப்பை நிலைநாட்ட ஓபிஎஸ் மற்றும் டிடிவிக்கு எஞ்சியிருக்கும் ஒரே வாய்ப்பு, பாஜக தலைமையிலான தேசிய ஜனநாயகக் கூட்டணிதான். என்.டி.ஏ கூட்டணியில் அதிமுக இருந்தாலும், இந்த கூட்டணியில் ஓபிஎஸ், டிடிவி இணைவதில் ஈபிஎஸ்-க்கு எந்த பிரச்சனையும் இருக்காது என எதிர்பார்க்கப்படுகிறது.
தமிழகத்தில் NDA கூட்டணியை பலப்படுத்த வேண்டிய கட்டாயத்தில் உள்ள பாஜக, அதிமுகவை ஒருங்கிணைக்க எடப்பாடி பழனிசாமி மறுப்பதால், ஜெயலலிதாவின் விசுவாசிகள் மற்றும் தென் மண்டல வாக்குகளை பிரிக்கக்கூடிய ஓபிஎஸ், டிடிவி ஆகியோரை NDA கூட்டணியில் சேர்ப்பதன் மூலம் கூடுதல் சதவிகித வாக்குகள் கிடைக்கலாம் என திட்டமிடுகிறது. இதன் மூலம், திமுகவுக்கு சாதகமான சூழலை தவிர்ப்பதுடன், பாஜகவின் புண்ணியத்தில் NDA கூட்டணியில் சேர்வது, ஓபிஎஸ் மற்றும் டிடிவிக்கு அரசியல் ரீதியான ஒரு அங்கீகாரத்தையும், போட்டியிட இடங்களையும் உறுதி செய்யும்.
நடிகர் விஜய், தவெகவில் சில குறிப்பிட்ட அரசியல் தலைவர்களுக்கும், அரசியல் கட்சிகளுக்கும் மட்டுமே கதவை திறக்க திட்டமிட்டுள்ளதாக தெரிகிறது. அந்த வகையில் தவெக கூட்டணியில் பாமக இணைய வாய்ப்பில்லை என்றும், தேமுதிகவுக்கும் அதே நிலைப்பாடு தான் என்றும் கூறப்படுகிறது. எனவே பாமக, தேமுதிக தங்கள் இருப்பைத் தக்கவைக்க NDA கூட்டணிக்குள் செல்லவே வாய்ப்புகள் அதிகம் உள்ளது.
ஓபிஎஸ், டிடிவி போன்ற திமுகவின் எதிர்ப்பாளர்கள் அனைவரும் என்.டி.ஏ என்ற குடைக்கு கீழ் அணிதிரண்டால், திமுகவுக்கு மேலும் நெருக்கடி ஏற்படும். அனைத்து முக்கிய சக்திகளையும் NDA-வில் சேர்ப்பதன் மூலம், பாஜக கூட்டணி ஓரளவுக்கு வலிமை பெறலாம்.
இந்த சூழலில் தமிழக தேர்தல் திமுக கூட்டணி, அதிமுக கூட்டணி, தவெக கூட்டணி மற்றும் சீமான் கட்சி என்ற நான்கு முனை போட்டியாக மாறும். ஓபிஎஸ், டிடிவி, பாமக, தேமுதிக ஆகிய சக்திகள் NDA கூட்டணியில் இணைந்தால், அது தமிழகத்தில் என்.டி.ஏ செல்வாக்கை உயர்த்தவும், வெற்றிக்கு வழிவகுக்கும் என்றும் பாஜக மேலிடம் திட்டமிடுவதாக தகவல் வெளியாகியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
