பாகிஸ்தானில் சமீபத்தில் நிறைவேற்றப்பட்ட அரசியலமைப்புத் திருத்தங்கள், சட்டத்தின் ஆட்சி மற்றும் மனித உரிமைகளின் பாதுகாப்பு குறித்த கவலைகளை எழுப்புவதாக ஐக்கிய நாடுகளின் மனித உரிமைகள் உயர் ஆணையர் வோல்கர் டர்க் எச்சரித்துள்ளார். இந்த திருத்தங்கள் நீதித்துறையின் சுதந்திரத்தையும் இராணுவத்தின் பொறுப்புடைமையையும் பலவீனப்படுத்துகின்றன என்று ஜெனிவாவில் இருந்து வெளியிட்ட அறிக்கையில் அவர் தெரிவித்துள்ளார். மேலும், சட்ட சமூகம் மற்றும் சிவில் சமூகத்துடன் பரந்த ஆலோசனை இன்றி இந்த திருத்தங்கள் ஏற்றுக்கொள்ளப்பட்டதாகவும் அவர் சுட்டிக்காட்டினார்.
இந்த திருத்தங்கள் சட்டத்தின் ஆட்சியை நிலைநிறுத்தும் அதிகாரப் பிரிவினை கோட்பாடுகளுக்கு எதிரானது என்று டர்க் கூறினார். அரசாங்கத்தின் நிர்வாகமோ அல்லது சட்டமன்றமோ நீதித் துறையை கட்டுப்படுத்தவோ அல்லது வழிநடத்தவோ கூடாது என்றும், நீதித்துறை எந்தவொரு அரசியல் செல்வாக்கிலிருந்தும் பாதுகாக்கப்பட வேண்டும் என்றும் ஐ.நா. மனித உரிமைகள் தலைவர் வலியுறுத்தினார்.
நவம்பர் 13 அன்று ஏற்றுக்கொள்ளப்பட்ட மாற்றங்களின்படி, அரசியலமைப்பு வழக்குகளை விசாரிக்கும் அதிகாரங்கள் ஒரு புதிய கூட்டாட்சி அரசியலமைப்பு நீதிமன்றத்திற்கு வழங்கப்பட்டுள்ளன. இதன் மூலம், உச்ச நீதிமன்றத்தின் அதிகாரம் மாற்றப்பட்டு, அது இனி சிவில் மற்றும் கிரிமினல் வழக்குகளை மட்டுமே விசாரிக்கும் நிலை ஏற்பட்டுள்ளது. நீதிபதிகளை நியமித்தல், பதவி உயர்த்துதல் போன்ற அமைப்புகள் மாற்றப்பட்ட விதம், பாகிஸ்தானின் நீதித்துறையின் கட்டமைப்பு சுதந்திரத்தை பலவீனப்படுத்துவது குறித்த தீவிரமான கவலைகளை எழுப்புகிறது என்றும் டர்க் குறிப்பிட்டார்.
இந்த மாற்றங்கள் அனைத்தும் இணைந்து, நீதித்துறையை அரசியல் தலையீடு மற்றும் நிர்வாக கட்டுப்பாட்டிற்கு அடிபணிய வைக்கும் அபாயத்தை ஏற்படுத்துகின்றன என்று டர்க் எச்சரித்தார். நீதிபதிகள் சுதந்திரமாக இல்லையென்றால், அரசியல் அழுத்தத்தின் முன் சட்டத்தை சமமாக பயன்படுத்துவதில் அவர்கள் போராடுவார்கள்” என்றும் அவர் கூறினார். மேலும், அதிபர், ஃபீல்ட் மார்ஷல் உள்ளிட்ட சில பொது அலுவலக பதவிகளுக்கு குற்றவியல் வழக்குகளிலிருந்து ஆயுட்கால விலக்கு அளிக்கப்பட்டிருப்பதையும் அவர் கடுமையாக விமர்சித்தார். இது பொறுப்புடைமையை பலவீனப்படுத்துகிறது என்றும், ஆயுதப் படைகளின் ஜனநாயக கட்டுப்பாட்டை பாதிக்கின்றது என்றும் அவர் தெரிவித்தார்.
பாகிஸ்தானின் மனித உரிமைகள் ஆணையமும் இந்த அரசியலமைப்புத் திருத்தம் குறித்து இதேபோன்ற கவலைகளை எழுப்பியுள்ளது. 27வது அரசியலமைப்புத் திருத்தம், நிர்வாக கட்டுப்பாட்டை விரிவுபடுத்துவதன் மூலம் நீதித்துறை சுதந்திரத்தை அச்சுறுத்துகிறது என்றும், இது அதிகார பிரிவினைக் கோட்பாடுகளை கடுமையாகப் பலவீனப்படுத்துகிறது என்றும் ஆணையம் வலியுறுத்தியுள்ளது. ஆயுட்கால விலக்கு சலுகை அதிகாரத்தை ஒரு சிறிய குழுவிடம் குவித்து, நாடாளுமன்றத்தின் மேலாதிக்கத்தை பலவீனப்படுத்துவதாகவும் HRCP கூறியுள்ளது.
இருப்பினும், அரசியலமைப்பை சட்டப்படி திருத்தும் உரிமை நாடாளுமன்றத்திற்கு உள்ளது என்று பாகிஸ்தான் அரசு கூறியுள்ளது. உச்ச நீதிமன்றத்தில் நிலுவையில் உள்ள வழக்குகளின் சுமையை குறைக்கும் என்றும், மக்களுக்கு விரைவான நீதியைப் பிரித்தளிக்க FCC உதவும் என்றும் கூறி, இந்த மாற்றங்களை அரசு நியாயப்படுத்தியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
