முன்னாள் அமைச்சர் கே.ஏ. செங்கோட்டையன் அதிமுகவில் இருந்து விலகி, நடிகர் விஜய்யின் தமிழக வெற்றி கழகத்தில் இணைந்த நிகழ்வு, தமிழக அரசியலில் ஒரு பெரும் திருப்புமுனையாக மாறியுள்ளது. செங்கோட்டையன் விலகலுக்கு பிறகு, அதிமுக மற்றும் திமுக ஆகிய இரு பெரிய திராவிட கட்சிகளிலும் உள்ள அதிருப்தியாளர்கள் தற்போது த.வெ.க.வை நோக்கித் தங்கள் கவனத்தை திருப்பியுள்ளனர்.
அதிமுக மற்றும் திமுக ஆகிய இரு பிரதான கட்சிகளிலும் நீண்ட காலமாக அதிருப்தியில் இருக்கும் முன்னாள் அமைச்சர்கள், இந்நாள் சட்டமன்ற உறுப்பினர்கள் மற்றும் முக்கிய நிர்வாகிகள் பலர், கே.ஏ. செங்கோட்டையனை தொலைபேசியில் தொடர்பு கொண்டு பேசி வருவதாக தகவல்கள் வெளியாகியுள்ளன.
அவர்கள், “அண்ணே, த.வெ.க.வுக்கு நாங்களும் வரலாமா?” என்று செங்கோட்டையனிடம் நேரடியாக கேட்டு வருவதாக கூறப்படுகிறது. அனுபவம் வாய்ந்த செங்கோட்டையனை, த.வெ.க.வில் இணைவதற்கான பாலமாக அதிருப்தியாளர்கள் பயன்படுத்தி வருவது அரசியல் களத்தில் ஒரு புதிய சலசலப்பை ஏற்படுத்தியுள்ளது.
தற்போதைய சூழலில், விஜய்யின் நிலைப்பாடே இதில் மிக முக்கியத்துவம் பெறுகிறது. விஜய்யின் பச்சைக்கொடி அல்லது ஒரு சிறிய ‘உம்’ என்ற சம்மதம் போதும் என்ற நிலை உருவாகியுள்ளது. விஜய் தனது கட்சியில் முக்கிய பதவிகளை வழங்குவதாக உறுதி அளித்தால் அல்லது அவர்களை சேர்ப்பதற்கு சம்மதம் தெரிவித்தால், அதிமுக மற்றும் திமுகவிலிருந்து ஏராளமான அரசியல் பிரபலங்கள் த.வெ.க.வில் இணைய தயாராக இருப்பதாக தெரிகிறது.
அதிமுகவில் எடப்பாடி பழனிசாமியின் தலைமையின் மீதும், திமுகவில் வாரிசு அரசியல் மீதும் அதிருப்தியில் உள்ளவர்கள், ஒரு மாற்று அரசியல் சக்தி உருவாகியுள்ள சூழலை பயன்படுத்திக்கொள்ள துடிக்கின்றனர். இந்த நகர்வுகள் காரணமாக, அதிமுக மற்றும் திமுக ஆகிய இரண்டு திராவிட கட்சிகளின் தலைமைக்கும் பெரும் பரபரப்பு ஏற்பட்டுள்ளது. செங்கோட்டையன் போன்ற மூத்த தலைவர்களின் விலகல், தங்கள் கட்சியின் அஸ்திவாரத்தையே ஆட்டங்காண செய்யும் என்று அவர்கள் அஞ்சுகின்றனர்.
த.வெ.க.வின் பலம் எதிர்பாராத விதமாக அதிகரித்து வருவதால், இரு திராவிட கட்சிகளும் தங்கள் அதிருப்தியாளர்களை தக்க வைத்துக் கொள்ள பெரும் போராட்டத்தில் ஈடுபட்டுள்ளன. அதிமுக தரப்பில் ஈபிஎஸ் ஆதரவாளர்கள் தீவிர ஆலோசனையில் இருக்க, திமுக தரப்பிலும் அதிருப்தியாளர்களை சமாதானப்படுத்த மூத்த நிர்வாகிகள் மூலம் சமரச பேச்சுவார்த்தைகள் நடத்தப்பட்டு வருவதாகத் தகவல்கள் தெரிவிக்கின்றன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
