தமிழக அரசியல் களம் 2026 சட்டமன்ற தேர்தலை நோக்கி நகரும் நிலையில், தி.மு.க., அ.தி.மு.க., பா.ஜ.க. மற்றும் விஜய் தலைமையிலான தமிழக வெற்றி கழகம் ஆகியவற்றின் தலைமையில் நான்கு முனைப் போட்டி உருவாகும் சூழல் ஏற்பட்டுள்ளது.
இந்த சூழ்நிலையில், ஆளும் கட்சிக்கு எதிரான வாக்குகள் யாருக்கு செல்லும், எந்த கட்சி ஆட்சியை பிடிக்கும் என்பதில் தற்போது பலத்த விவாதங்கள் எழுந்துள்ளன. பாரம்பரியமாக தி.மு.க.வும் அ.தி.மு.க.வும் மாறி மாறி ஆட்சி செய்த தமிழகத்தில், இப்போது த.வெ.க.வின் எழுச்சி, தேர்தல் முடிவுகளை முற்றிலும் மாற்றியமைக்கக் கூடிய வாய்ப்பை வழங்கியுள்ளதுடன், சமீபத்திய ரகசிய சர்வே முடிவுகள், இந்த சூழ்நிலையில் த.வெ.க. வலுவான இடத்தை பிடிக்கும் அதிர்ச்சி தகவலை வெளியிட்டுள்ளன. நாம் தமிழர் கட்சியின் சீமான் வழக்கம் போல் கொள்கை ரீதியிலான பிரச்சாரத்தை தொடர்ந்தாலும், இந்த நான்கு முனைப் போட்டியில் அவர் மீண்டும் கடைசி இடத்தையே பிடிப்பார் என்று கருதப்படுகிறது.
2026 தேர்தலில் ஆளும் தி.மு.க.வுக்கு எதிராக விழும் அதிருப்தி வாக்குகள், அ.தி.மு.க.வுக்கா அல்லது புதிதாக களமிறங்கும் த.வெ.க.வுக்கா என்பதில் தான் வெற்றி தோல்வி தீர்மானிக்கப்படும். அ.தி.மு.க. உட்கட்சி பிளவுகளால் குழப்பமடைந்துள்ள நிலையில், தி.மு.க.வுக்கு எதிரான மனநிலையில் இருக்கும் மக்கள், மீண்டும் குழப்பமான ஒரு தலைமைக்கு வாக்களிக்க தயங்கலாம். ஆனால், தி.மு.க.வின் மீதான அதிருப்தி வாக்குகளை ‘மாற்றம் வேண்டும்’ என்ற மனநிலையில் உள்ள வாக்காளர்கள், குறிப்பாக இளைஞர்கள் மற்றும் பெண்கள், புதிய மற்றும் கவர்ச்சிகரமான மாற்று சக்தியாக கருதப்படும் த.வெ.க.வுக்கு அளிக்க அதிக வாய்ப்புள்ளது.
தமிழகத்தில் பொதுவாகவே, வீணான வாக்குகளை தவிர்த்து, ஜெயிக்கிற கட்சிக்கு ஓட்டுப் போடவே மக்கள் விரும்புவார்கள். த.வெ.க. வலுவான கூட்டணி அமைத்து வெற்றிக்கான நம்பிக்கையை உருவாக்கினால், நடுநிலை வாக்குகளும் ஆளுங்கட்சிக்கு எதிரான வாக்குகளும் அதன் பக்கம் திரளும். அ.தி.மு.க.வின் பலம் பெரும்பாலும் கிராமப்புற மற்றும் விசுவாசமான பாரம்பரிய வாக்குகளை சார்ந்துள்ளது. ஆனால், நகரப்புற மற்றும் ‘மாற்றம் வேண்டும்’ மனநிலையில் இருக்கும் வாக்காளர்களை த.வெ.க. கைப்பற்றினால், அதுவே ஆட்சியை நிர்ணயிக்கும் சக்தியாக மாறும்.
தேர்தல் முடிவுகளில் முக்கிய பங்கு வகிக்கும் இளைஞர்கள் மற்றும் முதல் முறை வாக்காளர்களுக்கு அ.தி.மு.க.வின் பாரம்பரிய ஈ.பி.எஸ். தலைமை அவ்வளவாக ஈர்ப்பு ஏற்படுத்தவில்லை. விஜய்யின் கவர்ச்சியும், சமூக வலைதளங்களின் வீச்சும், விஜய்யின் மாற்று அரசியலுக்கு ஆதரவாக இவர்களை திரட்ட அதிக வாய்ப்புள்ளது. அதேபோல், சமூக நலத்திட்டங்களுக்காக பாரம்பரியமாக திராவிட கட்சிகளுக்கு வாக்களிக்கும் பெண்கள் மத்தியில், விஜய்யின் சமூக நலத் திட்டங்கள், கல்வி மற்றும் சுகாதார சீர்திருத்தங்கள் குறித்த வாக்குறுதிகள் ஒரு புதிய நம்பிக்கையை ஏற்படுத்தலாம்.
சமீபத்திய அரசியல் நகர்வுகளுக்கு பிறகு, பல்வேறு அரசியல் உளவு அமைப்புகள் மற்றும் நிறுவனங்கள் நடத்திய ரகசிய சர்வே முடிவுகள் அதிர்ச்சி அளிப்பதாக உள்ளன. இந்த சர்வேக்கள் தி.மு.க.வின் பின்னடைவையும், அ.தி.மு.க.வின் தேக்க நிலையையும் காட்டுகின்றன. அ.தி.மு.க.வின் வாக்கு வங்கி சிதறுவதோடு, புதிய வாக்குகளை ஈர்க்கும் திறனையும் அது இழக்கிறது.
இந்த ரகசிய சர்வே முடிவுகளின்படி, ஓ.பி.எஸ்., டி.டி.வி. தினகரன் ஆதரவாளர்கள் மற்றும் தே.மு.தி.க., பா.ம.க. கூட்டணி ஆதரவுடன், த.வெ.க. தலைமையிலான கூட்டணி ஒரு திடீர் எழுச்சியை சந்தித்து, ஆட்சியை பிடிக்க அதிக வாய்ப்புள்ளது என்று இந்த சர்வேக்கள் தெரிவிக்கின்றன. த.வெ.க.வின் இந்த வளர்ச்சி, அ.தி.மு.க.வின் வாக்கு வங்கியை உடைத்து, ஆளுங்கட்சிக்கு எதிரான வாக்குகளை தன்வசம் இழுக்க முடிவெடுத்தால், 2026-ல் தமிழக அரசியல் வரலாறு மீண்டும் எழுதப்படும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
