தமிழக அரசியல் களம், வரவிருக்கும் சட்டமன்ற தேர்தலை முன்னிட்டு பெரும் குழப்பமான சூழலில் உள்ளது. நடிகர் விஜய்யின் தமிழக வெற்றிக் கழகத்தின் வருகை, பாரம்பரியமாக இரு துருவங்களாக சுழன்று வந்த திமுக மற்றும் அதிமுக கூட்டணியின் சமன்பாடுகளை முற்றிலுமாக மாற்றி அமைத்துள்ளது. குறிப்பாக, விஜய்யின் நிலைப்பாடு, எந்த கூட்டணிக்கும் எளிய பெரும்பான்மையை பெற முடியாத ஒரு சூழ்நிலையை உருவாக்கலாம் என்ற அச்சத்தை அனைத்து தரப்பிலும் ஏற்படுத்தியுள்ளது.
அதிமுக தலைமையிலான தேசிய ஜனநாயகக் கூட்டணி விஜய்யின் ஆதரவு இல்லாமல் பெரிய வெற்றியை பெறுவது கடினம் என்றே அரசியல் நோக்கர்கள் கருதுகிறார்கள். அதிமுக கூட்டணியில் தேமுதிக, பாமக போன்ற கட்சிகள் இணைந்தாலும், அவை கூட்டணிக்கு கணிசமான வாக்கு சதவீதத்தை உறுதிப்படுத்துவது சந்தேகமே.
விஜய், சினிமா கவர்ச்சி மற்றும் இளைஞர்கள் மீதான தனது செல்வாக்கு மூலம் ஒரு கணிசமான ‘புதிய வாக்குகளை’ வைத்திருக்கிறார். அவர் இல்லாமல், அதிமுக-பாஜக கூட்டணி, திமுக கூட்டணிக்கு ஈடுகொடுக்கும் பலத்தை பெற முடியாது என்று கூறப்படுகிறது.
ஆளும் திமுக தலைமையிலான கூட்டணியும் முழுமையான பலத்துடன் இருப்பதாகச் சொல்ல முடியாது. தேர்தல் வாக்குறுதிகள் நிறைவேற்றப்படாதது, விலைவாசி உயர்வு, அவ்வப்போது எழும் நிர்வாக சிக்கல்கள் போன்றவற்றால் மக்கள் மத்தியில் ஆளும் கூட்டணி மீது அதிருப்தி நிலவவே செய்கிறது. தேசிய அளவில் காங்கிரஸ் பலவீனமடைந்து வருவது, தமிழகத்திலும் திமுக கூட்டணிக்கு ஒரு சுமையாக பார்க்கப்படுகிறது.
இந்த அதிருப்தி வாக்குகளை, அதிமுகவோ அல்லது பா.ஜ.க.வோ முழுவதுமாக பெற முடியாத நிலையில், அந்த வாக்குகள் விஜய்யின் தவெக-வை நோக்கி திரும்ப வாய்ப்புள்ளது.
விஜய் தனித்து போட்டியிட்டால் யாருக்கும் அறுதிப் பெரும்பான்மை கிடைக்காமல் போவது தான் நடக்கும் என எதிர்பார்க்கப்படுகிறது. விஜய் சுமார் 15 முதல் 25 சதவீதம் வரையிலான வாக்குகளை பிரித்தால், அது இரண்டு பிரதான கூட்டணிகளின் வெற்றி வாய்ப்புகளை சிதைக்கும்.
யாருக்கும் பெரும்பான்மை கிடைக்காத நிலையில், ஒருவேளை சட்டமன்றம் கலைக்கப்பட்டு, மீண்டும் ஒரு பொதுத்தேர்தல் நடத்தப்படலாம். இந்த சூழ்நிலையைத்தான் விஜய் எதிர்பார்த்து, தனது கட்சியின் அடித்தளத்தை இன்னும் பலப்படுத்த ஒரு வாய்ப்பாக பயன்படுத்த திட்டமிடுகிறாரா என்ற சந்தேகம் எழுந்துள்ளது.
விஜய், ஒரு பாரம்பரிய கூட்டணியில் இணைந்து, ‘பத்தோடு பதினொன்றாக’ ஆக விரும்பவில்லை என்பதில் தெளிவாக இருக்கிறார். அவர் எதிர்பார்ப்பது, தமிழக அரசியலில் ஒரு மாற்றத்தை ஏற்படுத்த வேண்டும் என்பதே. முதல் தேர்தலில் சில இடங்களை கைப்பற்றி, ‘கிங் மேக்கர்’ என்பதை விட ‘கிங் பிரேக்கர்’ என்ற நிலையை அடைவது.
சட்டமன்றத்தில் யாருக்கும் மெஜாரிட்டி கிடைக்காத சூழல் ஏற்பட்டால், அது அரசியல் ஸ்திரத்தன்மையின்மையை ஏற்படுத்தும். இதன் காரணமாக, குறுகிய காலத்திலேயே மீண்டும் ஒரு தேர்தல் வரும் பட்சத்தில், தன்னுடைய செல்வாக்கை பலப்படுத்திக்கொண்டு, அடுத்த தேர்தலில் தனித்து நின்று ஆட்சியை கைப்பற்ற முடியும் என்ற தீர்க்கமான முடிவில் விஜய் இருக்கலாம் என்று அரசியல் வட்டாரங்கள் தெரிவிக்கின்றன.
விஜய்யின் இந்த முடிவு, திமுக மற்றும் அதிமுக கூட்டணியை மட்டுமல்லாமல், ஒட்டுமொத்த தமிழக அரசியல் எதிர்காலத்தையும் ஒரு கேள்விக்குறியாக நிறுத்தியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
