பிகார் சட்டமன்ற தேர்தல் முடிவுகளுக்கு பிறகு, தமிழக அரசியல் களம் சூடுபிடித்துள்ளது. அங்கு பா.ஜ.க. தலைமையிலான தேசிய ஜனநாயக கூட்டணி வெற்றி பெற்றதை தொடர்ந்து, தமிழகத்தில் ஆளும் தி.மு.க.வுக்கு எதிரான வாக்குகளை திசை திருப்புவது எப்படி என்பது குறித்து விஜய்யின் ‘தமிழக வெற்றிக் கழகம்’ தீவிர ஆலோசனையில் ஈடுபட்டுள்ளதாக அரசியல் வட்டாரங்கள் தெரிவிக்கின்றன.
தி.மு.க.வுக்கு எதிராக இயல்பாக எழக்கூடிய ‘ஆட்சிக்கு எதிரான அலை’ அ.தி.மு.க.வுக்கு சென்றுவிடாமல் தடுக்கவும், தவெக-வின் அரசியல் பயணத்தின் முதல் வெற்றிக்கு அடித்தளமிடவும், அவர் ஓர் இறுக்கமான கூட்டணி முடிவை எடுக்க வேண்டிய கட்டாயத்தில் உள்ளார்.
தற்போதைய தி.மு.க. ஆட்சியின் மீதான மக்களின் அதிருப்தி வாக்குகளை தன் பக்கம் திருப்புவதே விஜய்யின் பிரதான இலக்கு. ஆனால், அரசியல் எதார்த்தம் அதற்கு முற்றிலும் வேறுபட்டுள்ளது.
தமிழகத்தை பொறுத்தவரை, ஒரு கட்சி மீது மக்களுக்கு அதிருப்தி ஏற்படும்போது, அதன் முதன்மை எதிரியான அ.தி.மு.க.வுக்கே அந்த வாக்குகள் இயல்பாக சென்று சேரும். காரணம், அ.தி.மு.க. ஒரு வலுவான கட்டமைப்பு, நிரந்தரமான வாக்கு வங்கி மற்றும் ஆட்சி நிர்வாக அனுபவம் கொண்ட பழக்கமான மாற்று சக்தி ஆகும்.
இந்த காரணத்தினால், விஜய்யின் தவெக தனித்துக் களம் கண்டால், அது தி.மு.க.வுக்கு எதிரான வாக்குகளை பிரித்து, இறுதியில் தி.மு.க.வின் வெற்றியை எளிதாக்கும் ஓர் ஊடகமாகவே அமையும். ‘ஆட்சிக்கு எதிரான அலை அ.தி.மு.க.வுக்கு போய்விடுமா?’ என்ற இந்த அச்சமே விஜய்யை தீவிர ஆலோசனைக்கு தள்ளியுள்ளது.
விஜய்க்கு தமிழக அரசியல் களத்தில் உள்ள மிகப்பெரிய சவால், அவரால் தி.மு.க.வை உண்மையில் அதிகாரத்திலிருந்து அகற்ற முடியுமா என்பதை மக்களுக்கு நிரூபிப்பதே ஆகும். புதிய கட்சிகள், பெரிய கட்சிகளை வீழ்த்த வேண்டுமானால், அவர்களுக்கு பின்புலமாக ஒரு பலமான கூட்டணி மற்றும் நம்பகத்தன்மை தேவை. வெறும் நட்சத்திர அந்தஸ்தை வைத்து, நீண்டகாலமாக ஆளும் தி.மு.க.வின் வேரூன்றிய கட்டமைப்பை அசைக்க முடியாது.
தி.மு.க.வை அதிகாரத்திலிருந்து அகற்ற ஒரே ஒரு கட்சியின் பலம் போதாது என்று மக்களுக்கு தெரியும். வெற்றியை உறுதி செய்யும் ஒரு பலமான கூட்டணியில் விஜய் இணையும்போது மட்டுமே, “தி.மு.க.வை வீழ்த்த முடியும்” என்ற நம்பிக்கையை மக்கள் மத்தியில் விதைக்க முடியும்.
விஜய் எதிர்கொள்ளும் முக்கிய தார்மீகச் சிக்கல், தனது கொள்கை எதிரியான பா.ஜ.க. இருக்கும் கூட்டணியை ஏற்றுக்கொண்டு, தனது அரசியல் எதிரியை வீழ்த்த அ.தி.மு.க.வுடன் இணைவதா என்பதே.
தி.மு.க.வை பலமுறை தோற்கடித்த கட்சி அ.தி.மு.க. மட்டுமே. கடந்த 50 ஆண்டுகால தமிழக அரசியல் வரலாற்றில், ஆட்சியை மாற்றி அமைக்கும் வல்லமை அ.தி.மு.க.வுக்கே உள்ளது. இந்த வலிமையே விஜய்க்கு தேவைப்படுகிறது. அரசியலில், சித்தாந்த வேறுபாடுகளை தாண்டி, அதிகாரத்தை கைப்பற்றுவதே பிரதான நோக்கமாக இருக்கும். எனவே, தனது ஆரம்ப பயணத்திலேயே வெற்றியை உறுதி செய்ய, கொள்கை எதிரி யார் என்பதை பற்றி அதிகம் கவலைப்படாமல், வலுவான அரசியல் எதிரியை வீழ்த்துவது தான் முக்கியம் என்ற யதார்த்தத்தை விஜய் ஏற்க நேரிடலாம்.
பிகார் தேர்தல் முடிவுகள், வலுவான ஒரு கூட்டணி அமைந்தால் மட்டுமே வெற்றி பெற முடியும் என்ற பாடத்தை பா.ஜ.க.வுக்கும் அ.தி.மு.க.வுக்கும் அளித்துள்ளன. அதே சமயம், தனித்து நிற்கும் புதிய சக்திகள் வெறும் வாக்கு வங்கிகளை சிதைக்கும் வேலையை மட்டுமே செய்யும் என்பதையும் அது நிரூபித்துள்ளது.
தி.மு.க.வுக்கு எதிரான வாக்குகளை திரட்டி, அவற்றை வெற்றியாக மாற்ற வேண்டுமானால், விஜய் அ.தி.மு.க. கூட்டணியில் இணைவதை தவிர வேறு வழியில்லை என்ற முடிவை நோக்கி நகர்கிறார். 2026ல் துணை முதல்வர் மற்றும் சில அமைச்சர் பதவிகளை பெற்று, மக்களுக்கு சேவை செய்து, நல்ல பெயர் வாங்கி, 2031ல் தனித்து போட்டி என்ற முடிவை எடுக்கலாம் என்றும், இதுவே அவரது அரசியல் எதிர்காலத்தை நிர்ணயிக்கும் மிக முக்கியமான கட்டமாக இருக்கும் என்றும் கணிக்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
