பிகார் சட்டமன்ற தேர்தலில் காங்கிரஸ் கட்சி படுதோல்வி அடைந்ததன் எதிரொலி, தமிழக அரசியல் கூட்டணியில் பெரும் சலசலப்பையும் கேள்விகளையும் எழுப்பியுள்ளது. தேசிய அளவில் பலம் குன்றி வரும் காங்கிரஸை, திராவிட முன்னேற்ற கழகம் இனியும் அதே முக்கியத்துவத்துடன் கூட்டணியில் வைத்திருக்க வேண்டுமா என்ற விவாதம் திமுக வட்டாரங்களில் வலுத்துள்ளது. மறுபுறம், புதிதாக களம் காணும் நடிகர் விஜய், இந்த பலவீனமான காங்கிரஸுடன் கூட்டணி சேர தயங்குவாரா என்ற கேள்வியும் எழுந்துள்ளது.
பிகார் தேர்தலில் மகா கூட்டணியின் ஒரு அங்கமாக 61 தொகுதிகளில் போட்டியிட்ட காங்கிரஸ், அதில் சொற்பமான இடங்களிலேயே வெற்றி பெற்றது. இந்த மோசமான தோல்வி, தமிழக காங்கிரஸ் கட்சிக்கு சிக்கலை ஏற்படுத்தியுள்ளது.
தேசிய அளவில் ராகுல் காந்தியின் தலைமை மற்றும் பிரச்சாரம் தொடர்ந்து தோல்வியை சந்திப்பது, காங்கிரஸின் நம்பகத்தன்மையை வெகுவாக குறைத்துள்ளது. மாநில கட்சிகள் இனி காங்கிரஸை ஒரு வலுவான தேசிய சக்தியாக கருத தயங்கும் நிலை உருவாகியுள்ளது.
“தேசிய அளவில் வெற்றிக்காக போராட முடியாத ஒரு கட்சியுடன், தமிழகத்தில் பெரிய கட்சிகள் ஏன் கூடுதல் இடங்களைப் பங்கீடு செய்ய வேண்டும்?” என்ற கேள்வி திமுகவின் மூத்த தலைவர்கள் மத்தியில் எழ தொடங்கியுள்ளது. தமிழகத்தில் காங்கிரஸ், திமுகவின் மிக முக்கியமான கூட்டணி கட்சியாக உள்ளது. ஆனால், பிகார் தோல்விக்கு பிறகு, இந்த உறவில் மாற்றங்கள் வரலாம் என எதிர்பார்க்கப்படுகிறது.
“காங்கிரஸ் கூட்டணியை விட்டு போனால் போகட்டும்” என்ற அதிரடியான மனநிலை திமுக தலைமைக்கு வர வாய்ப்புள்ளது. அதாவது, காங்கிரஸ் கூட்டணி வேண்டாம் என்று முடிவெடுத்தால், அதை ஈடுகட்ட வேறு சிறிய கட்சிகளை இணைத்துக்கொண்டு வலிமையை காட்ட திமுக தயங்காது.
அடுத்து வரவுள்ள சட்டமன்ற தேர்தலில், காங்கிரஸ் கேட்கும் தொகுதிகளின் எண்ணிக்கை குறித்து திமுக இனிமேல் மிகவும் கறாராக பேச்சுவார்த்தை நடத்தும். முன்புபோல, காங்கிரஸுக்கு கூடுதல் முக்கியத்துவம் கொடுத்து அதிக இடங்களை திமுக ஒதுக்காது. அதிகபட்சம் 10 தொகுதிகள் கொடுக்கும் என எதிர்பார்க்கப்படுகிறது. காங்கிரஸை நம்பியிருப்பதை விட, வலுவான மாநில கட்சிகள் மற்றும் சமூக அமைப்புகளை சேர்ப்பதில் திமுக அதிக ஆர்வம் காட்டலாம்.
நடிகர் விஜய் தனது தமிழக வெற்றி கழகம் கட்சியை தொடங்கி, 2026 சட்டமன்ற தேர்தலுக்கு தயாராகி வருகிறார். இந்த சூழலில், பிகார் தேர்தல் முடிவுகள் விஜய்யின் அரசியல் நகர்வுக்கு சிக்கலை ஏற்படுத்தலாம். விஜய், பா.ஜ.க. அரசியலை ஏற்காதவராக இருப்பதால், அ.தி.மு.க.வுடன் பா.ஜ.க. நீடித்தால், அ.தி.மு.க. கூட்டணிக்கும் செல்ல முடியாது.
திமுக கூட்டணியில் இருந்து விலகி வந்தால் காங்கிரஸுடன் கைகோர்ப்பது விஜய்க்கு ஒரு மாற்று தேர்வாக இருக்கலாம். ஆனால், பிகார் தோல்விக்கு பிறகு, போராட்ட குணமோ, மக்கள் செல்வாக்கோ இல்லாத ஒரு தேசியக் கட்சியுடன் கூட்டணி வைப்பது, தனது புதிய அரசியல் பயணத்திற்கு பலவீனமாக அமையுமோ என்று அவர் யோசிக்க வாய்ப்புள்ளது. வலுவற்ற காங்கிரஸை சீண்டுவதற்குக்கூட அவர் விரும்பமாட்டார்.
கடந்த காலங்களில் தமிழக காங்கிரஸ், மாநில மக்களின் முக்கிய பிரச்சினைகளுக்காக ஒரு போராட்டம்கூட நடத்தவில்லை என்ற விமர்சனம் பரவலாக உள்ளது. தமிழகத்தில் உள்ள முக்கிய பிரச்சினைகள் குறித்து, மக்கள் நலனுக்காக வலுவான ஒரு குரலை கூட சட்டமன்றத்தில் அல்லது பொதுவெளியில் தமிழக காங்கிரஸ் தலைமை எழுப்பவில்லை என்ற குற்றச்சாட்டு உள்ளது.
தேசியத் தலைமையின் பலவீனம், உள்ளூரில் செயலற்ற தன்மை ஆகிய இரண்டு காரணங்களும் சேர்ந்து, தமிழக காங்கிரஸின் எதிர்காலத்தை கேள்விக்குறியாக்கியுள்ளன. திமுக கூட்டணியில் அதன் நிலை, இனி அதன் தகுதியை சார்ந்துதான் இருக்கும் என்பதில் அரசியல் வட்டாரத்தில் எந்த சந்தேகமும் இல்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
