இந்திய பெருங்கடல் பகுதியில், குறிப்பாக சர் கிரீக் எல்லையில் இந்தியா மற்றும் பாகிஸ்தான் ராணுவங்கள் தற்போது தங்களின் பலத்தை காட்டி வருகின்றன. சர் கிரீக் அருகே இந்தியாவின் முப்படை ஒத்திகை ‘ஆபரேஷன் திரிசூல்’ தீவிரமாக நடந்துவரும் அதே நேரத்தில், அதே கடல் பகுதியில் துப்பாக்கி சூடு பயிற்சிக்காக பாகிஸ்தான் ஒரு கடல்சார் எச்சரிக்கையை விடுத்துள்ளது.
சர் கிரீக் என்பது 96 கி.மீ. நீளமுள்ள ஒரு குறுகிய நீர்வழி பாதை. இது இந்தியாவின் குஜராத் மாநிலத்திற்கும் பாகிஸ்தானின் சிந்து மாகாணத்திற்கும் இடையில் அமைந்துள்ளது. வரைபடத்தில் ஒரு சதுப்புநில பகுதியாக தெரிந்தாலும், இதற்கு பின்னால் மாபெரும் பொருளாதார மதிப்பு உள்ளது.
சர் கிரீக்கை யார் கட்டுப்படுத்துகிறார்களோ, அவர்களே அரபிக்கடலில் கடல் எல்லை எங்கிருந்து தொடங்குகிறது என்பதை முடிவு செய்கிறார்கள். இந்த கடல் எல்லையே, 200 நாட்டிகல் மைல்கள் வரையிலான தனித்துவமான பொருளாதார மண்டலத்தை தீர்மானிக்கிறது. இந்த மண்டலத்தில் தான் எண்ணெய், எரிவாயு மற்றும் மீன்வளங்கள் போன்ற வளங்கள் நிறைந்த ஆயிரக்கணக்கான சதுர கிலோமீட்டர் பரப்பளவு கொண்ட கடல் பகுதி உள்ளது.
சுருக்கமாக, சர் கிரீக்கை கட்டுப்படுத்துவது என்பது மாபெரும் கடல் வளத்தையும் கட்டுப்படுத்துவதை குறிக்கிறது. அதனால்தான் இரு நாடுகளும் ஒரு அங்குலம் கூட விட்டு கொடுக்கத் தயாராக இல்லை. இந்தச் சர்ச்சை, பிரிட்டனின் காலனி ஆதிக்க காலத்திலிருந்து தொடங்குகிறது.
1914 ஆம் ஆண்டு, கச்ச் வளைகுடா மற்றும் சிந்து மாகாணத்திற்கு இடையே ஆங்கிலேயர்கள் ஒரு எல்லையை வகுத்தனர் இந்த கால்வாயின் கிழக்கு விளிம்பில்தான் எல்லை செல்கிறது என்று இந்தியா கூறுகிறது. அதாவது, சர் கிரீக் முழுமையாக இந்தியாவிற்கு சொந்தமானது என்பது இந்தியாவின் வாதம். பாகிஸ்தான் இதை மறுக்கிறது. இரு நாடுகளுக்கும் இடையே இப்பிரச்சினை குறித்து பேச்சுவார்த்தைகள் நடந்து 13 ஆண்டுகளுக்கு மேல் ஆகிவிட்ட நிலையில், இப்போது ஒரு சீரியஸ் நிலையிலுள்ள மோதலாக உள்ளது.
இந்தியா மேற்கொண்டுள்ள ‘ஆபரேஷன் திரிசூல்’ என்பது சமீபத்திய ஆண்டுகளில் நடத்தப்பட்ட மிகப்பெரிய முப்படை பயிற்சிகளில் ஒன்றாகும். இதில் 20,000-க்கும் மேற்பட்ட துருப்புகள், 25 போர்க் கப்பல்கள், மற்றும் 40 போர் விமானங்கள் ஆகியவை ஒரே நேரத்தில், நிலம், கடல் மற்றும் வான் வெளியில் ஒருங்கிணைந்து செயல்படுகின்றன. ‘ஆபரேஷன் சிந்தூர்’ வெற்றிக்கு பிறகு, இந்த ஒத்திகை இந்தியாவின் தற்சார்பு மற்றும் உள்நாட்டில் தயாரிக்கப்பட்ட பாதுகாப்பு அமைப்புகளின் திறனை வெளிப்படுத்துகிறது.
பாதுகாப்புத் துறை அமைச்சர் ராஜ்நாத் சிங் அண்மையில் இங்கு பயணம் செய்து, “சர் கிரீக் பகுதியில் பாகிஸ்தான் எந்த விதமான அத்துமீறலை செய்தாலும், வரலாறு மற்றும் புவியியல் இரண்டையும் மாற்றும் அளவுக்கு தகுந்த பதிலடி கொடுக்கப்படும்” என்று பகிரங்கமாக எச்சரித்தார்.
இந்தியாவுடைய பயிற்சி வழக்கமானதல்ல; இது சர்ச்சைக்குரிய பகுதிக்கு அருகிலும், சைபர் மற்றும் விண்வெளிப் போர் உட்படப் பல களங்களில் செயல்படுவதையும் உள்ளடக்கியதால் பாகிஸ்தான் பதற்றமடைந்துள்ளது. சர் கிரீக் அமைந்திருக்கும் பகுதி, பாகிஸ்தானின் பொருளாதார உயிர்நாடியாக கருதப்படும் கராச்சிக்கு அருகில் உள்ளது. இங்கு இந்தியாவின் வலுவான ராணுவ நுழைவு, பாகிஸ்தானின் கடல் வர்த்தகம் மற்றும் எரிசக்தி விநியோகத்தை பாதிக்கலாம்.
செயற்கைக்கோள் படங்கள், பாகிஸ்தான் சர் கிரீக் அருகே புதிய பங்கர்கள், ரேடார்கள் மற்றும் கடலோர பாதுகாப்பு நிலைகளை அமைத்து வருவதை காட்டுகின்றன. களத்தில் உண்மைகளை மாற்றும் பாகிஸ்தானின் இந்த இராணுவமயமாக்க முயற்சிக்கு இந்தியா விடுத்துள்ள நேரடி பதில்தான் ‘திரிசூல்’.
பாகிஸ்தான் வெளியிட்டுள்ள எச்சரிக்கைகளும், வான்வெளியை கட்டுப்படுத்துவதும், அதன் பலத்தை காட்டுவதை விட, அச்சத்தின் வெளிப்பாடாகவே பார்க்கப்படுகிறது.
இந்தியா-பாகிஸ்தான் மோதலில் சர் கிரீக் ஒரு சதுப்புநிலமாக இருந்தாலும், அதுவே அடுத்து வரவிருக்கும் மோதலின் புதிய மையப்புள்ளியாக உருவெடுத்துள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
