திரைத்துறையில் உச்சத்தில் இருக்கும் நடிகர் விஜய், தற்போது முழு நேர அரசியலுக்கு வந்துவிட்டதால், அவரது வருகை, வரவிருக்கும் தேர்தல்களில் ஆளுங்கட்சியான திமுக மற்றும் எதிர்க்கட்சியான அதிமுக ஆகியவற்றின் வெற்றி வாய்ப்புகளை எவ்வாறு பாதிக்கும் என்பது குறித்து பல்வேறு அரசியல் பார்வையாளர்களும் தங்கள் கருத்துக்களை முன்வைக்கின்றனர். முக்கியமாக, திமுக வீழ்த்த முடியாத சக்தி அல்ல என்றும், அவரது அணுகுமுறை மற்றும் கூட்டணி வியூகம் குறித்தும் சில முக்கிய அரசியல் முடிவுகள் எடுக்கப்படலாம் என கருதப்படுகிறது.
விஜய், தான் தொடங்கிய தமிழக வெற்றிக் கழகம் மூலம் நேரடியாக அரசியலில் களமிறங்க ஆயத்தமாகி வருகிறார். அவருடைய அரசியல் பிரவேசத்தின் விளைவுகள் குறித்து பேசும்போது, திமுக-வைவிட அதிமுக-தான் அதிகம் ஏமாற்றமடைய வாய்ப்புள்ளது என்ற கருத்து வலுப்பெறுகிறது.
விஜய், புதிய இளம் வாக்காளர்களையும், அத்துடன் அதிமுக-வின் பாரம்பரியமான இளைஞர் மற்றும் நடுநிலை வாக்குகளையும் பிரித்து செல்லக்கூடும் என்று கணிக்கப்படுகிறது. இது அதிமுக-வின் பலத்தை கணிசமாகக் குறைக்கும். கடந்த தேர்தல்களில் வெற்றி வாய்ப்பை இழந்ததற்கு காரணம் வாக்குகள் பிரிந்ததுதான் என்பதை அதிமுக உணர்ந்துள்ளது. மேலும் அதிமுக கூட்டணிக்கு விஜய் வருவார் என்று ஈபிஎஸ் எதிர்பார்த்த நிலையில், அவர் வராதது பெருத்த ஏமாற்றம் தான்.
ஆளுங்கட்சியான திமுக-வின் வலுவான வாக்கு வங்கியில் இருந்து விஜய் சற்று வாக்குகளை பிரித்தாலும், அதிமுக-வுக்கு ஏற்படும் இழப்பை போல அது பெரியதாக இருக்காது என்று கருதப்படுகிறது. இருப்பினும், விஜய் நேரடியாக களமிறங்கும்போது, அரசியலில் நிலவும் சலிப்பு மற்றும் மாற்றத்தை விரும்பும் மக்களின் வாக்குகள் திமுக-வுக்கும் எதிராகவே திரும்பும் என எதிர்பார்க்கப்படுகிறது.
திராவிடக் கட்சிகளில் வலிமையான ஒன்றாக கருதப்படும் திமுக, வீழ்த்த முடியாத கட்சி அல்ல என்பதை வரலாறு காட்டுகிறது. கடந்த காலங்களில் பலமுறை அது எதிர்க்கட்சிகளால் வீழ்த்தப்பட்டுள்ளது. எனவே, ஒரு புதிய அரசியல் சக்தியாக விஜய் களமிறங்கும்போது, அவரது பிரச்சார தீவிரம் மற்றும் மக்கள் மத்தியில் அவர் ஏற்படுத்தும் தாக்கம் ஆகியவை திமுக-வின் அசைக்க முடியாத கோட்டையை தகர்க்கக்கூடும்.
கடந்த காலங்களில் திமுக ஆட்சிக்கு வந்தபோதெல்லாம், ஒரு சில ஆண்டுகளில் மக்கள் மத்தியில் ஆட்சியின் மீது சலிப்பு ஏற்படுவது வழக்கம். இந்த சலிப்பை விஜய் தன்னுடைய பலமாக மாற்றிக் கொள்வார் என்றும், தனது பேச்சுகள் மற்றும் செயல்பாடுகள் மூலம் மக்கள் மத்தியில் ஒரு மாற்று அரசியல் என்கிற எண்ணத்தை விதைப்பார் என்றும் எதிர்பார்க்கப்படுகிறது.
விஜய் தனது அரசியல் நிலைப்பாடு குறித்து எடுத்துள்ள ஒரு முக்கிய முடிவு, கூட்டணி குறித்த அவரது உறுதியான பார்வை ஆகும். அவர், கசகசவென்று பல கட்சிகளுடன் கூட்டணி வைத்து தொங்காமல், காங்கிரஸ் கட்சியுடன் மட்டும் கூட்டணி அமைத்து தனித்துவத்துடன் இருக்க வேண்டும் என்று விரும்புவதாகத்தகவல் வெளியாகியுள்ளது.
பல பெரிய கட்சிகளுடன் கூட்டணி சேரும்போது, கட்சியின் கொள்கை மற்றும் தனித்துவம் பாதிக்கப்படும். இதனை தவிர்க்கும் வகையிலும், மாற்று அரசியல் என்ற பிம்பத்தை தக்கவைக்கும் வகையிலும் இந்தக் கூட்டணி முடிவை விஜய் எடுத்திருக்கலாம்.
வரும் தேர்தலில் தனது கட்சி பெரும்பான்மை பெறாவிட்டாலும், தமிழக சட்டசபையில் தொங்கு சட்டசபை நிலை வந்தாலும் பரவாயில்லை என்றும், அதன் பின் ஏற்படும் அரசியல் சூழலை அடுத்த தேர்தலில் பார்த்துக்கொள்ளலாம் என்றும் விஜய் முடிவெடுத்துள்ளதாக தெரிகிறது. இது, நீண்ட கால அரசியலை இலக்காக கொண்ட அவரது மாஸ்டர் பிளானை காட்டுகிறது.
திரைப்படங்களில் ஆக்ஷன் காட்சிகளை போல, இனி அரசியலிலும் விஜய் “இறங்கி அடிப்பார்” என்று அவரது ஆதரவாளர்கள் மத்தியில் பெரும் எதிர்பார்ப்பு நிலவுகிறது. அவருடைய அணுகுமுறை, விமர்சனங்களுக்கு பதில் அளிக்கும் விதம், மற்றும் அடித்தட்டு மக்களை சென்றடையும் பிரசாரம் ஆகியவை தமிழ்நாட்டு அரசியலின் போக்கை மாற்றுமா என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
