மலேசியத் தலைநகர் கோலாலம்பூரில் நடைபெற்ற முக்கியமான ஆசியான் மாநாட்டை ஒட்டி, இந்திய-அமெரிக்க உறவுகளின் சமீபத்திய சிக்கல்கள் வெளிச்சத்திற்கு வந்துள்ளன. பிரதமர் நரேந்திர மோடிக்கு பதிலாக வெளியுறவு அமைச்சர் ஜெய்சங்கர் மாநாட்டில் கலந்துகொண்ட நிலையில், அவர் தனது அமெரிக்க வெளியுறவு செயலாளர் மார்கோ ரூபியோவை சந்தித்தார். இரண்டு மாதங்களில் இது இரண்டாவது சந்திப்பு என்றாலும், இந்த ராஜதந்திர பேச்சுவார்த்தைகள் இந்தியா-அமெரிக்கா உறவில் நிலவும் ‘பனிப்போரை’ முற்றிலுமாக தீர்த்து வைக்கவில்லை என்றே அரசியல் பார்வையாளர்கள் கருதுகின்றனர்.
வெளியுறவு அமைச்சர் ஜெய்சங்கர், அமெரிக்க வெளியுறவு செயலாளர் ரூபியோ உடனான சந்திப்பு குறித்து பதிவிட்ட ட்விட்டர் பதிவு, சுருக்கமாகவும், தெளிவற்றதாகவும் இருந்தது. “செயலாளர் ரூபியோவை சந்தித்ததில் மகிழ்ச்சி. இருதரப்பு உறவுகள், பிராந்திய மற்றும் உலகளாவிய பிரச்சினைகள் குறித்து விவாதித்தோம்” என்று மட்டுமே அவர் குறிப்பிட்டிருந்தார். அமெரிக்க வெளியுறவு துறையும், ரூபியோவும் இந்த சந்திப்புக்குறித்து எந்த கருத்தையும் தெரிவிக்காதது, இரு நாடுகளுக்கும் இடையிலான தற்போதைய பதற்றமான சூழலை குறிப்பதாக உள்ளது.
இந்த உறவின் சிக்கலுக்கு இரண்டு முக்கிய காரணங்கள்:
1. டிரம்ப்பின் வர்த்தக தடைகளும் ரஷ்ய எண்ணெய்ச் சர்ச்சையும்
அமெரிக்க அதிபர் டோனால்ட் டிரம்ப், இந்திய ஏற்றுமதிகள் மீது 50% வரிகளை விதித்துள்ளார். இதில், ‘பரஸ்பர வரி’ என்று கூறி 25% வரிகளும், ரஷ்ய எண்ணெயை இந்தியா கொள்முதல் செய்வதற்காக கூடுதலாக 25% வரிகளும் அடங்கும். ரஷ்ய எண்ணெய் வாங்குவதை இந்தியா நிறுத்த உறுதியளித்துள்ளதாக டிரம்ப் கூறுகிறார். ஆனால், இந்திய அரசு இதுவரை இதை உறுதிப்படுத்தவில்லை. இதுவே வாஷிங்டனுக்கும் டெல்லிக்கும் இடையிலான முதல் பிரச்சினை.
2. பாகிஸ்தானின் அணைப்பும், அமெரிக்காவின் ‘இரட்டைக் குதிரை’ சவாரியும்
இரண்டாவது மற்றும் மிகவும் முக்கியமான பிரச்சினை பாகிஸ்தான். இந்தியா-பாகிஸ்தான் இடையே நடந்த சண்டையில், போர் நிறுத்தத்தை தான் பேச்சுவார்த்தை மூலம் கொண்டு வந்ததாக டிரம்ப் மீண்டும் மீண்டும் உரிமை கொண்டாடுகிறார். இதை இந்தியா தொடர்ந்து மறுத்து வருகிறது. மேலும் கோலாலம்பூரில் பாகிஸ்தான்-ஆப்கானிஸ்தான் மோதல் குறித்து பேசிய டிரம்ப், பாகிஸ்தான் தலைவர்களை புகழ்ந்து தள்ளினார். “பாகிஸ்தான் தலைவர்கள் சிறந்த மனிதர்கள்” என்று அவர் கூறியது, இஸ்லாமாபாத்துக்கு டிரம்ப் அளிக்கும் ஆதரவை வெளிப்படையாக காட்டுகிறது.
இந்தியா-பாகிஸ்தான் சமாதானத்துக்கு தான் உரிமை கோருவதை டிரம்ப் நிறுத்த வேண்டும். இந்தியா-பாகிஸ்தானை பிரித்துப் பேசும் ‘ஹைஃபனேஷன்’ கொள்கையை நிறுத்த வேண்டும். பாகிஸ்தானுக்கு இராணுவ உதவிகளை நிறுத்துதல். பாகிஸ்தான் தலைவர்களை பாராட்டுவதை நிறுத்த வேண்டும் போன்றவற்றை இந்தியா எதிர்பார்க்கிறது.
டிரம்ப் பதவியேற்ற பிறகு, மனிதாபிமான உதவிகளை கூட பல நாடுகளுக்கு நிறுத்திய நிலையில், பாகிஸ்தானுக்கு மட்டும் இராணுவ உதவிகளை வழங்கியுள்ளார். பாகிஸ்தான் பிரதமர் ஷெபாஸ் ஷெரீப், டிரம்ப்பை புகழ்ந்து தள்ளுவதே வழக்கமாக கொண்டுள்ளார். அமெரிக்காவிடம் இருந்து மேலும் இராணுவ உதவிகளையும், அரசியல் ஆதரவையும் பாகிஸ்தான் எதிர்பார்க்கிறது. இது இந்தியாவின் பாதுகாப்புக்கு கவலையளிப்பதாகும்.
ஒருபுறம், அமெரிக்காவுடன் வர்த்தக ஒப்பந்தத்தை இறுதி செய்ய இந்தியா கடுமையாக முயல்கிறது. வரைவு ஒப்பந்தம் தயாராக இருப்பதாகவும் தகவல்கள் வெளியாகியுள்ளன. மறுபுறம், இந்தியா தனது வெளிநாட்டு உறவுகளை பல்வகைப்படுத்துவதில் தீவிரமாக உள்ளது. உதாரணமாக, நேற்று இந்தியாவுக்கும் சீனாவுக்கும் இடையில் ஐந்து ஆண்டுகளுக்கு பிறகு நேரடி விமானங்கள் மீண்டும் தொடங்கப்பட்டுள்ளன. இது டெல்லி-பீஜிங் உறவில் ஒரு புதிய தொடக்கத்தை குறிக்கிறது.
“எந்த ஒரு நாட்டின் கூடையிலும் உங்கள் எல்லா முட்டைகளையும் வைக்காதீர்கள்” (Never put all your eggs in one basket) என்ற ராஜதந்திர வியூகமே இந்தியாவின் தற்போதைய வெளியுறவு கொள்கையைச் சுருக்கமாக கூறுகிறது. வர்த்தக ஒப்பந்தம் விரைவில் முடியலாம், டிரம்ப்பின் பேச்சுக்கள் தணியலாம். ஆனால், இழந்த நம்பிக்கையை மீட்டெடுப்பது கடினமான பேச்சுவார்த்தையாக இருக்கும் என்று சர்வதேச அரசியலை கண்காணிக்கும் வல்லுனர்கள் கூறி வருகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
