தமிழக வெற்றிக் கழகம் என்ற அரசியல் கட்சியை நடிகர் விஜய் தொடங்கியதிலிருந்து, தமிழக அரசியல் களம் சூடுபிடித்துள்ளது. தனது கொள்கை முழக்கங்களை வெளியிட்ட போதிலும், எதிர்வரும் சட்டமன்ற தேர்தலில் த.வெ.க.வின் நிலைப்பாடு என்னவாக இருக்கும் என்பது குறித்து பல்வேறு ஊகங்கள் பரவி வருகின்றன. குறிப்பாக, தி.மு.க. மற்றும் பா.ஜ.க. ஆகிய இரு முக்கிய கட்சிகளின் அணுகுமுறையும், த.வெ.க. நிர்வாகிகளின் அழுத்தமும் விஜய்யின் முடிவில் தாக்கத்தை ஏற்படுத்தக்கூடும் என்ற பேச்சுக்கள் அரசியல் வட்டாரத்தில் எழுந்துள்ளன.
அரசியல் நோக்கர்களின் கூற்றுப்படி, தமிழகத்தில் வலுவாக இருக்கும் தி.மு.க.வை வீழ்த்த நினைக்கும் பாஜக, நடிகர் விஜய்யின் வருகையை தங்களுக்கு சாதகமாக்கப் பார்க்கிறது. த.வெ.க. தனித்து போட்டியிடுவதன் மூலம், தி.மு.க.வுக்கு எதிரான வாக்குகள் பிரியலாம். இது திமுக தலைமையிலான கூட்டணிக்கு சாதகமாக அமைய வாய்ப்புள்ளது.
எனவே “எங்களுக்குத் தி.மு.க. வெற்றி பெறக்கூடாது. நீங்கள் முழு மூச்சுடன் ‘இறங்கி விளையாடுங்கள்’. உங்களுக்குத் தேவையான பின்புல ஆதரவை நாங்கள் பார்த்துக் கொள்கிறோம்” என்று பா.ஜ.க. தரப்பில் இருந்து விஜய்யுடன் மறைமுக பேச்சுக்கள் நடத்தப்பட்டிருக்கலாம் என்று அரசியல் களத்தில் பரபரப்பான தகவல்கள் உலவுகின்றன. இது தி.மு.க.வின் வெற்றியை தடுப்பதே தங்கள் முதன்மையான நோக்கம் என்பதை பா.ஜ.க. தெளிவாக உணர்த்தியுள்ளது.
ஆனால் தொடக்கம் முதல் நடிகர் விஜய், த.வெ.க.வை தனித்து போட்டியிடும் கட்சியாக முன்னிறுத்தி வருகிறார். இருப்பினும், கரூர் சம்பவத்திற்கு பின் கட்சி நிர்வாகிகளின் நிலைப்பாடு வேறு விதமாக மாறியிருப்பதாக கூறப்படுகிறது. சில த.வெ.க. நிர்வாகிகள், கடந்த காலத் தேர்தல்களை சுட்டிக்காட்டி, தமிழக அரசியல் சூழலில் ஒரு புதிய கட்சிக்கு தனித்து போட்டியிடுவது மிகவும் சவாலானது என்று விஜய்யிடம் வலியுறுத்தியுள்ளனர்.
ஒரு பெரிய கூட்டணியில் இருந்தால்தான் வெற்றிக்கான வாய்ப்புகள் அதிகம். குறிப்பாக, ஒரு புதிய கட்சிக்கு தேவைப்படும் அரசியல் உள்கட்டமைப்பு மற்றும் தேர்தல் அனுபவத்தைப் பெற, அ.தி.மு.க. அல்லது பா.ஜ.க. போன்ற வலுவான கட்சிகளின் துணையை நாடுவதே சிறந்த வியூகம் என்று த.வெ.க. நிர்வாகிகள் விஜய்யின் மனதை மாற்ற முயன்றதாக பேசப்படுகிறது.
ஆரம்பத்தில் இருந்த தனித்து செயல்படுவோம் என்ற உறுதியில் இருந்து விலகி, கூட்டணி அரசியலுக்குள் வர வேண்டும் என்ற அழுத்தம் கட்சி நிர்வாகிகளால் விஜய்க்கு தரப்பட்டு வருவதாக வட்டாரங்கள் தெரிவிக்கின்றன. பா.ஜ.க.வின் மறைமுக அழைப்புகள், தி.மு.க.வின் அழுத்தங்கள் மற்றும் சொந்த கட்சி நிர்வாகிகளின் கூட்டணி வலியுறுத்தல்கள் ஆகியவற்றுக்கு மத்தியில், விஜய்யின் இறுதி முடிவு என்னவாக இருக்கும் என்ற கேள்வி எழுந்துள்ளது.
தனது கட்சியின் அடிப்படை நோக்கத்தை நிலைநிறுத்தி, தேர்தலில் தோல்வியடைந்தாலும், தமிழகத்தில் த.வெ.க.வின் அடித்தளத்தை உறுதியாக உருவாக்க தனித்து போட்டியிடும் துணிச்சலான முடிவை விஜய் எடுப்பாரா?
தி.மு.க. எதிர்ப்பு அலையை பயன்படுத்திக்கொள்ள, பா.ஜ.க.வின் பின்புல ஆதரவை பெற்றுக்கொண்டு, நேரடியான கூட்டணியில் இல்லாவிட்டாலும், மறைமுகமாக அவர்களுடன் ஒத்துழைக்க விஜய் சம்மதிப்பாரா?
அல்லது தமிழ்நாட்டில் வலுவான தேர்தல் அனுபவத்ஹ்டை கொண்டிருக்கும் அ.தி.மு.க.வுடன் கூட்டணி அமைத்து, அதன் மூலம் ஒரு குறிப்பிட்ட எண்ணிக்கையிலான சட்டமன்ற இடங்களை பெற விஜய் முற்படுவாரா?
விஜய் தனித்து செயல்படும் முடிவை எடுத்தால், அது தமிழக அரசியலில் நீண்டகால அடிப்படையில் ஒரு பெரிய தாக்கத்தை ஏற்படுத்தும். மாறாக, அவர் ஒரு கூட்டணியைத்தேர்ந்தெடுத்தால், தமிழக வெற்றிக் கழகம் அதன் தொடக்கத்திலேயே ஒரு பெரிய கட்சியின் துணை இயந்திரமாக செயல்பட வேண்டியிருக்கும். எனவே, தமிழக அரசியலின் எதிர்காலத்தை நிர்ணயிக்க போகும் முக்கிய முடிவை விஜய் விரைவில் எடுப்பார் என்று எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
