பீகார் மாநிலத்தில் பெண்களின் சுயசார்பு மற்றும் மேம்பாட்டிற்காக, “முக்கிய மந்திரி மகிளா ரோஜ்கார் யோஜனா” என்ற புதிய திட்டத்தை பிரதமர் நரேந்திர மோடி இன்று காணொலி காட்சி மூலம் தொடங்கி வைத்தார். இத்திட்டத்தின் மூலம், பீகார் முழுவதும் உள்ள 75 லட்சம் பெண்களுக்கு தலா ரூ. 10,000 வழங்கப்படும். மொத்தம் ரூ. 7,500 கோடி நேரடியாக அவர்களின் வங்கி கணக்குகளுக்கு மாற்றப்பட்டுள்ளது.
பீகார் அரசின் இந்தத் திட்டம், பெண்களுக்கு சுயதொழில் மற்றும் வாழ்வாதார வாய்ப்புகளை வழங்குவதன் மூலம் அவர்களை தன்னிறைவு ஆக்குவதை நோக்கமாக கொண்டுள்ளது. மாநிலம் முழுவதும் உள்ள ஒவ்வொரு குடும்பத்திலிருந்தும் ஒரு பெண்ணுக்கு இந்த நிதி உதவி வழங்கப்படும். இதன் மூலம் அவர்கள் தங்களின் விருப்பப்படி வேலைவாய்ப்பு அல்லது வாழ்வாதார நடவடிக்கைகளை தொடங்க முடியும்.
ஒவ்வொரு பயனாளியும், முதற்கட்டமாக, நேரடி பணப் பரிமாற்றம் மூலம் ரூ. 10,000 மானியமாகப் பெறுவார்கள். முதல் கட்டத்தில் அவர்களின் தொழில் வெற்றிகரமாக இருந்தால், அடுத்த கட்டங்களில் ரூ. 2 லட்சம் வரை கூடுதல் நிதி உதவியைப் பெற வாய்ப்புள்ளது. இந்த நிதி, விவசாயம், கால்நடை வளர்ப்பு, கைவினை பொருட்கள், தையல், நெசவு மற்றும் பிற சிறு தொழில்கள் போன்ற துறைகளில் பயன்படுத்தப்படலாம்.
இந்த திட்டம் வெறும் நிதி உதவி வழங்குவதோடு முடிந்துவிடாது. சுய உதவி குழுக்களுடன் தொடர்புடைய சமுதாய வள நபர்கள் மூலம் பயனாளிகளுக்கு தேவையான பயிற்சி மற்றும் ஆதரவு வழங்கப்படும். மேலும், அவர்கள் உற்பத்தி செய்யும் பொருட்களை விற்பனை செய்வதற்கு வசதியாக, கிராமப்புற சந்தைகள் உருவாக்கப்படும்.
இத்திட்ட தொடக்க நிகழ்வில், மாநிலம் முழுவதும் மாவட்டம், தொகுதி, கிராமம் என பல நிலைகளில் ஏற்பாடு செய்யப்பட்ட நிகழ்ச்சிகளில் ஒரு கோடிக்கும் மேற்பட்ட பெண்கள் கலந்துகொண்டனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
