தமிழக அரசியல் களம் தற்போது சூடுபிடித்துள்ள நிலையில், ஒரு பக்கம் திமுகவின் முப்பெரும் விழா, இன்னொரு பக்கம்அ.தி.மு.க.வின் மாநாடு, இந்த இரண்டுக்கும் இடையே புதிதாக களமிறங்கிய தமிழக வெற்றிக் கழகத்தின் கூட்டம் என மூன்று கட்சிகளின் மக்கள் திரட்டும் முயற்சிகளும் விவாத பொருளாக மாறியுள்ளன. இந்த மாநாடுகளில் திரண்ட கூட்டங்கள், அதன் தன்மை, மற்றும் அரசியல் கட்சிகளின் அணுகுமுறைகள் குறித்து பல்வேறு விமர்சனங்கள் முன்வைக்கப்படுகின்றன.
த.வெ.க. மாநாட்டில் பங்கேற்ற தொண்டர்கள் கடும் வெயிலிலிருந்து தங்களை காத்துக்கொள்ள, நாற்காலிகளை தலைக்கு மேல் குடையாக பயன்படுத்திய புகைப்படங்கள் பரவலாக பகிரப்பட்டன. இது குறித்து பேசிய பல அரசியல் விமர்சகர்கள் மற்றும் ஊடகவியலாளர்கள், “இது ஒரு தற்குறி கூட்டம்” என்றும், “கூட்டத்தை நிர்வகிக்க போதிய ஏற்பாடுகள் இல்லை” என்றும் கடுமையாக விமர்சித்தனர்.
ஆனால், இதற்குப் பதிலடி கொடுக்கும் விதமாக, சமீபத்தில் கரூரில் திமுக நடத்திய முப்பெரும் விழாவிலும் இதேபோன்றதொரு சம்பவம் நிகழ்ந்ததாக கூறப்படுகிறது. கூட்டம் நடக்கும்போது மழை பெய்ததால், மழையில் நனையாமல் இருக்க, திமுக தொண்டர்களும் நாற்காலிகளை தலைக்கு மேல் வைத்துக் கொண்டதாக காணொலிகள் வெளியாகின. ஒரு அரசியல் கட்சியின் தொண்டர்கள் செய்யும் செயலை மற்ற கட்சியினர் விமர்சிப்பது, பின்னர் அதே தவறை தங்கள் கட்சி செய்தபோது மௌனம் காப்பது ஆகியவை அரசியல் hypocrisy-யை வெளிச்சம் போட்டுக் காட்டுவதாக விமர்சகர்கள் சுட்டிக்காட்டுகின்றனர். மேலும் இதுதான் கர்மா என்பது. நாம் என்ன சொல்கிறோமோ, அதுவே நமக்கும் வரும்.
அரசியல் கூட்டங்களில் திரளும் மக்கள் கூட்டத்தை பற்றிய விவாதங்கள் தொடர்கின்றன. சில விமர்சகர்கள், மாநாடுகளுக்கு ஒரு மணி நேரத்திற்கு முன்பு திரண்டு, கூட்டம் முடிந்தவுடன் விரைந்து கலைந்து செல்லும் நபர்கள், பணம் கொடுத்து அழைத்து வரப்பட்டவர்கள் என வாதிடுகின்றனர். இவர்களுக்கு கூட்டம் முடிந்தவுடன், பணம் கொடுக்கப்படும் என்பதால், அவர்கள் காத்திருக்க விரும்புவதில்லை எனக்கூறப்படுகிறது.
ஆனால், ஒரு தலைவருக்காக ஆறு மணி நேரம் காத்திருந்து, கடும் வெயிலிலும் தொடர்ந்து அவர் பேச்சை கேட்கும் கூட்டம், தானாகவே ஆர்வத்துடன் வந்த கூட்டம் என கூறப்படுகிறது. இந்த இரண்டு விதமான கூட்டங்களுக்கும் இடையே உள்ள வித்தியாசம், ஒரு கட்சியின் அடித்தள பலத்தை காட்டுகிறது.
சமீபத்தில் நடைபெற்ற மாநாடுகள் குறித்து, “திமுக 200 இடங்களில் வெற்றி பெற போகிறது” என்று சிலர் நம்பிக்கை தெரிவித்தனர். ஆனால், அதே சமயம், இந்த கூட்டம் உடனடியாக கலைந்துவிட்டதைக் காரணம் காட்டி, “திமுகவுக்கு இது ஒரு பின்னடைவு” என்றும் பலர் விமர்சித்தனர்.
மக்கள் நல்லதை உணர்ந்து திமுகவுக்கு மீண்டும் வாக்களிப்பார்களா, அல்லது எதிர்க்கட்சிகள் மக்களை சென்றடைய தவறிவிட்டதால் மீண்டும் திமுகவே ஆட்சிக்கு வருமா என்பதை 2026 சட்டமன்றத் தேர்தல் முடிவுகள்தான் தீர்மானிக்கும். ஒரு அரசியல் கட்சி மக்களின் தேவைகளை பூர்த்தி செய்யும் போது, மக்கள் ஆதரவு இயற்கையாகவே கிடைக்கும் என்றும், சுயநலத்துடன் செயல்படும் கட்சிகள் மக்களிடையே ஆதரவை இழக்கும் என்றும் அரசியல் பார்வையாளர்கள் கருதுகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
