பிரபல தொலைக்காட்சி நகைச்சுவை நடிகர் ரோபோ சங்கர், திடீர் உடல்நலக்குறைவால் காலமான செய்தி தமிழக மக்களையும், திரையுலகினரையும் மிகுந்த அதிர்ச்சியில் ஆழ்த்தியுள்ளது. உடல்நலக் குறைவால் மருத்துவமனையில் சிகிச்சை பெற்று வந்த அவர், சிகிச்சை பலனின்றி நேற்றிரவு உயிரிழந்தார்.
கடந்த சில நாட்களாக உடல்நலக் குறைவால் பாதிக்கப்பட்டு மருத்துவமனையில் அனுமதிக்கப்பட்டிருந்த ரோபோ சங்கர், நேற்று தீவிர சிகிச்சை பிரிவுக்கு மாற்றப்பட்டார். இந்நிலையில், சிகிச்சை பலனின்றி அவரது உயிர் பிரிந்தது.
மறைந்த நடிகர் ரோபோ சங்கரின் உடலுக்கு தமிழக துணை முதலமைச்சர் உதயநிதி ஸ்டாலின் நேரில் அஞ்சலி செலுத்தினார். எதிர்க்கட்சித் தலைவர் எடப்பாடி பழனிசாமி உட்பட பலரும் தங்கள் இரங்கல் செய்திகளை வெளியிட்டு வருகின்றனர்.
எடப்பாடி பழனிசாமி தனது இரங்கல் செய்தியில், “தனது இயல்பான நகைச்சுவை உணர்வால் ரசிகர்களை ஈர்த்த அன்புச் சகோதரர் ரோபோ சங்கரின் இழப்பு ஈடு செய்ய முடியாத பேரிழப்பு” என்று குறிப்பிட்டுள்ளார்.
நடிகர் சிம்பு தனது இரங்கல் செய்தியில், “எப்போதும் சிரிப்பை பரிமாறிய ஒரு மனிதரை இப்படி இழந்து விடுவது வேதனை. அவர் மறைவு திரை உலகிற்கும் ரசிகர்களின் இதயங்களுக்கும் பெரும் இழப்பு. என்றும் நம்முள் வாழும் அவரின் சிரிப்புகள் நினைவாகவே இருக்கும்” என்று தெரிவித்துள்ளார்.
மதுரையை சொந்த ஊராக கொண்ட ரோபோ சங்கர், விஜய் டிவியில் ஒளிபரப்பான ‘கலக்கப்போவது யாரு’ நிகழ்ச்சி மூலம் பிரபலமானார். தனது தனித்துவமான நகைச்சுவையால் ரசிகர்களை கவர்ந்து, பல ஆண்டுகளாக விஜய் தொலைக்காட்சியில் காமெடி நிகழ்ச்சிகளில் பங்கேற்றார்.
சின்னத்திரையில் கிடைத்த புகழ், அவரை வெள்ளித்திரைக்கும் அழைத்து சென்றது. அவர் நடித்த திரைப்படங்களில், தனுஷ் நடித்த ‘மாரி’ திரைப்படம் அவருக்கு பெரிய அளவில் புகழைப் பெற்றுத் தந்தது. மேலும், ‘வேலைன்னு வந்துட்டா வெள்ளைக்காரன்’, ‘சிங்கம் 3’, ‘விஸ்வாசம்’ போன்ற படங்களிலும் அவர் நகைச்சுவை கதாபாத்திரங்களில் நடித்து, ரசிகர்களின் மனதில் இடம்பிடித்தார்.
கடந்த ஆண்டு ரோபோ சங்கர் மஞ்சள் காமாலை நோயால் கடுமையாக பாதிக்கப்பட்டார். இதன் காரணமாக அவரது உடல் எடை குறைந்து மிகவும் மெலிந்து காணப்பட்டார். அந்த நோயிலிருந்து மீண்டு வந்த பிறகு மீண்டும் நடிக்க தொடங்கிய நிலையில், கடந்த செவ்வாய்க்கிழமை திடீரென ரத்த வாந்தி எடுத்து மயங்கி விழுந்தார். உடனடியாக மருத்துவமனையில் அனுமதிக்கப்பட்ட அவருக்கு சிகிச்சை அளிக்கப்பட்ட போதிலும், சிகிச்சை பலனின்றி உயிர் பிரிந்தது.
தனது நகைச்சுவையால் பலரை கவர்ந்த ஒரு கலைஞனின் திடீர் மறைவு, கலை உலகிற்கும் அவரது ரசிகர்களுக்கும் ஒரு பெரும் சோகத்தை ஏற்படுத்தியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
