தமிழ்நாடு அரசியல் களம், நடிகர் விஜய்யின் பிரசார பயணத்தால் பெரும் பரபரப்படைந்துள்ளது. “தமிழக வெற்றிக் கழகம்” என்ற பெயரில் அரசியல் கட்சியை தொடங்கியுள்ள விஜய், சட்டமன்ற தேர்தலை முன்னிட்டு பிரசாரம் செய்யத் தயாராகி வருகிறார். இந்த சூழ்நிலை ஆளும் கட்சியான தி.மு.க.வுக்கு பெரும் சவாலாக மாறியுள்ளது. விஜய்யின் பிரசாரத்தை தடுத்தாலும் ஆபத்து, அப்படியே விட்டாலும் ஆபத்து என்ற இக்கட்டான நிலையில் தி.மு.க. இருப்பதே இதற்கு காரணம்.
விஜய்யின் பிரசாரப் பயணத்திற்கு அனுமதி மறுக்கப்பட்டாலோ அல்லது அவருக்கு தடைகள் ஏற்படுத்தப்பட்டாலோ, அது தி.மு.க. அரசுக்கு எதிராக பொதுமக்களிடம் ஒருவிதமான அனுதாப அலையை உருவாக்கும். “ஆளுங்கட்சி தனது செல்வாக்கு குறையும் என்ற அச்சத்தில், வளர்ந்து வரும் ஒரு தலைவரின் பிரசாரத்தைத் தடுக்கிறது” என்ற விமர்சனங்கள் எழும். இது தி.மு.க. மீது எதிர்மறையான பிம்பத்தை ஏற்படுத்தும்.
மேலும், விஜய்யின் கட்சி, சட்ட ரீதியாக இந்த நடவடிக்கையை எதிர்த்து நீதிமன்றம் செல்ல வாய்ப்புள்ளது. ஏற்கெனவே, உயர் நீதிமன்றத்தில் விஜய்யின் பிரசாரத்திற்கு அனுமதி கோரி வழக்கு தொடரப்பட்டுள்ளது. இந்த வழக்கில், காவல்துறை அனுமதி வழங்க நீதிபதி உத்தரவிட்டால், அது தி.மு.க. அரசுக்கு ஒரு சட்டரீதியான பின்னடைவாக அமையும். இது, தி.மு.க. அரசுக்கு சங்கடத்தை ஏற்படுத்தும்.
ஒருவேளை, தி.மு.க. அரசு விஜய்யின் பிரசாரத்திற்கு தடையில்லாமல் அனுமதி வழங்கினால், அதுவும் ஒரு பெரிய சவாலாகும். விஜய்யின் பொதுக்கூட்டங்களுக்கு லட்சக்கணக்கான மக்கள் திரளும் வாய்ப்பு அதிகம். இது ஊடகங்களில் பெரிய அளவில் கவனம் பெறும். அப்போது, ஊடகங்களும் சமூக வலைத்தளங்களும், “விஜய்தான் அடுத்த முதலமைச்சர்” என்று ஒரு பிம்பத்தை உருவாக்குவார்கள்.
விஜய்யின் பிரசாரத்தில் மக்கள் கூட்டம் அதிகம் கூடினால், அது ஆளும் கட்சிக்கு மக்கள் மத்தியில் ஆதரவு குறைந்துவிட்டது என்ற தோற்றத்தை ஏற்படுத்தும். இது, தி.மு.க. தொண்டர்களிடையே மனச்சோர்வை ஏற்படுத்தி, அவர்களின் தேர்தல் பணிகளை பாதிக்கும்.
மேலும், தமிழ்நாட்டில் தொடர்ந்து இரண்டாவது முறையாக ஆட்சி அமைப்பதில் தி.மு.க.வுக்கு ஒரு சென்டிமென்ட் தடையாக உள்ளது. திமுகவில் இருந்து எம்ஜிஆர் பிரிந்து அதிமுக என்ற கட்சி ஆரம்பித்தவுடன், 50 ஆண்டுகால தேர்தல் வரலாற்றில், தி.மு.க. எந்த ஒரு தேர்தலிலும் தொடர்ச்சியாக இரண்டாவது முறை வெற்றி பெற்று ஆட்சி அமைத்ததில்லை. இந்த சென்டிமென்ட் மீண்டும் பலித்துவிடுமோ என்ற கலக்கம் தி.மு.க. தலைமைக்கு உள்ளது. இந்த சூழ்நிலையில், விஜய்யின் பிரசாரம் மேலும் அந்த சென்டிமென்ட்டை வலுப்படுத்தும் என்ற அச்சம் ஆளும் கட்சிக்கு ஏற்பட்டுள்ளது.
மொத்தத்தில், விஜய்யின் பிரசாரத்தை தி.மு.க. எவ்வாறு கையாளப்போகிறது என்பதை பொறுத்து, தமிழ்நாட்டின் அடுத்த சட்டமன்ற தேர்தல் களம் முழுமையாக மாறிவிடும் என்பது அரசியல் பார்வையாளர்களின் கருத்தாக உள்ளது. விஜய்யின் பிரசாரத்தை கிரிக்கெட்டில் ஒரு வலுவான பந்துவீச்சாளரின் பந்தை “தொட்டாலும் கேட்ச், விட்டாலும் போல்டு” என்ற நிலையில் தி.மு.க. உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
