அதிமுக மூத்த தலைவர் செங்கோட்டையன், கட்சியில் தனக்கிருந்த பொறுப்புகளிலிருந்து நீக்கப்பட்ட சில நாட்களிலேயே, டெல்லிக்கு சென்று மத்திய உள்துறை அமைச்சர் அமித்ஷா, நிதியமைச்சர் நிர்மலா சீதாராமன் உள்ளிட்ட பாஜக தலைவர்களை சந்தித்ததாக தகவல்கள் வெளியாகி, தமிழக அரசியலில் பெரும் பரபரப்பை ஏற்படுத்தியுள்ளது. இந்த சந்திப்பு, அதிமுக மற்றும் பாஜக கூட்டணிக்குள் பிளவை ஏற்படுத்துமா என்ற விவாதத்தை உருவாக்கியுள்ளது.
பொதுவாக, டெல்லிக்குச் சென்று மத்திய அமைச்சர்களை சந்திப்பது ஒரு வழக்கமான செயல். ஆனால், செங்கோட்டையன் நீக்கப்பட்ட உடனேயே இந்த சந்திப்பு நடந்திருப்பது பல கேள்விகளை எழுப்பியுள்ளது. இது அதிமுக தலைமைக்கு ஒருவித எச்சரிக்கையாக இருக்கலாம் என சில அரசியல் நோக்கர்கள் கருதுகின்றனர். இருப்பினும், பாஜக தலைவர்களின் நோக்கம் அதிமுகவை உடைப்பதாக இருக்காது என்றும், மாறாக, கட்சிக்குள் ஒற்றுமையை வலியுறுத்துவதாகவும் இருக்கலாம் என பல அரசியல் வல்லுநர்கள் கருத்துத் தெரிவிக்கின்றனர்.
அதிமுக-பாஜக கூட்டணி இணைந்து தேர்தலை சந்தித்தபோதுதான், தமிழகத்தில் திமுகவிற்கு வலுவான ஒரு போட்டி உருவானது. இந்த கூட்டணி உடைந்தால், அது திமுகவின் வெற்றியை மேலும் எளிதாக்கிவிடும் என்பதை பாஜக தலைமை நன்கு உணர்ந்துள்ளது.
தமிழக பாஜக தலைவர் அண்ணாமலை, பலமுறை அதிமுக பொதுச்செயலாளர் எடப்பாடி பழனிசாமியை முதலமைச்சர் வேட்பாளராக குறிப்பிட்டார். “திமுகவை வீழ்த்த ஒரே வழி, ஈபிஎஸ் தலைமையில் வலுவான கூட்டணி அமைப்பதுதான்” என்று அண்ணாமலை வெளிப்படையாகவே கூறியது, பாஜகவின் நோக்கத்தை உறுதிப்படுத்துகிறது.
செங்கோட்டையன் நீக்கப்பட்டபோது, ஈரோட்டில் செய்தியாளர்களை சந்தித்தபோது, “எனக்கு மகிழ்ச்சிதான், எல்லாவற்றையும் காலம் சொல்லும்” என்று சவால் விடும் தொனியில் பேசினார். ஆனால், டெல்லி சென்று வந்த பிறகு, அவரது தொனி மாறியுள்ளது. இது, பாஜக தலைவர்கள் அவருக்கு அளித்த அறிவுரையின் காரணமாக இருக்கலாம். அமைதியை கடைப்பிடிக்குமாறும், கட்சி நலனுக்காக செயல்படுமாறும் அவருக்கு அறிவுரை வழங்கப்பட்டிருக்கலாம்.
அதிமுகவை உடைப்பது பாஜகவின் நோக்கம் அல்ல என்று அரசியல் ஆய்வாளர்கள் கூறுகின்றனர். ஏனெனில், அதிமுகவை உடைப்பது பாஜகவுக்கு எந்த வகையிலும் உதவாது. ஒருவேளை, அதிமுகவின் வாக்குகள் சிதறினால், அதன் பலனை திமுகவே பெறும். இந்த உண்மை பாஜக தலைமைக்கு நன்கு தெரியும். எனவே, செங்கோட்டையன் போன்ற மூத்த தலைவர்களைச் சந்திப்பதன் மூலம், கட்சிக்குள் இருக்கும் கருத்து வேறுபாடுகளை தீர்த்து, கூட்டணியை மேலும் வலுப்படுத்துவதே பாஜகவின் உண்மையான நோக்கமாக இருக்கலாம்.
மேலும், செங்கோட்டையன், ஓபிஎஸ், டிடிவி தினகரன், சசிகலா போன்றோர்கள் தனி அணி அமைக்க பாஜக மறைமுகமாக ஆதரவு கொடுப்பது தெரிந்தால், அதிமுகவின் எடப்பாடி பழனிசாமி, பாஜகவை கூட்டணியில் இருந்து வெளியேற்றவும் தயங்க மாட்டார். அதிமுக கூட்டணி இல்லையெனில், பாஜகவால் மீண்டும் நோட்டாவை தாண்ட முடியாது. எனவே பாஜக இந்த விஷயத்தில் ஆழமாக யோசித்து ஒரு சரியான முடிவை எடுக்கும் என எதிர்பார்க்கப்படுகிறது.
ஒருவேளை செங்கோட்டையனை அமித்ஷா சந்தித்ததால், ஈபிஎஸ் அதிருப்தி அடைந்து பாஜகவை கூட்டணியில் இருந்து வெளியேற்றினால் விஜய்யின் தவெகவுக்கு தான் ஜாக்பாட் ஆகும். ஏற்கனவே அதிமுக கூட்டணிக்கு எந்த கட்சியும் வரவில்லை, அதிமுகவும் சிதறியுள்ளதால் உண்மையான போட்டி திமுகவுக்கும் தவெகவுக்கும் தான் இருக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
