இந்திய பிரதமர் நரேந்திர மோடியின் சமீபத்திய ஜப்பான் பயணம், இரு நாடுகளுக்கும் இடையிலான உறவுகளில் ஒரு புதிய அத்தியாயத்தை தொடங்கியுள்ளது. இந்த பயணத்தின்போது, இரு நாடுகளின் தலைவர்களும் பல வரலாற்று சிறப்புமிக்க புரிந்துணர்வு ஒப்பந்தங்களை பரிமாறிக்கொண்டனர். இது, பாதுகாப்பு, தொழில்நுட்பம், மற்றும் இரு நாட்டு மக்கள் இடையேயான உறவுகளை வலுப்படுத்துவதை நோக்கமாகக் கொண்டுள்ளது.
முக்கிய ஒப்பந்தங்களும் ஒத்துழைப்புத் துறைகளும்
பிரதமர் மோடியின் இந்த பயணத்தின்போது, எதிர்காலத்திற்கான ஒரு கூட்டு தொலைநோக்கு பார்வை வெளியிடப்பட்டது. அதன் முக்கிய அம்சங்கள் பின்வருமாறு:
1. பாதுகாப்பு ஒத்துழைப்பு: இரு நாடுகளின் பாதுகாப்பு கூட்டாண்மையை மேலும் ஆழமாக்குவதற்கான முக்கிய முடிவுகள் எடுக்கப்பட்டன. இது பிராந்திய அமைதி மற்றும் பாதுகாப்பிற்கு பங்களிக்கும்.
2. இந்தியா-ஜப்பான் டிஜிட்டல் கூட்டாண்மையை 2.0: தொழில்நுட்பத் துறையில் புதிய ஒத்துழைப்பை ஏற்படுத்தும் வகையில், ‘இந்தியா-ஜப்பான் டிஜிட்டல் கூட்டாண்மையை 2.0’ தொடங்கப்பட்டது. இது டிஜிட்டல் மயமாக்கல் மற்றும் தகவல் தொழில்நுட்ப துறையில் புதிய வாய்ப்புகளை உருவாக்கும்.
3. செமிகண்டக்டர் மற்றும் செயற்கை நுண்ணறிவு: உலக அளவில் முக்கியமானதாக கருதப்படும் செமிகண்டக்டர் மற்றும் செயற்கை நுண்ணறிவு (AI) துறைகளில் ஒத்துழைப்பை அதிகரிக்க ஒப்பந்தங்கள் கையெழுத்தாகின. இது இரு நாடுகளின் தொழில்நுட்ப வளர்ச்சிக்கு உதவும்.
4. பசுமை மற்றும் நிலைத்த எரிசக்தி: சுற்றுச்சூழலுக்கு உகந்த மற்றும் நிலைத்த எரிசக்தி ஆதாரங்களை மேம்படுத்துவதற்கான திட்டங்களில் இணைந்து செயல்பட இரு நாடுகளும் ஒப்புக்கொண்டன. இது எதிர்கால எரிசக்தி தேவைகளை பூர்த்தி செய்வதற்கான ஒரு முக்கியமான நடவடிக்கையாகும்.
5. ரூ.10 டிரில்லியன் யென் முதலீட்டு இலக்கு
ஜப்பான், இந்தியாவில் 10 டிரில்லியன் யென் முதலீடு செய்ய இலக்கு நிர்ணயித்துள்ளது. இந்த மாபெரும் முதலீடு, இந்தியாவின் உள்கட்டமைப்பு மற்றும் வளர்ச்சி திட்டங்களுக்கு பெரும் உந்துதலை அளிக்கும். இது இரு நாடுகளுக்கும் இடையிலான பொருளாதார உறவுகளை மேலும் வலுப்படுத்தும் ஒரு முக்கியமான படியாகும்.
பிரதமர் மோடியின் இந்தப் பயணம், வெறுமனே பொருளாதார மற்றும் பாதுகாப்பு ஒப்பந்தங்களை கடந்து, கலாச்சார மற்றும் மக்கள் இடையேயான உறவுகளையும் மேம்படுத்துவதை நோக்கமாக கொண்டிருந்தது. இரு நாடுகளின் தலைவர்களும் தங்கள் உரையில், இந்த கூட்டாண்மை புதிய சகாப்தத்தின் தொடக்கம் என தெரிவித்தனர். இரு நாட்டு தலைவர்களின் உரைகள் இதோ:
ஜப்பான் பிரதமர் உரையில், “இந்தியா–ஜப்பான் நட்பு 6ஆம் நூற்றாண்டில் புத்தமதம் வழியாக தொடங்கியது. இன்று உலகின் மிகப்பெரிய மக்கள் தொகையுடன் இந்தியா அதிவேக வளர்ச்சியை எட்டுகிறது. ஜப்பானின் தொழில்நுட்பமும் இந்தியாவின் புதுமையும் இணைந்தால், எதிர்கால சவால்களை சமாளிக்கலாம். உயர் வேக ரயில், அடுத்த தலைமுறை போக்குவரத்து, பசுமை எரிசக்தி, விண்வெளி ஆராய்ச்சி போன்ற துறைகளில் இணைந்து செயல்படுவோம்” என்று குறிப்பிட்டார்.
பிரதமர் மோடி அவர்கள் பதிலுரையில், “ஜப்பானின் அன்பான வரவேற்புக்கு நன்றி. உலகின் இரண்டு பெரிய ஜனநாயக நாடுகளாகிய இந்தியா–ஜப்பான் கூட்டாண்மை உலக அமைதி மற்றும் நிலைத்தன்மைக்கு அத்தியாவசியம். அடுத்த 10 ஆண்டுகளுக்கான சாலை வரைபடம் தயாரிக்கப்பட்டுள்ளது. 10 டிரில்லியன் யென் முதலீட்டை ஜப்பான் இந்தியாவில் மேற்கொள்ளும். சிறு, நடுத்தர நிறுவனங்கள், ஸ்டார்ட்அப்புகள், செயற்கை நுண்ணறிவு, செமிகாண்டக்டர், டிஜிட்டல் கூட்டாண்மை ஆகிய துறைகள் முன்னுரிமை பெறும்” என்றார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
