தமிழக அரசியல் களம் தற்போது பல பரபரப்பான நிகழ்வுகளை சந்தித்து வருகிறது. தேர்தலுக்கான கூட்டணி பேச்சுவார்த்தை. தமிழகத்தில் திமுகவின் நிலை, மற்றும் நடிகர் விஜய்யின் தமிழக வெற்றிக் கழகம் ஆகியவை குறித்து பல்வேறு கேள்விகள் எழுந்துள்ளன. இந்த நிலையில் பீகாரில் ராகுல் காந்தி கலந்துகொண்ட கூட்டத்தில் தமிழக முதல்வர் ஸ்டாலின் பங்கேற்றது, தமிழக அரசியல் வட்டாரத்தில் பெரும் விவாதத்தை ஏற்படுத்தியுள்ளது.
ராகுல் காந்தி கூட்டத்தில் ஸ்டாலின்: காங்கிரஸ் கூட்டணியில் பிளவு?
காங்கிரஸ் கட்சி, திமுக கூட்டணியில் இருந்து பிரிந்து, தவெகவுடன் கூட்டணிக்கு செல்லும் என பரபரப்பாக பேச்சுவார்த்தை நடந்து கொண்டிருப்பதாக கூறப்படும் நிலையில், திடீரென பீகாரில் ராகுல் காந்தி கூட்டத்தில் முதல்வர் ஸ்டாலின் பங்கேற்றது முக்கியத்துவம் வாய்ந்ததாக பார்க்கப்படுகிறது. காங்கிரஸ் கட்சி, திமுகவுடனான கூட்டணியை விட்டு விலகி விஜய்யின் தவெக பக்கம் செல்வதை தடுக்கவே ஸ்டாலினின் இந்த திடீர் பயணம் என்றும் கூறப்படுகிறது.
ஆனால், சோனியா காந்திக்கு விஜய்யுடன் கூட்டணி வைப்பதில் விருப்பம் இல்லை என தெரிகிறது. இதுகுறித்து, காங்கிரஸ் எம்.பி.க்கள் ராகுல் காந்தியிடம் பேசி, அவர் மனதை மாற்ற முயற்சி செய்து வருவதாகவும் கூறப்படுகிறது. இது, தமிழகத்தில் காங்கிரஸ் கட்சியின் அரசியல் நிலைப்பாடு குறித்த குழப்பத்தை அதிகரித்துள்ளது.
விஜய்யின் அசைக்க முடியாத நம்பிக்கை
கூட்டணி விவகாரங்கள் குறித்து பலதரப்பிலும் விவாதிக்கப்பட்டு வந்தாலும், நடிகர் விஜய் தனது அரசியல் களப்பணிகளில் உறுதியுடன் இருக்கிறார். எந்த கட்சி தங்களுக்கு ஆதரவளித்தாலும், இல்லாவிட்டாலும், மக்களை நோக்கி செல்வோம் என்று அவர் தனது ஆதரவாளர்கள் மத்தியில் தெரிவித்துள்ளார்.
“காங்கிரஸ் வந்தாலும் வராவிட்டாலும் களத்தை சந்திப்போம்.”
“எந்த கட்சியும் வரவில்லை என்றாலும் மக்களை நோக்கி செல்வோம்.”
“மக்கள் முடிவு செய்தால் ஆட்சி மாற்றம் நிச்சயம்.”
“முதல்முறையாக மக்கள் இந்த தேர்தலில் ஒரு புரட்சி செய்வார்கள்.” என விஜய் தனக்கு நெருக்கமானவர்களிடம் கூறி வருவதாகவும் செய்தி வெளியாகியுள்ளது.
இந்த கூற்றுகள், விஜய் தனிக்கட்சியாகக் களம் இறங்குவதற்கான உறுதியான நம்பிக்கையை காட்டுகிறது. கூட்டணியை நம்பாமல், நேரடியாக மக்களை சந்திப்பது என்ற விஜய்யின் வியூகம், தமிழக அரசியலில் ஒரு புதிய பரிமாணத்தை உருவாக்கும் என எதிர்பார்க்கப்படுகிறது.
அரசியல் தலைவர்கள் மத்தியில் நிலவும் குழப்பங்களையும், தயக்கங்களையும் பொருட்படுத்தாமல், விஜய் தனது அரசியல் பயணத்தில் தொடர்ந்து முன்னேறி கொண்டிருக்கிறார். இந்த சூழல், தமிழகத்தில் அடுத்து வரவிருக்கும் சட்டமன்ற தேர்தல், பல்வேறு எதிர்பாராத திருப்பங்களை கொண்டிருக்கும் என்பதற்கான அறிகுறியாகவே உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
