அரசியலில் வெற்றி பெற, பெரிய கூட்டணிகளை அமைப்பதுதான் முக்கியம் என்று பெரும்பாலானோர் நம்புகின்றனர். ஆனால், இந்த எண்ணம் தவறு என்று தமிழக வெற்றி கழகத்தின் தலைவர் நடிகர் விஜய் தனது நிர்வாகிகளுக்கு அறிவுறுத்தியுள்ளதாக கூறப்படுகிறது. மக்கள் கூட்டணியை நம்பி செயல்பட்டாலே வெற்றி நிச்சயம் என்றும் அவர் கூறியுள்ளார்.
விஜய் அளித்த முக்கிய ஆலோசனைகள்.. கூட்டணியை நம்பாதீர்:
“கூட்டணிக் கட்சிகளின் பலத்தால் ஓரளவுக்கு வெற்றி கிடைத்தாலும், மக்களின் ஆதரவுதான் வெற்றியை தீர்மானிக்கும். எந்த கட்சியிலும் சேராத நடுநிலை வாக்காளர்களே ஒரு தேர்தலின் முடிவை மாற்றியமைக்கிறார்கள். எனவே, பெரிய கூட்டணிகளை நம்பி செயல்பட வேண்டாம்” என்று விஜய் அறிவுறுத்தியுள்ளார்.
மக்களுடன் நெருங்கிப் பழகுதல்:
நிர்வாகிகளுடன் நடத்திய ஆலோசனையில், “மக்களோடு மக்களாக பழகுங்கள். அவர்களின் பிரச்சினைகளை காது கொடுத்துக் கேளுங்கள். முடிந்தவரை சிறிய பிரச்சினைகளுக்கு உடனடியாக தீர்வு காணுங்கள். மக்கள் நம் கட்சியை நம்ப தொடங்கிவிட்டால், வெற்றி எளிதாகக் கிடைக்கும்” என்று விஜய் கூறியுள்ளார்.
நேரடி சந்திப்பு:
“சின்னச் சின்ன கிராமங்களிலும் மக்களை நேரடியாகச் சந்தியுங்கள். ‘புதிய கட்சி ஆரம்பித்துள்ளோம், உங்கள் பிரச்சினைகளை எங்களிடம் கூறுங்கள், நாங்கள் தீர்த்து வைக்கிறோம்’ என்று கூறுங்கள். சிலருக்கு தங்கள் பகுதியில் என்ன பிரச்சினை என்று தெரியாமல்கூட இருக்கலாம். அத்தகைய பிரச்சினைகளை எடுத்துச் சொல்லி, ’50 ஆண்டுகளாக இந்தத் தீர்க்கப்படாத பிரச்சினையை, நாங்கள் இப்படித் தீர்ப்போம்’ என்று விளக்கங்கள் கொடுங்கள். மக்களை நேரில் சந்தித்து அவர்களுக்கு நம்பிக்கை தரும் வகையில் பேசினாலே போதும், நமக்கு வெற்றி நிச்சயம்” என்றும் அவர் கூறியதாகத் தெரிகிறது.
மக்கள் புரட்சிக்கான திட்டம்
மதுரை மாநாடு முடிந்த பிறகு, தமிழக வெற்றிக் கழகத்தின் தலைவர் விஜய்யும் களத்தில் இறங்கி, மக்களோடு மக்களாகப் பணியாற்ற தயாராகி வருகிறார். அவருடைய இந்த அணுகுமுறை நிச்சயம் மக்கள் மத்தியில் ஒரு நற்பெயரை பெற்று கொடுக்கும் என எதிர்பார்க்கப்படுகிறது. மக்களின் பிரச்சினைகளைக் கேட்டு அறிந்து, அவற்றை தலைமைக்கு அனுப்பிவைக்கவும் நிர்வாகிகள் அறிவுறுத்தப்பட்டு உள்ளது. தலைமை, அந்தப் பிரச்சினைகளுக்கு எவ்வாறு தீர்வு காணலாம் என்று ஆலோசனை நடத்தி, உடனடி தீர்வு மற்றும் நீண்டகால தீர்வுக்கான வழிமுறைகளை வகுத்து செயல்படுத்தும்.
மொத்தத்தில், தமிழக வெற்றி கழகத்தின் தலைவர் விஜய், அரசியல் கூட்டணிகளை நம்பாமல் ‘மக்கள் கூட்டணியை’ நம்பி களமிறங்குகிறார். இது தமிழக அரசியலில் ஒரு ‘மக்கள் புரட்சியை’ ஏற்படுத்தும் என்று எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
