தமிழ் சினிமாவின் சூப்பர் ஸ்டார், ரஜினிகாந்த். அவரது அபார வளர்ச்சிக்கும், மாபெரும் வெற்றிக்கும் அவரது தனித்துவமான பாணியும், கடின உழைப்பும் முக்கிய காரணங்கள். ஆனால், அவர் ஒரு சூப்பர் ஸ்டாராக உருவெடுப்பதற்கு முன்னால், தனது ஆரம்ப நாட்களில் சந்தித்த அனுபவங்கள் பலருக்கும் ஆச்சரியமூட்டுபவை. குறிப்பாக, 1977 ஆம் ஆண்டு அவர் அளித்த ஒரு பேட்டியில், தனது ஆரம்பகால அனுபவங்கள் குறித்தும், ஒரே நாளில் மூன்று படங்களுக்கு ஒப்பந்தமான அதிசயம் குறித்தும் நெகிழ்ச்சியுடன் பகிர்ந்துள்ளார்.
ரஜினிகாந்த் ஃபிலிம் இன்ஸ்டிட்யூட்டில் கன்னட பிரிவில் பயின்று கொண்டிருந்தார். அப்போது, புகழ்பெற்ற இயக்குநர் கே. பாலசந்தர், தமிழ் நடிப்பு பிரிவுக்கு ஆசிரியராக வந்திருக்கிறார். பாலசந்தர் இரு பிரிவுகளின் வகுப்புகளையும் இணைத்து நடத்தி, நடிப்பு பாடங்களைச் சொல்லிக் கொடுத்துள்ளார்.
ரஜினிகாந்த் பாலசந்தரின் தீவிர ரசிகராக இருந்திருக்கிறார். “நான் பாலசந்தரின் ரசிகன். அவர் படங்களில் ஒன்றையும் பார்க்க தவறியதில்லை. அவர் என்னுடைய மானசீக குரு,” என்று ரஜினிகாந்த் குறிப்பிட்டுள்ளார்.
பாலசந்தரை முதன்முதலில் சந்தித்தபோது, ரஜினிகாந்தின் மனதில் ஒரு கேள்வி நீண்ட நாட்களாக இருந்திருக்கிறது. அதை அவர் நேரடியாக பாலசந்தரிடம் கேட்டுள்ளார். “நடிப்பைத் தவிர, நடிகர்களிடம் நீங்கள் வேறு என்ன எதிர்பார்க்கிறீர்கள்?” என்பதுதான் ரஜினிகாந்த் கேட்ட முதல் கேள்வி.
இதற்கு பாலசந்தர், “நடிகர்கள் திரைப்படத்துக்கு வெளியே நடிக்க கூடாது!” என்று பளிச்சென்று பதில் அளித்திருக்கிறார். இதுதான் ரஜினிகாந்த் மற்றும் கே. பாலசந்தர் இடையேயான முதல் அறிமுகமாக அமைந்தது. ரஜினிகாந்த் இன்று வரை பாலசந்தர் சொன்னதை கடைபிடித்து வருகிறார். அவர் திரைக்கு வெளியே ஒருநாளும் நடித்ததில்லை. இந்த வழக்கத்தை அவர் தனது வாழ்வில் பின்பற்றியதன் மூலம் எளிமையானவர் என்று அனைவரும் சொல்லும் வகையில் நடந்து கொண்டார்.
இந்த முதல் உரையாடலுக்குப் பிறகு, பாலசந்தர் ரஜினிகாந்திடம், “தமிழ் பேச வருமா?” என்று கேட்டிருக்கிறார். அதற்கு ரஜினிகாந்த், “கொஞ்சம் கொஞ்சம் தெரியும்” என்று பதில் அளித்துள்ளார். அதை கேட்ட பாலசந்தர், “நீங்கள் என்னை கலாகேந்திரா ஆபீஸில் வந்து பாருங்கள்” என்று கூறிவிட்டு சென்றுள்ளார்.
கலாகேந்திராவில் பாலசந்தரை சந்திக்கப் போனேன். ஏதாவது ஒரு காட்சியை நடித்துக் காட்ட சொன்னார் பாலசந்தர். அப்போது, எனக்கு தமிழ் சரளமாக பேச வராது. ஒரு கன்னட நாடகத்திலிருந்து ஒரு காட்சியை எடுத்து கொண்டு நடித்தேன். அவர் என்னுடைய நடிப்பை பார்த்து ’நீ முதலில் தமிழ் பேச கற்றுக் கொள். உனக்கு தமிழ் சினிமாவில் ஒரு சிறப்பான இடம் இருக்கிறது என்று கூறினார். ரஜினியை அன்றே அவர் கணித்திருந்தார்.
பாலசந்தரின் அறிவுரையை ஏற்று, தமிழ் கற்றுக்கொண்ட ரஜினிகாந்தின் திறமையையும், தனித்துவமான பாணியையும் பாலசந்தர் உடனடியாக அடையாளம் கண்டுகொண்டார். அதன் விளைவுதான், ஒரே நாளில் மூன்று படங்களுக்கு ரஜினிகாந்தை ஒப்பந்தம் செய்த அரிய நிகழ்வு. ரஜினிகாந்த் அந்தப் பேட்டியில் குறிப்பிட்டுள்ளார்: “‘அபூர்வ ராகங்கள்’, ‘மூன்று முடிச்சு’ ‘அவர்கள்’என அன்றே மூன்று படங்களில் ஒப்பந்தம் செய்தார்.”
இது ஒரு இளம் கலைஞனுக்கு கிடைத்த மிகப்பெரிய அங்கீகாரம். பொதுவாக, ஒரு அறிமுக நடிகர் ஒரு படம் ஒப்பந்தமாவதே பெரிய விஷயம். ஆனால், ரஜினிகாந்தின் தனித்துவமான நடிப்புத் திறன், ஸ்டைல் மற்றும் பாலசந்தர் போன்ற ஒரு தொலைநோக்கு பார்வை கொண்ட இயக்குநரின் நம்பிக்கை ஆகியவை ஒரே நாளில் அவருக்கு மூன்று பட வாய்ப்புகளைப் பெற்றுத் தந்தன.
‘அபூர்வ ராகங்கள்’ (1975): ரஜினிகாந்த் தனது சினிமா வாழ்க்கையைத் தொடங்கிய படம். இதில் சிறிய வேடமாக இருந்தாலும், தனது நடிப்பால் அனைவரின் கவனத்தையும் ஈர்த்தார்.
இந்த மூன்று படங்களும், ரஜினிகாந்த் எனும் நடிகனை தமிழ் சினிமாவுக்கு அறிமுகப்படுத்தியதுடன், அவரது எதிர்கால சூப்பர் ஸ்டார் பயணத்திற்கு அடித்தளமிட்டன. இந்த அனுபவம், ரஜினிகாந்தின் ஆரம்பகால போராட்டங்களையும், பின்னர் அவர் அடைந்த மகத்தான வெற்றியையும் நினைவூட்டுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
