அமெரிக்காவில் 2024-ஆம் ஆண்டு நடைபெற்ற தேர்தலில் டொனால்ட் டிரம்ப்புக்கு வாக்களித்த இளம் வாக்காளர்கள் பலர் தற்போது தங்கள் முடிவை எண்ணி வருந்துவதாக தகவல்கள் வெளியாகியுள்ளன. முன்பு, சட்டம் ஒழுங்கு மற்றும் எல்லை பாதுகாப்பு பற்றி டிரம்ப் பேசியபோது ஆரவாரம் செய்த அதே இளைஞர்கள், இப்போது புலம்பெயர்ந்தோரை நாடு கடத்தும் நடவடிக்கைகளால் தங்கள் குடும்பத்தினரோ, நண்பர்களோ அல்லது உடன் பணிபுரிபவர்களோ பாதிக்கப்பட்டபோது, “டிரம்ப் அவர்களை குறிப்பிட்டுத்தான் பேசினார் என நினைக்கவில்லை” என்று கூறுவதாக செய்திகள் தெரிவிக்கின்றன.
2020 தேர்தலில் இளம் வாக்காளர்களிடையே ஜோ பைடன் 24 புள்ளிகள் முன்னிலை பெற்றிருந்த நிலையில், 2024 தேர்தலில் கமலா ஹாரிஸ் வெறும் நான்கு புள்ளிகள் மட்டுமே முன்னிலை பெற்றார். இது டிரம்ப், 2020-ஐ விட 20 புள்ளிகள் கூடுதலாக இளம் வாக்காளர்களின் ஆதரவை பெற்றதைக் காட்டுகிறது. இந்த மாற்றத்திற்கு காரணம், குறிப்பாக இளம் ஆண்கள் மத்தியில் ஏற்பட்ட ஆதரவு. 2020-இல் இளம் ஆண்களில் 56% பேர் பைடனுக்கு வாக்களித்திருந்த நிலையில், 2024-இல் அதே சதவீதத்தினர் டிரம்ப்புக்கு வாக்களித்துள்ளனர்.
டிரம்ப் இளம் ஆண்களுக்கு, ‘பாரம்பரிய ஆண்களின் குணாதிசயங்களுக்காக வருந்த தேவையில்லை’ என்ற செய்தியை வழங்கினார். மேலும், ‘ஆண்மையை மீண்டும் சிறப்பானதாக மாற்றுவோம்’ போன்ற கருத்துகள் இளைஞர்களை ஈர்த்தன. இராணுவத்திலிருந்து திருநங்கைகளை விலக்குவது, பன்முகத்தன்மை, சமத்துவம், உள்ளடக்கம் போன்ற திட்டங்களை நீக்குவது போன்ற அவரது வாக்குறுதிகள், டிரம்ப்புக்கு வாக்களிப்பது ஒரு கலாச்சார போராட்டத்தின் ஒரு பகுதி என இளம் ஆண்கள் நம்புவதற்கு வழிவகுத்தது.
ஆனால், இப்போது இந்த நிலை மாறி வருவதாக தெரிகிறது. சமீபத்தில் வெளியான பியூ (Pew) ஆய்வின்படி, டிரம்ப்புக்கு வாக்களித்த 35 வயதுக்குட்பட்ட வாக்காளர்களிடையே அவரது ஆதரவு, பிப்ரவரியில் 92 சதவீதமாக இருந்த நிலையில், தற்போது 69 சதவீதமாக குறைந்துள்ளது. இது டிரம்ப்பின் ஆதரவு தளத்தில் எந்தவொரு வயதினரை விடவும் மிக அதிகமான சரிவு.
பொருளாதார நெருக்கடி: உற்பத்தி மற்றும் கட்டுமான துறைகளில் அதிக அளவில் வேலை இழப்புகள் ஏற்பட்டுள்ளன. இந்த துறைகளில் ஆண்களே அதிகம் பணிபுரிகின்றனர். அதேசமயம், பெண்கள் அதிகம் உள்ள சுகாதார துறையில் வேலைவாய்ப்புகள் அதிகரித்துள்ளன. 20 வயதுகளில் உள்ள இளைஞர்களிடையே வேலைவாய்ப்பின்மை அதிகரித்துள்ளது. மேலும், பணவீக்கம் மற்றும் வாடகை உயர்வு போன்ற பொருளாதாரச் சிக்கல்கள், டிரம்ப் வாக்குறுதியளித்த ‘பொருளாதார மேம்பாடு’ நடக்கவில்லை என்பதை அவர்களுக்கு உணர்த்தியுள்ளது.
எப்ஸ்டீன் விவகாரம்: எப்ஸ்டீன் விவகாரத்தில், டிரம்ப் அரசியல் எதிரிகளை அம்பலப்படுத்துவார் என்று எதிர்பார்த்த இளைஞர்களுக்கு ஏமாற்றமே மிஞ்சியுள்ளது. ‘டிரம்ப் எப்ஸ்டீன் ஆவணங்களை மறைக்கிறாரா?’ என்ற கேள்விகள் தற்போது அவர்களிடையே எழுந்துள்ளன.
இது, புலம்பெயர்ந்தோர் மீதான நடவடிக்கைகளை போலவே, டிரம்ப் பேசிய கடுமையான பேச்சுக்கள் தங்களுக்கு எதிராகவே திரும்புகின்றன என்பதை இளைஞர்கள் புரிந்துகொள்ள தொடங்கியுள்ளனர். தாங்கள் அதிக விலைவாசி உள்ள ஒரு நாட்டில் வாழ நேரிடும், வேலை வாய்ப்புகள் குறையும் அல்லது டிரம்ப் கொடுத்த வாக்குறுதிகள் பொய்யாகிவிடும் என்று அவர்கள் எதிர்பார்க்கவில்லை.
இதனால், டிரம்ப்புக்கு ஆதரவளித்த பல இளைஞர்களும், ‘தாங்கள் தவறாக வழிநடத்தப்பட்டிருக்கலாம்’ என்று சிந்திக்க தொடங்கியுள்ளனர். மேலும் பல இளைஞர்கள் எங்களுக்கு மோடி மாதிரி ஒரு அதிபர் வேண்டும் என சமூக வலைத்தளங்களில் பதிவு செய்து வருவது பரபரப்பை ஏற்படுத்தியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
