அமெரிக்காவின் தலைநகர் வாஷிங்டனில் உள்ள வெள்ளை மாளிகையிலிருந்து சில கட்டடங்கள் தொலைவில் நடந்த துணிச்சலான துப்பாக்கி சூடு சம்பவத்தில், மேற்கு வர்ஜீனியா தேசிய காவல்படையை சேர்ந்த இரண்டு வீரர்கள் சுடப்பட்டனர்.
இந்த சம்பவத்தில் பாதிக்கப்பட்ட காவல்படை வீரர்கள் கவலைக்கிடமான நிலையில் மருத்துவமனையில் அனுமதிக்கப்பட்டுள்ளனர். இந்த சம்பவத்தை குறிவைத்த துப்பாக்கிச் சூடு என்று வாஷிங்டன் மேயர் முரியல் பவுசர் மற்றும் எஃப்.பி.ஐ. இயக்குனர் காஷ் படேல் ஆகியோர் உறுதிப்படுத்தினர். ஆரம்பத்தில், மேற்கு வர்ஜீனியா ஆளுநர் பேட்ரிக் மோரிசி வீரர்கள் உயிரிழந்துவிட்டதாக தெரிவித்தார். எனினும், பின்னர் அவர் தனது அறிக்கையை திரும்பப் பெற்றுக்கொண்டு, அவர்களின் நிலை குறித்து முரண்பாடான தகவல்கள் வருவதாக குறிப்பிட்டார்.
இந்தச் சம்பவத்தின்போது சந்தேகத்திற்குரிய ஒரு நபரும் சுடப்பட்டார், ஆனால் அவரது காயங்கள் உயிருக்கு ஆபத்தில்லை என்று நம்பப்படுகிறது. காவல் துறையினர் கண்காணிப்பு வீடியோக்களை ஆய்வு செய்ததில், சந்தேக நபர் வீரர்களை அணுகி துப்பாக்கியை எடுத்தது தெரியவந்துள்ளது. சுடப்பட்ட வீரர்களில் குறைந்தது ஒருவர், துப்பாக்கிச் சூடு நடத்திய நபருடன் பதிலுக்கு சண்டையிட்டுள்ளார் என்றும் விசாரணையில் தெரியவந்துள்ளது. இந்த துப்பாக்கிச் சூட்டுக்கு காரணமானவரின் நோக்கம் குறித்து விசாரணை நடைபெற்று வருகிறது.
இந்த சம்பவத்தை தொடர்ந்து, அதிபர் டொனால்ட் டிரம்ப் நிர்வாகம் உடனடியாக மேலும் 500 தேசிய காவல்படை வீரர்களை வாஷிங்டனுக்கு அனுப்ப உத்தரவிட்டார். பாதுகாப்பு செயலாளர் பீட் ஹெக்செத் அதிபரின் கோரிக்கையின் பேரில் கூடுதல் வீரர்கள் அனுப்பப்படுவதாக தெரிவித்தார். தற்போது வாஷிங்டன் டி.சி-யில் மொத்தம் 2,188 வீரர்கள் பணியில் உள்ளனர்.
அதிபர் டிரம்ப், புளோரிடாவில் இருந்து வெளியிட்ட சமூக ஊடக அறிக்கையில், வீரர்களை சுட்ட மிருகம் கடுமையான விலையை கொடுக்க நேரிடும் என்று எச்சரித்ததுடன், தேசிய காவல்படைக்கு பாராட்டுகளையும் தெரிவித்துள்ளார். துணை அதிபர் ஜே.டி. வேன்ஸ் வீரர்களுக்காக பிரார்த்தனை செய்யுமாறு கேட்டுக்கொண்டதுடன், இது இராணுவ வீரர்கள் அமெரிக்காவின் வாள் மற்றும் கேடயம் என்பதை நினைவூட்டுகிறது என்று கூறினார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
