அமெரிக்க அதிபர் டொனால்ட் ட்ரம்ப், சீனாவுடனான வர்த்தக தடைகளை நீட்டிக்கும் உத்தரவில் கையெழுத்திட்டுள்ளார். எனவே இதன் மூலம் சீனாவுக்கு கூடுதல் வரி இப்போதைக்கு இல்லை என்பது உறுதியாகியுள்ளது. இந்த உத்தரவின்படி, இரு நாடுகளுக்கும் இடையேயான வர்த்தக ஒப்பந்தத்தை எட்டுவதற்கான காலக்கெடு 90 நாட்களுக்கு நீட்டிக்கப்பட்டுள்ளது. இதனால் உலக அரசியலில் பரபரப்பு ஏற்பட்டுள்ளது.
உயர்மட்டப் பேச்சுவார்த்தைகள் மற்றும் காலக்கெடு நீட்டிப்பு
கடந்த ஜூலை மாதத்தில், இரு நாடுகளின் உயர்மட்ட அதிகாரிகள் ஸ்டாக்ஹோமில் சந்தித்து, வர்த்தக தடைகள் குறித்த பேச்சுவார்த்தைகளை நடத்தனர். இந்த சந்திப்பை தொடர்ந்து, வர்த்தக தடைகள் குறித்த ஒப்பந்தம் எட்டப்படும் வரை காலக்கெடுவை நீட்டிப்பது குறித்து ஆராயப்பட்டது. இந்த பேச்சுவார்த்தைகள், வர்த்தகத் தடைகளை நீட்டிப்பதற்கான முடிவுக்கு வழிவகுத்தது.
வர்த்தகத் தடைகளின் நிலை
இந்த உத்தரவு கையெழுத்திடப்படாமல் இருந்திருந்தால், சீனப் பொருட்கள் மீதான அமெரிக்காவின் வரிகள் மூன்று இலக்கங்களுக்கு அதிகரித்திருக்கும். இதனால், இரு நாடுகளுக்கும் இடையேயான வர்த்தகம் முற்றிலும் பாதிக்கப்படும் அபாயம் இருந்தது. தற்போது, சீனாவிலிருந்து அமெரிக்காவிற்கு இறக்குமதி செய்யப்படும் பொருட்களுக்கு 30% வரி விதிக்கப்படுகிறது. இதற்கு பதிலடியாக, அமெரிக்காவிலிருந்து சீனாவுக்கு இறக்குமதி செய்யப்படும் பொருட்களுக்கு 10% வரியை சீனா விதித்துள்ளது.
ட்ரம்ப்பின் அழுத்தமும் எதிர்பார்ப்புகளும்
இந்த உத்தரவு கையெழுத்திடப்படுவதற்கு ஒரு நாள் முன்னதாக, சீனா அமெரிக்காவிலிருந்து சோயாபீன்ஸ் கொள்முதல்களை நான்கு மடங்காக அதிகரிக்க வேண்டும் என்று ட்ரம்ப் வலியுறுத்தியிருந்தார். அதேசமயம், ரஷ்யாவிலிருந்து எண்ணெய் இறக்குமதியை நிறுத்துமாறு சீனாவுக்கு அழுத்தம் கொடுத்துவரும் ட்ரம்ப், இந்த உத்தரவை மீறும் சீன நிறுவனங்கள் மீது கூடுதல் வரிகளை விதிக்கப்போவதாகவும் எச்சரித்துள்ளார்.
செய்தியாளர்கள் வர்த்தகத் தடையை நீட்டிப்பது குறித்து ட்ரம்ப்பிடம் கேட்டபோது, “என்ன நடக்கிறது என்று பார்ப்போம். அவர்கள் மிகவும் சிறப்பாக செயல்பட்டு வருகிறார்கள். அதிபர் ஜி ஜின்பிங் மற்றும் எனக்கும் இடையேயான உறவு மிகவும் நன்றாக உள்ளது” என்று பதிலளித்தார். இரு நாடுகளும் வர்த்தகக் கொள்கையில் ஒருமித்த கருத்தை எட்டுவதற்காக பல முயற்சிகளை மேற்கொண்டுள்ளன. இந்த நீட்டிப்பு, இரு நாடுகளுக்கும் இடையேயான வர்த்தக பதற்றத்தைக் குறைத்து, ஒரு ராஜதந்திர தீர்வுக்கான வாய்ப்பை வழங்குகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
