உலகிலேயே மிகப்பெரிய கார் சந்தையாக விளங்கும் சீனாவில், வெளிநாட்டு ஆடம்பர கார்களுக்கான தேவை குறைந்து வருவதாக அதிர்ச்சி தகவல் வெளியாகியுள்ளது.
பொருளாதாரம் மந்தமடைந்துள்ளதால், சீன வாடிக்கையாளர்கள் அதிக விலை கொண்ட ஆடம்பர பொருட்களை வாங்குவதை தவிர்க்க தொடங்கியுள்ளனர். 300,000 யுவானுக்கு மேல் விலை கொண்ட பிரீமியம் கார்களுக்கான ஆர்வம் வெகுவாக குறைந்திருக்கிறது.
சீனாவில் நீடித்து வரும் அசையா சொத்து சந்தை வீழ்ச்சி, பல குடும்பங்களின் செல்வத்தையும், நுகர்வோர் நம்பிக்கையையும் கடுமையாக பாதித்துள்ளது. இதன் விளைவாக, பணக்கார வாடிக்கையாளர்கள் கூட பொது இடங்களில் தங்கள் செல்வ செழிப்பை காட்ட தயங்குகின்றனர். இந்த எச்சரிக்கை மனப்பான்மை, முன்பு வேகமாக வளர்ந்து வந்த பிரீமியம் கார் சந்தையில் தற்போது குறையும் அறிகுறிகளை காட்ட தொடங்கியுள்ளதாக ஆய்வாளர்கள் தெரிவிக்கின்றனர்.
இந்த மந்தநிலை, சீன உள்நாட்டு கார் தயாரிப்பாளர்கள், குறிப்பாக எலெக்ட்ரிக் மற்றும் பிளக்-இன் ஹைபிரிட் வாகனங்கள் பிரிவில், வலுவான எழுச்சி கண்டுள்ளது. சீன அரசு வழங்கும் 20,000 யுவான் வரையிலான ‘பழைய வாகனங்களுக்கு பதில் புதிய வாகனம் வாங்குவதற்கான’ மானியங்கள், வாடிக்கையாளர்களை சலுகை விலையில் கிடைக்கும் உள்நாட்டு தயாரிப்புகளை நோக்கி தள்ளியுள்ளன.
இந்த மானியங்கள் மற்றும் கவர்ச்சிகரமான தள்ளுபடிகள், பெரும்பாலும் சீன தயாரிப்புகளாக இருக்கும் மலிவான கார் மாடல்களை வாங்குவதற்கு வாடிக்கையாளர்களை ஊக்குவிக்கிறது. தள்ளுபடிகள் அதிகமாக கிடைக்கும் இந்த மலிவான பிரிவில், உள்நாட்டு நிறுவனங்களின் ஆதிக்கம் மேலோங்கியுள்ளது.
மேலும், BYD போன்ற உள்நாட்டு பிராண்டுகள் பிரீமியம் பிரிவிலும் கூட, புதிய கார் மாடல்களை வேகமாக அறிமுகப்படுத்துகின்றன. அத்துடன், அவை அதிக விலைக் குறைப்புகளையும் செய்து வருகின்றன. இதன் காரணமாக, உள்நாட்டு பிராண்டுகள் இப்போது பயணிகள் கார் விற்பனையில் கிட்டத்தட்ட 70% பங்கை கொண்டுள்ளன.
இந்த திடீர் எழுச்சி, பாரம்பரியமாக சந்தையில் ஆதிக்கம் செலுத்தி வந்த ஐரோப்பிய, ஜப்பானிய மற்றும் அமெரிக்க கார் தயாரிப்பு நிறுவனங்களை சீன சந்தையிலிருந்து மெதுவாக வெளியேற்றி வருகிறது. சீன பொருளாதார மந்தநிலை மற்றும் உள்நாட்டு நிறுவனங்களின் போட்டியை சமாளிக்க வெளிநாட்டு ஆடம்பர கார் நிறுவனங்கள் புதிய வியூகங்களை கையாள வேண்டிய கட்டாயத்தில் உள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
