தமிழக அரசியலில் 2026 சட்டமன்ற தேர்தல் களம் இப்போதே சூடுபிடிக்க தொடங்கிவிட்டது. குறிப்பாக, தமிழக வெற்றி கழகத்தின் தலைவர் விஜய் இரண்டு தொகுதிகளில் போட்டியிட போவதாக அறிவிக்கப்பட்டிருக்கும் தகவல்கள், ஆளுங்கட்சியான திமுக மற்றும் அதன் ஆதரவாளர்கள் மத்தியில் பெரும் விவாதத்தை ஏற்படுத்தியுள்ளது. விஜய் இரண்டு தொகுதிகளிலும் வெற்றி பெற்றால், சட்டவிதிப்படி ஒரு தொகுதியை அவர் ராஜினாமா செய்ய வேண்டியிருக்கும் என்றும், இதனால் வரும் இடைத்தேர்தல் அரசுக்கு வீண் பணச்செலவை ஏற்படுத்தும் என்றும் சமூக வலைதளங்களில் திமுகவினர் விமர்சித்து வருகின்றனர். பொதுமக்களின் வரிப்பணம் வீணாவதாக அவர்கள் முன்வைக்கும் இந்த குற்றச்சாட்டு, அரசியல் வட்டாரத்தில் பெரும் சலசலப்பை உருவாக்கியுள்ளது.
இருப்பினும், இந்தக் குற்றச்சாட்டுகளை முன்வைப்பவர்கள் தங்கள் தரப்பில் உள்ள அதே போன்ற செயல்பாடுகளை வசதியாக மறந்துவிடுகிறார்கள் என்று அரசியல் விமர்சகர்கள் சுட்டிக்காட்டுகின்றனர். தற்போது சிதம்பரம் நாடாளுமன்ற தொகுதி உறுப்பினராக இருக்கும் விசிக தலைவர் திருமாவளவன், வரவிருக்கும் சட்டமன்ற தேர்தலில் போட்டியிட உள்ளதாக தகவல்கள் தெரிவிக்கின்றன. ஒருவேளை அவர் சட்டமன்ற உறுப்பினராக தேர்வு செய்யப்பட்டால், அவர் தனது எம்பி பதவியை ராஜினாமா செய்ய வேண்டியிருக்கும். அவ்வாறு நிகழும்போது அந்த தொகுதிக்கு இடைத்தேர்தல் வருவது உறுதி. அப்போதும் அரசுக்கு வீண் செலவுதானே ஏற்படும்? இந்த இரட்டை நிலைப்பாட்டை ஏன் யாரும் கேள்வி கேட்கவில்லை என்பதுதான் தற்போது நடுநிலையாளர்களின் கேள்வியாக உள்ளது.
இந்திய தேர்தல் வரலாற்றில் ஒரு தலைவர் இரண்டு தொகுதிகளில் போட்டியிடுவது ஒன்றும் புதிய விஷயமல்ல. முன்னாள் முதல்வர், ஜெயலலிதா முதல் தற்போதைய பிரதமர் மோடி வரை பல தலைவர்கள் பல்வேறு காலகட்டங்களில் இரண்டு தொகுதிகளில் போட்டியிட்டுள்ளனர். இது ஒரு அரசியல் வியூகமாகவே பார்க்கப்படுகிறது. ஆனால், மற்ற தலைவர்கள் செய்யும்போது அமைதியாக இருக்கும் ஒரு தரப்பினர், விஜய் போன்ற புதிய அரசியல் வருகையாளர்கள் இதனை செய்யும்போது மட்டும் ‘அரசுச் செலவு’ என்ற ஆயுதத்தை கையில் எடுப்பது அவர்களின் உள்நோக்கத்தை பிரதிபலிக்கிறது. அதிகாரத்தில் இருப்பவர்கள் எம்பி பதவியில் இருந்துகொண்டு எம்எல்ஏ பதவிக்கு போட்டியிடுவதும், அதன் மூலம் இடைத்தேர்தலை உருவாக்குவதும் மட்டும் எப்படி நியாயமாகும் என்ற கேள்வி பலமாக எழுகிறது.
அரசியல் சட்டவிதிகளின்படி ஒரு நபர் ஒன்றுக்கு மேற்பட்ட பதவிகளையோ அல்லது தொகுதிகளையோ வகிக்க முடியாது என்பது தெளிவு. ஆனால், தேர்தலை சந்திக்கும் ஒரு தலைவருக்கு தனது பலத்தை நிரூபிக்கவும், பாதுகாப்பான வெற்றியை உறுதி செய்யவும் இரண்டு இடங்களில் போட்டியிட உரிமை உண்டு. திருமாவளவன் போன்ற முதிர்ந்த அரசியல்வாதிகள் எம்பி பதவியை வைத்துக்கொண்டு சட்டமன்ற கனவு காண்பதை ஏற்க முடிபவர்களால், விஜய் போன்றவர்கள் இரண்டு தொகுதியில் நிற்பதை தாங்கிக்கொள்ள முடியவில்லை. இது வெறும் பணச்செலவு குறித்த கவலை அல்ல, மாறாக விஜய்யின் அரசியல் வருகை ஏற்படுத்தியுள்ள அச்சமே இத்தகைய விமர்சனங்களுக்கு காரணம் என்பது தெளிவாக தெரிகிறது.
இறுதியாக, தேர்தல் என்பது ஜனநாயகத்தின் ஒரு திருவிழா போன்றது. அதில் ஏற்படும் செலவுகளை காரணம்காட்டி ஒரு தலைவரின் உரிமையையோ அல்லது வியூகத்தையோ விமர்சிப்பது ஏற்புடையதல்ல. இடைத்தேர்தல்கள் என்பவை தவிர்க்க முடியாத ஜனநாயக நடைமுறைகள். எம்பி பதவியை ராஜினாமா செய்துவிட்டு சட்டமன்றத்திற்கு வருவதும், இரண்டு தொகுதிகளில் வெற்றி பெற்று ஒன்றை விடுவதும் ஒரே மாதிரியான விளைவுகளை தான் ஏற்படுத்தும். எனவே, ஒரு தரப்பை மட்டும் குறிவைத்து விமர்சிக்காமல், ஜனநாயகத்தின் அனைத்து விதிகளையும் சமமாக பார்க்க வேண்டும். விஜய்யை விமர்சிக்கும் உபிக்கள் தங்கள் கூட்டணியில் உள்ள தலைவர்களின் செயல்பாடுகளையும் நேர்மையுடன் விமர்சிக்க முன்வர வேண்டும் என்பதே நடுநிலையாளர்களின் எதிர்பார்ப்பாக உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
