தமிழக அரசியலில் 2026 சட்டமன்ற தேர்தலை முன்னிட்டு நிலவும் சூழலில், விஜய்யின் தமிழக வெற்றி கழகம் எடுக்கப்போகும் ஒவ்வொரு நகர்வும் மிக நுணுக்கமாக கவனிக்கப்படுகிறது. குறிப்பாக, தவெக மற்றும் காங்கிரஸ் இடையே ஒருவேளை கூட்டணி அமைந்தால், அது திமுகவின் தேர்தல் வியூகத்தை முற்றிலுமாக மாற்றிவிடும். இதுவரை திமுகவின் பலமாக இருக்கும் காங்கிரஸ் மற்றும் சிறுபான்மையினர் வாக்குகளை விஜய் கவர முயல்வதை திமுக ஒருபோதும் அனுமதிக்காது. அப்படி ஒரு கூட்டணி அமையும் பட்சத்தில், ஈழத்தமிழர் படுகொலை விவகாரத்தை திமுக கையில் எடுக்கும். “ஈழத்தமிழர்களைக் கொன்று குவித்த காங்கிரஸுடன் விஜய் கைகோர்த்துவிட்டார்” என்ற ரீதியில் பிரசாரம் தீவிரப்படுத்தப்படும். இதை திமுக நேரடியாக செய்யாமல் கூட்டணி கட்சிகளை வைத்து பிரச்சாரம் செய்யும். இது உலகத்தமிழர் உரிமை பேசும் விஜய்யின் பிம்பத்திற்கு பெரும் பின்னடைவை ஏற்படுத்தும் என்பதால், அவர் இந்த கூட்டணியைச் சிந்திப்பது கூட அபாயகரமானது.
மற்றொருபுறம், எடப்பாடி பழனிசாமியின் தலைமையை தவிர்த்து அதிமுகவில் இருந்து ஓரம் கட்டப்பட்டுள்ள ஓ. பன்னீர்செல்வம் மற்றும் டிடிவி தினகரன் ஆகியோரை தன் பக்கம் இழுக்க விஜய் முயன்றால், அது அவருக்கு மற்றுமொரு சவாலாக மாறும். இவ்விரு தலைவர்கள் மீதும் ஏற்கனவே இருக்கும் ஊழல் புகார்கள் மற்றும் சொத்துக்குவிப்பு புகார்கள் தேர்தல் நேரத்தில் பெரும் விவாத பொருளாகும். இவர்கள் விஜய்யுடன் கூட்டணி வைத்தால், அந்த ஊழல் கறைகளுக்கு விஜய் தான் பதில் சொல்ல வேண்டிய கட்டாயத்திற்கு தள்ளப்படுவார். “புதிய அரசியல், தூய்மையான நிர்வாகம்” என்று முழங்கும் விஜய்க்கு, பழைய அரசியல் கறைகளுடன் உள்ளவர்களை சேர்ப்பது அவரது அடிப்படை நோக்கத்தையே சிதைத்துவிடும். இதனால் தான் விஜய் எந்த சிக்கலிலும் சிக்காமல் தனித்து நின்றே தன் பலத்தை நிரூபிக்க துணிந்துள்ளார்.
விஜய்யின் இந்த தனித்துப்போட்டி முடிவானது, பலமான வாக்கு வங்கிகளை கொண்டுள்ள பாரம்பரிய கட்சிகளுக்கு இடையே ஒரு மிகப்பெரிய சூதாட்டமாகவே பார்க்கப்படுகிறது. தவெக தனித்து போட்டியிடுவதால் திமுக மற்றும் அதிமுக ஆகிய இரு திராவிட கட்சிகளுமே சமமான பாதிப்புகளை சந்திக்கும். குறிப்பாக, இதுவரை இக்கட்சிகளுக்கு வாக்களித்து வந்த நடுநிலை ஓட்டுகளும், இளைஞர்களின் வாக்குகளும் பெருமளவில் தவெக பக்கம் சாய வாய்ப்புள்ளது. இந்த சூழலை முறியடிக்க, ஆளும் கட்சி தரப்பிலிருந்து விஜய்யின் அரசியல் புரிதலை கேள்விக்குள்ளாக்கும் விமர்சனங்கள் முன்வைக்கப்படுகின்றன. தர்க்க ரீதியான முடிவுகளை எடுக்க தெரியாதவர் என்ற பிம்பத்தை உருவாக்க, அவரை சிறுமைப்படுத்தும் விமர்சனங்கள் திட்டமிட்டு பரப்பப்படுகின்றன.
அரசியல் களத்தில் விஜய்யை சுற்றியுள்ள விமர்சனங்களில் மிகவும் கூர்மையானது ‘தற்குறி’ என்ற சொல். விஜய்யின் ரசிகர்களையும், அவரது அரசியல் நகர்வுகளையும் எள்ளி நகையாடும் விதமாக இந்த விமர்சனம் சமூக வலைதளங்களில் திமுக ஆதரவாளர்களால் முன்வைக்கப்படுகிறது. ஆனால், இதனை தனது காஞ்சிபுரம் கூட்டத்திலேயே எதிர்கொண்ட விஜய், தாங்கள் தற்குறிகள் அல்ல, தமிழக அரசியலில் மாற்றத்தை ஏற்படுத்தப் போகும் ‘ஆச்சரியக்குறிகள்’ என்று பதிலடி கொடுத்தார். தன்னை விமர்சிப்பவர்கள் வரலாற்றை திரும்பி பார்க்க வேண்டும் என்றும், எம்.ஜி.ஆர் கட்சி தொடங்கியபோது அவரை ‘கூத்தாடி’ என்று விமர்சித்தவர்கள் பின்னாளில் அவரது வெற்றியை கண்டு வாயடைத்து போனதையும் அவர் சுட்டிக்காட்டினார்.
தேர்தல் களம் என்பது உணர்ச்சிகளுக்கும், விமர்சனங்களுக்கும் அப்பாற்பட்டு எண்களால் தீர்மானிக்கப்படுவது. விஜய்யின் தனித்துப்போட்டி முடிவு சரிதானா அல்லது அவர் இன்னும் முதிர்ச்சியடைய வேண்டுமா என்பதை 2026 தேர்தல் முடிவுகள் தான் தீர்மானிக்கும். விஜய்யின் பலத்தை வெறும் ரசிகர் கூட்டத்தை வைத்து மட்டுமே எடை போட முடியாது என்பதை போலவே, அவரை வெறும் நடிகராக மட்டும் கருதி விமர்சிப்பதும் எதிர்த்தரப்புக்கு தவறாக முடியலாம். அரசியல் வியூகங்கள் மற்றும் கூட்டணி கணக்குகளை தாண்டி, மக்களின் மனநிலை என்ன என்பதை யாராலும் துல்லியமாக கணிக்க முடியாது.
இறுதியில், தேர்தல் முடிவுகள் வெளியாகும் நாளன்று தான் யார் உண்மையான தற்குறி என்பது வெளிச்சத்திற்கு வரும். ஒருவேளை விஜய் கணிசமான வாக்குகளை பெற்று கிங் மேக்கராகவோ அல்லது ஆட்சியை கைப்பற்றும் சக்தியாகவோ உருவெடுத்தால், இன்று அவரை விமர்சிப்பவர்கள் அனைவரும் மௌனமாக வேண்டியிருக்கும். மாறாக, அவரது முடிவுகள் தோல்வியை தழுவினால், அவரது அரசியல் பயணம் ஒரு கேள்விக்குறியாக மாறும். எனவே, விஜய்யை பொறுத்தவரை இது வெறும் தேர்தல் அல்ல, தன் வாழ்நாள் லட்சியத்திற்கான ஒரு மிகப்பெரிய அக்னிப்பரீட்சை. அந்தப் பரீட்சையின் முடிவுக்காக தமிழகமே ஆவலுடன் காத்திருக்கிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
