நடிகர் விஜய் தனது அரசியல் பயணத்தை தமிழக வெற்றிக் கழகம் மூலம் தொடங்கியதன் பின்னணியில், அதிகாரத்தை கைப்பற்றுவதை விட, தமிழ்நாட்டின் அரசியல் அமைப்பில் ஒரு ஆழமான மாற்றத்தை கொண்டுவர வேண்டும் என்ற பரந்த நோக்கம் இருப்பதாக அரசியல் பார்வையாளர்கள் கருதுகின்றனர். அவர் நினைத்திருந்தால், தற்போதுள்ள பிரதான கட்சிகளுடன், குறிப்பாக அதிமுகவுடன் கூட்டணி அமைத்து, மிக எளிதாக தேர்தலில் வெற்றி பெற்று, துணை முதலமைச்சர் பதவி மற்றும் ஐந்து முக்கியமான கேபினட் அமைச்சர்கள் பதவிகளை பெற்றிருக்க முடியும். ஆனால், விஜய் அத்தகைய குறுக்குவழியை தேர்ந்தெடுக்கவில்லை என்பதில் இருந்து, அவரது இலக்கு வெறும் பதவி அல்ல, மாறாக ஒரு புரட்சிகரமான மாற்றமே என்பதை உணர முடிகிறது.
விஜய்யின் பிரதான நோக்கம், தமிழ்நாட்டின் அரசியல் அமைப்பில் வேரூன்றி இருக்கும் ஊழல், தேக்கநிலை மற்றும் சாதிய பிணைப்புகளை களையெடுத்து, அரசியலை சுத்தப்படுத்த வேண்டும் என்பதாகவே உள்ளது. பல ஆண்டுகளாக பழகிப்போன பாரம்பரிய அரசியல் முறைகள், இளைஞர்களுக்கு வாய்ப்பளிக்காமல் இருப்பதும், நேர்மைக்கு மதிப்பு அளிக்காமல் இருப்பதும் அவர் கவனத்தில் எடுத்துக்கொண்ட முக்கிய பிரச்சினைகளாக உள்ளன. இந்த ஆழமான குறைபாடுகளை சரிசெய்வதன் மூலமே தமிழ்நாட்டு மக்களுக்கு ஒரு நிலையான மற்றும் மேம்பட்ட நிர்வாகத்தை கொடுக்க முடியும் என்று விஜய் உறுதியாக நம்புகிறார். இந்த காரணத்தினாலேயே, அவர் எந்தவொரு பிரதான கட்சியுடனும் கூட்டணி வைக்க மறுத்து, மக்களுடன் மட்டுமே கூட்டணி என்ற நிலைப்பாட்டை எடுத்திருக்கிறார்.
அவர் கனவு காணும் ஆட்சியில் மிகவும் முக்கியத்துவம் பெறுவது, தூய்மையான ஆட்சி மற்றும் இளைஞர்களின் மந்திரிசபை ஆகியவைதான். தற்போதுள்ள மந்திரிசபைகளில் வயதான தலைவர்களின் ஆதிக்கம் அதிகமாக இருப்பதையும், நிர்வாகத்தில் புதுமையான யோசனைகள் இல்லாததையும் விஜய் யோசிப்பதாக தெரிகிறது. ஆற்றல் மிக்க, நேர்மையான மற்றும் தொலைநோக்கு சிந்தனையுள்ள இளைஞர்களுக்கு பெரிய பொறுப்புகளை வழங்குவதன் மூலம், நிர்வாகத்தை வேகப்படுத்தவும், புதிய திட்டங்களை சிறப்பாக செயல்படுத்தவும் முடியும் என்று அவர் நம்புகிறார். விஜய்யின் அரசியல் நகர்வுகள், புதிய ரத்தம் பாய்ச்சப்பட்டு, நிர்வாகத்தில் வெளிப்படைத்தன்மை உறுதி செய்யப்படும் என்ற நம்பிக்கையை இளைஞர்கள் மத்தியில் விதைத்துள்ளன.
விஜய்யின் திட்டங்களில் மிகவும் அதிரடியான ஒரு அம்சம், ஊழல் அதிகாரிகள் மீது கடுமையான நடவடிக்கை எடுப்பதுதான். அரசியல்வாதிகள் மட்டுமல்லாது, நிர்வாகத்தின் ஒவ்வொரு மட்டத்திலும் புரையோடிப்போன ஊழலை ஒழிக்க, ஊழல் அதிகாரிகளை கண்டறிந்து, அவர்களை பதவியிலிருந்து நீக்குதல் மற்றும் ஊழல் பணத்தை பறிமுதல் செய்து, அதனை அரசின் கஜானாவை நிரப்ப பயன்படுத்துதல் ஆகியவை அவரது தேர்தல் வாக்குறுதிகளாக அமைய வாய்ப்புள்ளது. நிர்வாகத்தில் ஊழலுக்கு இடம் இல்லை என்பதை உணர்த்தும் இத்தகைய கடுமையான நடவடிக்கைகளே, மக்களிடையே அவர் மீதான நம்பிக்கையை அதிகரிக்க செய்யும்.
விஜய்யின் இந்த கனவுகள் மற்றும் வாக்குறுதிகள், இயக்குநர் ஷங்கரின் இயக்கத்தில் வெளிவந்த ‘முதல்வன்’ திரைப்படத்தை நினைவுபடுத்துகின்றன. அந்த திரைப்படத்தில் அர்ஜுன், ஒருநாள் முதலமைச்சராக பொறுப்பேற்று, மாநிலத்தில் நிலவும் ஊழலை அதிரடியாக ஒழித்து, மக்களுக்கு தேவையான மாற்றங்களை கொண்டு வருவார். அதேபோல், ஊழல் அதிகாரிகளை அடையாளம் கண்டு, களையெடுக்கும் காட்சிகளும், மக்கள் நலன் சார்ந்த ஆட்சியை அமைக்கும் காட்சிகளும் அதில் இடம் பெற்றிருக்கும். ஒருநாள் முதல்வரால் இவ்வளவு செய்ய முடிகிறது என்றால், ஐந்து வருடம் ஒரு முதல்வர் அதிரடி நடவடிக்கை எடுத்தால் தமிழ்நாடு ஒரு ஜப்பானாக மாறும் வாய்ப்பு உள்ளது. விஜய்யின் தேர்தல் அறிக்கை மற்றும் ஆட்சி குறித்த எதிர்பார்ப்புகள், அந்த படக்காட்சிகள் நிஜத்தில் வரப்போகுதா? என்ற கேள்வியை மக்கள் மத்தியில் எழுப்பியுள்ளன.
மொத்தத்தில், விஜய்யின் அரசியல் நுழைவு என்பது வெறும் பதவி ஆசைக்கானதல்ல. தமிழ்நாட்டின் நீண்டகால அரசியல் அமைப்பில் ஒரு நேர்மையான மற்றும் இளைஞர்கள் தலைமையிலான, ஊழலற்ற மாற்றத்தை கொண்டுவர வேண்டும் என்பதே அவரது இலக்காக தெரிகிறது. அவர் வகுத்துள்ள இந்த கடினமான பாதையானது, ஆரம்பத்தில் சவால்கள் நிறைந்ததாக இருந்தாலும், ஒருமுறை அவர் மக்கள் நம்பிக்கையை பெற்று ஆட்சியைப் பிடித்துவிட்டால், தமிழக அரசியல் வரலாற்றில் அது ஒரு புதிய சகாப்தமாக இருக்கும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
