தமிழக அரசியலில் ஒரு புதிய சக்தியாக உருவெடுத்துள்ள நடிகர் விஜய்யின் அரசியல் நகர்வுகளையும், அவரை சுற்றி ஊடகங்கள் கட்டமைக்கும் பிம்பங்களையும் நுணுக்கமாக கவனித்தால், அது மறைந்த கேப்டன் விஜயகாந்தின் அரசியல் தொடக்க காலத்தை நினைவுபடுத்துவதாக பலரும் கருதுகின்றனர். விஜயகாந்த் தேசிய முற்போக்கு திராவிட கழகத்தை தொடங்கியபோது, ஊடகங்கள் அவருக்கு கொடுத்த முக்கியத்துவம் மிக அதிகம். அன்றைய காலகட்டத்தில் திராவிடக் கட்சிகளுக்கு மாற்றாக ஒரு பெரும் சக்தியாக அவர் பார்க்கப்பட்டார். ஊடகங்களின் தொடர் செய்திகளும், நேர்காணல்களும் அவரை மிகக்குறுகிய காலத்தில் பட்டிதொட்டியெங்கும் கொண்டு சேர்த்தன. அதேபோல்தான் இன்று தமிழக வெற்றி கழகத்தின் தலைவர் விஜய்க்கு ஊடகங்கள் ஒரு பிரம்மாண்டமான தொடக்கத்தை கொடுத்துள்ளன.
இருப்பினும், நாணயத்தின் மறுபக்கத்தை போல, அதே ஊடகங்கள் தான் விஜயகாந்தை ஒரு கட்டத்தில் மிக கடுமையாக விமர்சிக்க தொடங்கின. அவரது உடல்நிலை, பேச்சுத்திறன் மற்றும் மேடை நாகரிகம் குறித்து தொடர்ச்சியான கேலி சித்திரங்களையும், எதிர்மறையான செய்திகளையும் வெளியிட்டு அவரது அரசியல் பிம்பத்தை சிதைப்பதில் ஊடகங்கள் முக்கிய பங்கு வகித்தன. எந்த ஊடகங்கள் அவரை மேலே தூக்கி வைத்து புகழ்ந்தனவோ, அதே ஊடகங்கள் தான் அவரை வீழ்த்துவதற்கும் காரணமாக இருந்தன என்பது ஒரு கசப்பான உண்மை. தற்போது விஜய்யின் விஷயத்திலும் ஊடகங்களின் அணுகுமுறை மெல்ல மாற தொடங்கியிருப்பதை அரசியல் நோக்கர்கள் சுட்டிக்காட்டுகின்றனர்.
தொடக்கத்தில் விஜய்யின் ஒவ்வொரு அசைவையும் ‘பில்டப்’ செய்த ஊடகங்கள், தற்போது அவர் மேடைகளில் பேசும் கருத்துக்களையும், அவர் சந்திக்கும் நிர்வாகிகளையும் விமர்சன கண்ணோட்டத்துடன் அணுக தொடங்கியுள்ளன. விஜயகாந்தை போலவே விஜய்யையும் தங்களின் செய்திகளுக்காக பயன்படுத்தி கொண்டு, நேரம் கிடைக்கும்போது அவரை சிறுமைப்படுத்த ஊடகங்கள் தயங்காது என்ற வாதம் முன்வைக்கப்படுகிறது. ஆனால், இங்குதான் விஜய் தனது முன்னோடியான விஜயகாந்திடமிருந்து ஒரு மிக முக்கியமான பாடத்தை கற்றுக்கொண்டதாக தெரிகிறது. ஊடகங்களை எப்படி கையாள வேண்டும் என்பதில் விஜய் மிக தெளிவான ஒரு வியூகத்தை வகுத்துள்ளார்.
விஜயகாந்த் ஊடகங்களுக்கு பேட்டி அளிப்பதிலும், செய்தியாளர்களின் கேள்விகளுக்கு பதிலடி கொடுப்பதிலும் மிகுந்த ஆர்வம் காட்டினார். அதுவே பல நேரங்களில் அவருக்கு எதிர்மறையாக முடிந்தது. ஆனால் விஜய், தான் கட்சி தொடங்கிய நாள் முதல் இன்று வரை ஒரு முறை கூட அதிகாரப்பூர்வமாக ஊடகங்களுக்கு பேட்டி அளிக்கவில்லை. செய்தியாளர் சந்திப்புகளை முற்றிலுமாக தவிர்த்து வருகிறார். ஊடகங்களின் கேள்விகளுக்கு பதில் சொல்லி தனது நேரத்தை செலவிடுவதை விட, நேரடியாக தொண்டர்களையும் மக்களையும் சந்திப்பதிலேயே அவர் கவனம் செலுத்தி வருகிறார். ஊடகங்கள் அவரை பற்றி என்ன எழுதினாலும், என்ன பேசினாலும் அதை பொருட்படுத்தாமல் தனது மௌனத்தை தற்காத்து கொள்கிறார்.
விஜய்யின் இந்த மௌனம் என்பது பலவீனமல்ல, அது ஒரு திட்டமிடப்பட்ட அரசியல் ஆயுதம். ஊடகங்கள் ஒரு தலைவரை எப்படி வேண்டுமானாலும் வளைக்கலாம் என்று நினைக்கும் சூழலில், அவர்களுக்கு தீனி போடாமல் இருப்பது தான் புத்திசாலித்தனம் என்பதை அவர் உணர்ந்துள்ளார். விஜயகாந்த் போல தான் ஏமாற மாட்டேன் என்பதில் அவர் உறுதியாக இருக்கிறார். ஊடகங்களின் கேலி கிண்டல்களுக்கு பதிலடி கொடுக்காமல், தனது செயலால் அவர்களை திரும்பி பார்க்க வைக்க வேண்டும் என்பதே அவரது எண்ணம். இதனால்தான், “தமிழகத்தின் முதல்வராக பதவியேற்ற பிறகு தான் ஊடகங்களுக்கு முதல் பேட்டி அளிப்பார்” என்ற ஒரு செய்தி அவரது ஆதரவாளர்களிடையே பரவலாக பேசப்பட்டு வருகிறது.
இறுதியாக, ஊடகங்களின் வெளிச்சம் இல்லாமல் மக்களிடம் செல்வாக்கு பெற முடியாது என்ற கருத்தை விஜய் உடைத்து வருகிறார். சமூக வலைதளங்கள் மற்றும் நேரடி மக்கள் தொடர்பு மூலம் அவர் முன்னெடுக்கும் அரசியல், பாரம்பரிய ஊடகங்களுக்கு ஒரு சவாலாக அமைந்துள்ளது. விஜயகாந்துக்கு நேர்ந்த அதே நிலையை தனக்கு வரவிடாமல் தடுக்க, அவர் போட்டுள்ள இந்த ‘சைலண்ட் ஸ்கெட்ச்’ வெற்றிகரமாக வேலை செய்கிறது. ஊடகங்கள் அவரை எவ்வளவு கீழே தள்ள முயன்றாலும், மக்களின் ஆதரவு இருக்கும் வரை எதற்கும் அஞ்ச தேவையில்லை என்ற மனநிலையில் அவர் பயணித்து கொண்டிருக்கிறார். 2026 தேர்தல் களம் தான் இந்த மௌன புரட்சியின் உண்மையான முடிவை தீர்மானிக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
