தமிழக அரசியல் களம் தற்போது தேர்தல் ஜுரத்தை விட, நடிகர் விஜய்யின் குடும்ப விவகாரம் குறித்த விவாதங்களால் அதிக வெப்பமடைந்துள்ளது. குறிப்பாக, விஜய்யின் மனைவி சங்கீதா விவாகரத்து கோரி நோட்டீஸ் அனுப்பியதாக வெளியான செய்தி, வெறும் குடும்ப பிரச்சனையாக பார்க்கப்படாமல் ஒரு திட்டமிட்ட அரசியல் சதி என்ற கோணத்தில் விவாதிக்கப்படுகிறது. விஜய்யின் அரசியல் வருகையை தடுப்பதற்கும், அவரது நற்பெயரை குலைப்பதற்கும் ஆளுங்கட்சி தரப்பிலிருந்து ‘கேரக்டர் அசாசினேஷன்’ எனப்படும் தனிநபர் ஒழுக்கத்தை சிதைக்கும் வேலைகள் தொடங்கும் என்று அரசியல் விமர்சகர் சவுக்கு சங்கர் போன்றவர்கள் ஏற்கனவே எச்சரித்திருந்தனர். அதன் தொடர்ச்சியாகவே, இந்த விவாகரத்து விவகாரம் தற்போது ஊடகங்களில் பெரிதுபடுத்தப்படுவதாக தவெக தொண்டர்கள் கருதுகின்றனர்.
இந்த விவாகரத்து மனுத்தாக்கல் செய்யப்பட்ட காலநேரம் பல சந்தேகங்களை எழுப்புகிறது. சங்கீதா கடந்த டிசம்பர் மாதமே இதில் கையெழுத்திட்டிருந்தாலும், தேர்தல் நெருங்கும் பிப்ரவரி மாத இறுதியில் இது நீதிமன்றத்திற்கு வந்திருப்பதும், உடனடியாக ஊடகங்களுக்கு கசிந்திருப்பதும் தற்செயலானதாக தெரியவில்லை. பொதுவாக, நீதிமன்ற முத்திரையுடன் வெளிவர வேண்டிய இத்தகைய ஆவணங்கள், அதற்கு முன்பே சில குறிப்பிட்ட ஊடகங்களுக்கு சென்றடைந்தது எப்படி என்ற கேள்வி எழுகிறது. இது விஜய்யை தேர்தல் நேரத்தில் உளவியல் ரீதியாக முடக்கி அவரை சங்கடத்திற்குள்ளாக்க எடுக்கப்பட்ட ஒரு முயற்சி என்று அரசியல் பார்வையாளர்கள் சாடுகின்றனர்.
தமிழக அரசியலில் பெண்கள் ஒரு தீர்மானிக்கும் சக்தியாக உருவெடுத்துள்ளனர். மொத்த வாக்காளர்களில் ஆண்களை விட பெண்கள் 12 லட்சம் கூடுதலாக இருக்கும் நிலையில், பெண்களின் ஆதரவை பெறுபவர்களுக்கே வெற்றி நிச்சயம் என்பது ஆளுங்கட்சியின் கணிப்பு. இதுவரை எடுக்கப்பட்ட பல்வேறு கருத்துக்கணிப்புகளில், 60 முதல் 70 சதவீத பெண்களின் ஆதரவு விஜய்க்கு இருப்பதாக தெரிகிறது. இந்த ‘பெண் வாக்கு வங்கியை’ உடைக்க வேண்டுமானால், பெண்கள் மத்தியில் விஜய்க்கு இருக்கும் ‘நல்லவர்’ என்ற பிம்பத்தை சிதைக்க வேண்டும். அதற்காகவே, அவரது மனைவியையே கருவியாக பயன்படுத்தி, அவர் மீது குடும்ப வன்முறை மற்றும் இதர புகார்களை சுமத்த வைப்பதாக ஒரு தரப்பினர் குற்றம் சாட்டுகின்றனர்.
விஜய்யின் 33 ஆண்டு கால சினிமா வாழ்க்கையில், அவர் ஒருபோதும் பெண் விவகாரங்களிலோ அல்லது தேவையற்ற கிசு கிசுக்களிலோ சிக்கியதில்லை என்பது அவரது மிகப்பெரிய பலம். சக நடிகைகளே அவர் ஒரு ‘கம்பர்ட்டபிள் ஜோன்’ கொண்ட மனிதர் என்றும், கண்ணியமாக நடத்துபவர் என்றும் சான்றிதழ் அளித்துள்ளனர். இத்தகைய ஒரு கட்டுப்பாடான மனிதர் மீது, அரசியலுக்கு வந்தவுடன் மட்டும் இத்தகைய புகார்கள் எழுவது அரசியல் உள்நோக்கம் கொண்டதே. ரஜினிகாந்த் அரசியலுக்கு வர முயன்றபோது, அவரது குடும்பத்தினர் தடுத்தது போன்ற ஒரு சூழலை இங்கும் உருவாக்கி, விஜய்யை அரசியலை விட்டு வெளியேற்ற அல்லது முடக்க நினைக்கும் ஒரு ‘டயபாலிக்கல் பிளான்’ இதுவாக இருக்கலாம்.
சினிமாவில் ஈட்டும் கோடிக்கணக்கான வருமானம் மற்றும் புகழை துறந்துவிட்டு, மக்கள் பணிக்காக சொந்த காசைச் செலவழிக்கும் விஜய்யின் முடிவில் குடும்பத்திற்கு உடன்பாடு இல்லாமல் இருந்திருக்கலாம். இன்கமிங் ஸ்டாப் ஆகி, அவுட்கோயிங் அதிகமாகும் போது எந்தவொரு குடும்பத்திலும் உரசல் ஏற்படுவது இயல்புதான். ஆனால், அந்த உரசலை அரசியலுக்காக பயன்படுத்துவதுதான் ஆரோக்கியமற்ற அரசியலாகும். திமுக போன்ற 75 ஆண்டு கால பாரம்பரியம் கொண்ட கட்சிகள், கொள்கை ரீதியாக விஜய்யை எதிர்கொள்ளாமல், விவாகரத்து நோட்டீஸை வைத்து தேர்தல் அறிக்கை போல விவாதிப்பது அவர்களின் அரசியல் பயத்தையே காட்டுகிறது.
இறுதியாக, விஜய் ஒரு யோகி போல நிதானமாக செயல்பட்டு வருகிறார். ஒரு தரப்பு செய்தியை மட்டுமே வைத்து கொண்டு தீர்ப்பு எழுதும் ஊடகங்களும், உடன்பிறப்புகளும் 2026 சட்டமன்றத் தேர்தல் முடிவுகளின் போது தெளிவு பெறுவார்கள். தனிநபர் ஒழுக்கத்தை பற்றிப் பேசினால், திராவிட இயக்க தலைவர்களின் தனிப்பட்ட வாழ்க்கையில் இருக்கும் பலவீனங்களை மக்கள் மறக்கவில்லை. பல திரை நட்சத்திரங்களின் வாழ்க்கையில் விவாகரத்து நடந்திருந்தாலும், விஜய்யின் விவகாரத்தை மட்டும் அரசியல் கருவியாக மாற்றுவது தமிழக அரசியலின் தரத்தாழ்வையே காட்டுகிறது. எத்தகைய சோதனைகள் வந்தாலும், தனது இலக்கிலிருந்து பின்வாங்க போவதில்லை என்பதில் விஜய் உறுதியாக இருப்பதாகவே அவரது ஆதரவாளர்கள் நம்புகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
