தமிழக அரசியலில் சுமார் அரை நூற்றாண்டு காலமாக நீடித்து வரும் இரு துருவ அரசியலை உடைக்கும் ஒரு சக்தியாக நடிகர் விஜய்யின் தமிழக வெற்றிக் கழகம் உருவெடுத்துள்ளது. 2026 சட்டமன்ற தேர்தலை முன்னிட்டு நிலவும் அரசியல் சூழலில், ஆளுங்கட்சிக்கு எதிரான அதிருப்தி வாக்குகள் வழக்கமாக பிரதான எதிர்க்கட்சியான அதிமுகவுக்குச் செல்வது மரபு. ஆனால், இந்த முறை அந்த அதிருப்தி வாக்குகளில் ஒரு பெரும் பகுதியை விஜய் தனது பக்கம் ஈர்ப்பார் என எதிர்பார்க்கப்படுகிறது. குறிப்பாக, கடந்த காலங்களில் எந்த பக்கமும் சாயாமல் இருந்த நடுநிலை வாக்காளர்கள் மற்றும் தற்போதைய ஆட்சியின் மீது அதிருப்தியில் இருக்கும் ஒரு பகுதி மக்கள், விஜய்யை ஒரு புதிய நம்பிக்கையாக பார்ப்பது திராவிட கட்சிகளுக்கு பெரும் சவாலாக மாறியுள்ளது.
விஜய்யின் பலமாக பார்க்கப்படுவது யாரிடத்திலும் இல்லாத அசுரத்தனமான இளைஞர் மற்றும் முதல்முறை வாக்காளர்களின் ஆதரவு ஆகும். அரசியலில் மாற்றம் வேண்டும் என்று துடிக்கும் இளைய தலைமுறை, பாரம்பரிய கட்சிகளின் சித்தாந்த மோதல்களை கடந்து விஜய்யின் பின்னால் அணிவகுக்க தொடங்கியுள்ளனர். அத்துடன், பெண்களின் ஆதரவும், குடும்ப தலைவிகளின் வாக்குகளும் விஜய்க்கு சாதகமாகத் திரும்புவது தவெகவின் வெற்றி வாய்ப்பை உறுதிப்படுத்தும் காரணமாக உள்ளது. பொதுவாக, ஒரு புதிய கட்சிக்கு இளைஞர்கள் மற்றும் பெண்கள் ஆதரவு கிடைத்துவிட்டால், அது தேர்தல் முடிவுகளில் மிகப்பெரிய தாக்கத்தை ஏற்படுத்தும் என்பதற்கு தமிழக வரலாற்றில் பல உதாரணங்கள் உண்டு.
மற்றொரு முக்கியமான அம்சம் என்னவென்றால், விசிக, பாமக, தேமுதிக போன்ற கட்சிகளின் வாக்கு வங்கிகளில் விஜய் ஏற்படுத்தப்போகும் தாக்கம். இந்த கட்சிகளின் இரண்டாம் கட்ட தலைவர்கள் மற்றும் தொண்டர்கள் மத்தியில் விஜய்க்கு இருக்கும் ஈர்ப்பு, அந்தந்த கட்சிகளின் வாக்கு சதவீதத்தை சிதைக்கக்கூடும். குறிப்பாக, ஜாதி மற்றும் மத அரசியலுக்கு அப்பாற்பட்ட ஒரு தளத்தை விஜய் உருவாக்குவதால், சிறுபான்மையினர் மற்றும் ஒடுக்கப்பட்ட சமூகத்தை சேர்ந்த இளைஞர்கள் பலரும் தவெகவை நோக்கி ஈர்க்கப்படுகின்றனர். இது திமுக மற்றும் அதிமுகவின் கூட்டணி கணக்குகளை அடியோடு மாற்றி அமைக்கும் வல்லமை கொண்டது.
ஆட்சிக்கு எதிராக 10% வாக்குகள் இருக்கும் என்று கணித்தால், அதில் வெறும் 5% வாக்குகளை விஜய் பிரித்தாலே, அது திராவிட கட்சிகளின் வெற்றி வாய்ப்பை பறித்துவிடும். அத்துடன் தவெகவின் அடிப்படை வாக்கு வங்கியான 15% முதல் 20% வாக்குகள், இரு திராவிட கட்சிகள் மீதும் அதிருப்தியில் இருக்கும் வாக்களர்கள் ஒரு 20% சேரும்போது, மொத்த வாக்கு சதவீதம் 40%-ஐ நெருங்கும் வாய்ப்புள்ளது. ஒரு மும்முனை போட்டியில் 35% முதல் 40% வாக்குகளை பெறும் கட்சியே ஆட்சி அமைக்க முடியும் என்ற தேர்தல் கணிதத்தின் அடிப்படையில் பார்த்தால், விஜய் நேரடியாக ஆட்சி பீடத்தில் அமருவதற்கான வாய்ப்புகள் மிக அதிகம். இது திராவிட அரசியலில் இதுவரை கண்டிராத ஒரு மாபெரும் மாற்றத்தை உருவாக்கும்.
விஜய்யின் எழுச்சி திராவிட கட்சிகளிடையே ஒருவித பதற்றத்தை உருவாக்கியுள்ளதை அவர்களின் அண்மைக்கால பேச்சுகள் மற்றும் எதிர்வினைகள் மூலம் உணர முடிகிறது. விஜய் தனது அரசியல் எதிரி திமுக என்றும், கொள்கை எதிரி பாஜக என்றும் தெளிவாக அறிவித்துள்ள நிலையில், அதிமுகவின் இடத்தை பிடிப்பதிலேயே அவர் குறியாக உள்ளார். ஆட்சிக்கு எதிரான வாக்குகளை அதிமுக முழுமையாக அறுவடை செய்ய முடியாமல் விஜய் தடுப்பதே தவெகவின் முதல் வெற்றியாக அமையும். இதனால், வரும் தேர்தலில் முதலிடத்திற்கான போட்டி விஜய்க்கும் திமுகவுக்கும் இடையே இருக்குமா அல்லது விஜய்க்கும் அதிமுகவுக்கும் இடையே இருக்குமா என்ற குழப்பம் அரசியல் வட்டாரத்தில் நீடிக்கிறது.
இறுதியாக, 2026 தேர்தல் முடிவுகள் வெளியான பிறகு, தமிழகத்தின் இரண்டாவது பெரிய கட்சி எது என்ற கேள்விக்கே அதிக முக்கியத்துவம் இருக்கும் போல் தெரிகிறது. விஜய் முதலிடத்தை பிடித்து ஆட்சி அமைக்கும் பட்சத்தில், பல ஆண்டுகளாக ஆட்சியில் இருந்த திமுக அல்லது அதிமுக ஆகிய இரு கட்சிகளில் ஒன்று மூன்றாவது இடத்திற்கு தள்ளப்படும் சூழல் உருவாகலாம். இது வெறும் சினிமா கவர்ச்சி அரசியல் அல்லாமல், திராவிட கட்சிகளின் மீதான மக்களின் சலிப்பும், மாற்றத்திற்கான தாகமுமே விஜய்யை அரியணையில் ஏற்றும் உந்துசக்தியாக இருக்கும். 2026-ல் தமிழக அரசியல் களம் ஒரு புதிய சரித்திரத்தை படைக்கத் தயாராகி வருகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
