தமிழக அரசியல் களத்தில் 2026 சட்டமன்ற தேர்தல் என்பது ஒரு வாழ்வா சாவா போராட்டமாக மாறியுள்ளது. குறிப்பாக, நடிகர் விஜய் தொடங்கியுள்ள ‘தமிழக வெற்றி கழகம்’ ஏற்படுத்தியுள்ள தாக்கம், வெறும் சினிமா ரசிகர்களின் கொண்டாட்டமாக தெரியவில்லை. மாறாக, அது ஒவ்வொரு சராசரி தமிழனின் வீட்டு வாசலையும் எட்டியுள்ளது. மக்கள் விஜய்யை ஷாருக்கான் அல்லது சல்மான்கான் போன்ற ஒரு திரையுரை நட்சத்திரமாகவோ, வெறும் ரொமாண்டிக் நாயகனாகவோ பார்க்கவில்லை. “எங்கள் வீட்டுப் பிள்ளை” என்ற பிம்பமே அவரை மற்ற நடிகர்களிடமிருந்து பிரித்து காட்டுகிறது. பல ஆண்டுகளாக திராவிட கட்சிகளின் பிடியில் இருந்த வாக்காளர்கள், இப்போது ஒரு குடும்ப உறுப்பினராக விஜய்யை ஏற்றுக்கொண்டதுதான் திமுக மற்றும் அதிமுக ஆகிய இரு துருவங்களுக்கும் சிம்ம சொப்பனமாக மாறியுள்ளது.
திராவிட கட்சிகள் கடந்த ஐம்பது ஆண்டுகளாக ‘மாறி மாறி’ ஆட்சி கட்டிலில் அமர்ந்தாலும், சாமானிய மக்களின் அடிப்படை பிரச்சனைகள் இன்னும் தீர்ந்தபாடில்லை என்பதுதான் எதார்த்தம். “இவங்க ரெண்டு பேரும் மாறி மாறி மக்களுக்கு என்ன செஞ்சுட்டாங்க?” என்ற கேள்வி இன்று கிராமத்து திண்ணைகளிலும், நகரத்து தேநீர் கடைகளிலும் ஓங்கி ஒலிக்கிறது. ஊழல், நிர்வாக சீர்கேடு மற்றும் போதைப்பொருள் புழக்கம் போன்ற தீவிரமான குற்றச்சாட்டுகள் ஆளும் கட்சியின் மீது எழும் வேளையில், எதிர்க்கட்சியான அதிமுகவும் வலுவான தலைமையின்றி தடுமாறுவது விஜய்க்கு சாதகமாக மாறியுள்ளது. புதிய ஒருவருக்கு ஏன் ஒரு வாய்ப்பு கொடுத்து பார்க்கக்கூடாது என்ற பொதுமக்களின் எண்ணம், தவெகவை ஒரு முக்கியமான மூன்றாவது சக்தியாக உருவெடுக்க செய்துள்ளது.
விஜய்யின் வருகையில் மிகவும் சவாலான விஷயம், அவர் பெண்களின் வாக்குகளை பெருமளவில் கவர்ந்து வருவதுதான். சமீபத்திய கருத்துக்கணிப்புகள் 18 முதல் 40 வயதுக்குட்பட்ட பெண்களிடையே விஜய்க்கு மிகப்பெரிய வரவேற்பு இருப்பதை உறுதி செய்கின்றன. திமுகவின் ‘மகளிர் உரிமைத் தொகை’ போன்ற திட்டங்களுக்கு போட்டியாக, விஜய் முன்னெடுக்கும் கொள்கைகள் பெண்களிடையே பேசுபொருளாகியுள்ளன. “அவர் நடிகர் என்பதற்காக ஓட்டு போடவில்லை, எங்களுக்காக பேசுவார் என்பதால் ஓட்டு போடுகிறோம்” என்ற பெண்களின் குரல், திமுகவின் வாக்கு வங்கியில் பெரும் ஓட்டையை ஏற்படுத்தும் என எதிர்பார்க்கப்படுகிறது. குடும்ப உறுப்பினராக அவர் பார்க்கப்படுவதால், பெண்களின் ஆதரவு என்பது அவருக்கு ஒரு தார்மீக பலமாக மாறியுள்ளது.
அதிமுகவை பொறுத்தவரை, அதன் பாரம்பரிய வாக்கு வங்கியான தென் தமிழகத்தில் விஜய் மிகப்பெரிய தாக்கத்தை ஏற்படுத்தியுள்ளார். குறிப்பாக முக்குளத்தூர் மற்றும் இதர சமூக வாக்குகள் அதிமுகவிடமிருந்து விலகி தவெக பக்கம் சாய தொடங்கியுள்ளன. ஓபிஎஸ் மற்றும் இதர மூத்த தலைவர்களின் வெளியேற்றம் அதிமுகவை பலவீனப்படுத்தியுள்ள நிலையில், அந்த இடத்தை பிடிக்க விஜய் தீவிரமாக முயன்று வருகிறார். அதிமுகவின் பலவீனமே விஜய்யின் பலமாக மாறியுள்ளது. இதனால், அதிமுகவின் வாக்குகள் சிதறுவது திமுகவிற்கு மறைமுகமாக உதவினாலும், திமுகவின் இளம் வாக்காளர்கள் விஜய்யின் பின்னால் அணிவகுப்பது ஆளும் கட்சிக்கு நடுக்கத்தை ஏற்படுத்தியுள்ளது.
திமுக மற்றும் அதிமுக ஆகிய இரு கட்சிகளும் இந்த விஜய் அலையை சமாளிக்க பல்வேறு உத்திகளை கையாண்டு வருகின்றன. திமுக தனது மகளிர் அணி மற்றும் இளைஞர் அணியை தட்டி எழுப்பி, களப்பணிகளை தீவிரப்படுத்தியுள்ளது. அமைச்சர்களுக்கு ‘சிட்டிங்’ தொகுதிகள் ஒதுக்காமல், கடினமான தொகுதிகளை வழங்கி அவர்களின் செல்வாக்கை சோதிக்க முதல்வர் ஸ்டாலின் திட்டமிட்டுள்ளார். மறுபுறம், அதிமுக மீண்டும் ஒரு மெகா கூட்டணியை அமைத்து தனது இருப்பை தக்கவைக்க போராடுகிறது. ஆனால், தவெக தனித்து போட்டியிடும் என்ற முடிவில் உறுதியாக இருப்பதால், வாக்குகள் சிதறுவதை தடுக்க இரு கட்சிகளாலும் முடியாத சூழல் நிலவுகிறது.
இறுதியாக, 2026-ன் தேர்தல் களம் என்பது கொள்கைகளுக்கும் மேலாக ‘பெர்சனாலிட்டி பாலிடிக்ஸ்’ என்ற தனிநபர் செல்வாக்கை நோக்கி நகர்ந்துள்ளது. விஜய்யின் அரசியல் இன்னும் முழுமையாக பரிணமிக்கவில்லை என்றாலும், மக்கள் அவர் மீது வைத்துள்ள “வெறித்தனமான ஆதரவு” என்பது ஒரு மாற்றத்திற்கான அறிகுறியாகும். ஜாதி, மதம் மற்றும் பணபலம் ஆகியவற்றைக் கடந்து, “எங்கள் வீட்டு ஆள்” என்ற உணர்வே அவரை அரியணையில் ஏற்றக்கூடும். திராவிட பேரியக்கங்கள் இந்த புதிய சவாலை எதிர்கொள்ள தங்களை தகவமைத்து கொள்ள தவறினால், தமிழக அரசியலின் திசைவழி 2026-ல் முற்றிலும் மாறப்போவது உறுதி.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
