தமிழக அரசியல் களம் எப்போதுமே எதிர்பாராத திருப்பங்களுக்கும், புதிய எழுச்சிகளுக்கும் பெயர்பெற்றது. இந்த வரிசையில், நடிகர் விஜயின் அரசியல் பிரவேசம், தமிழகத்தில் ஒரு புதிய அத்தியாயத்தை தொடங்கி வைக்குமா என்ற எதிர்பார்ப்பை ஏற்படுத்தியுள்ளது. குறிப்பாக, அவரது பொதுகூட்டங்களில் திரளும் கூட்டம், மறைந்த முன்னாள் முதலமைச்சரும், புரட்சித் தலைவருமான எம்.ஜி.ஆரின் அரசியல் பயணத்தை நினைவுபடுத்துவதாக அரசியல் நோக்கர்கள் கருத்து தெரிவித்து வருகின்றனர்.
விஜய்க்கு குவியும் இளைஞர் கூட்டம்: எம்.ஜி.ஆருடன் ஒப்பீடு
“புரட்சித் தலைவருக்கு இணையாக விஜய்யை பார்க்கிறேன். அவருக்குக் கூடும் கூட்டம் எல்லாம் ஓட்டாக மாறினால் ஒரு புரட்சியே நடக்கும்” என்று அரசியலை பல ஆண்டுகளாக கணித்து வரும் பலரும் கூறி வருகின்றனர். இது வெறும் பேச்சு மட்டுமல்ல, விஜய்யின் பொதுக்கூட்டங்களில் திரளும் மக்கள் வெள்ளம், குறிப்பாக இளைஞர்களின் எண்ணிக்கை, இந்த ஒப்பீட்டிற்கு வலு சேர்க்கிறது.
எம்.ஜி.ஆர் அரசியலுக்கு வந்தபோது, அவரை பார்ப்பதற்கு வெறித்தனமான கூட்டம் கூடியது. அந்த கூட்டம் எல்லாமே ஓட்டாக மாறியதால்தான் அவர் தொடர்ச்சியாக முதலமைச்சராக இருந்தார் என்பது வரலாறு. அதேபோல், இப்போது விஜய்யின் கூட்டத்தை பார்த்து வருகிறோம். இந்த கூட்டமும் ஓட்டாக மாறினால், 2026 மட்டுமல்ல, தொடர்ச்சியாக விஜய் தான் முதலமைச்சர் ஆவார் என்ற நம்பிக்கை அவரது ஆதரவாளர்கள் மத்தியில் ஆழமாக வேரூன்றியுள்ளது.
“எழுதி வைத்துக் படிக்கிறார்” – விமர்சனங்களுக்கு மறுப்பு
விஜய்யின் அரசியல் பேச்சுகள் குறித்து சில விமர்சனங்கள் முன்வைக்கப்படுகின்றன. “சில பேர் கிண்டல் செய்கிறார்கள், எழுதி வைத்துப் படிக்கிறார் என்று. யாரோ எழுதி வைத்து கொடுத்ததை பேசுகிறார் என்று கூறுகிறார்கள். ஆனால், அதெல்லாம் தவறு. அவர் சொந்தமாகத்தான் பேசுகிறார். அவருக்கு எல்லாமே தெரியும்” என்று விஜய்யின் நெருங்கிய வட்டாரங்கள் மறுப்பு தெரிவிக்கின்றன.
ஒரு பொதுநிகழ்வில் பேசுவதற்கு குறிப்புகளை வைத்திருப்பது என்பது சாதாரண ஒன்று. ஆனால், விஜய்யின் பேச்சில் உள்ள தொனி, மக்களின் நாடித்துடிப்பை உணர்ந்து பேசும் விதம், அவரது அரசியல் அறிவின் வெளிப்பாடாகவே பார்க்கப்படுகிறது.
மக்கள் கவர்ச்சி: விஜய்யின் பலம்
“விஜய்யை பார்க்க வேண்டும் என்றே பலர் கூடுகின்றனர். அந்த கூட்டம் சாதாரண கூட்டம் இல்லை, தானா சேர்ந்த கூட்டம்” என்பது விஜய்யின் அரசியல் செல்வாக்கிற்கு ஒரு சான்றாக உள்ளது. இந்த ‘வெறித்தனமான கூட்டம்’ வெறும் சினிமா மோகத்தால் வருபவர்கள் மட்டுமல்ல, தமிழக அரசியலில் ஒரு மாற்றத்தை விரும்பும் இளைஞர்களின் பிரதிபலிப்பாகவும் பார்க்கப்படுகிறது.
இளைஞர் கூட்டத்தின் ஆதரவு: தேர்தல் களத்தில் தாக்கம்
தமிழகத்தில் வாக்காளர்களில் இளைஞர்களின் பங்கு மிக முக்கியமானது. விஜய்யின் தமிழக வெற்றிக் கழகம் இளைஞர்களை குறிவைத்து களமிறங்கியுள்ளது. இந்தஇளைஞர் கூட்டம் ஒரு வேளை ஒட்டுமொத்தமாக விஜய்க்கு ஆதரவளித்தால், அது தமிழக அரசியலில் ஒரு பெரும் திருப்புமுனையாக அமையும்.
எம்.ஜி.ஆர் என்ற ஒற்றை ஆளுமையின் பின்னால் திரண்ட மக்கள் கூட்டம், தமிழக அரசியலின் திசையையே மாற்றியது. அதேபோன்றதொரு அலையை விஜய் உருவாக்குவாரா? அந்த அலை தேர்தல் களத்தில் பிரதிபலிக்குமா? என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
