தமிழக அரசியல் வரலாற்றில் 2026 சட்டமன்ற தேர்தல் என்பது ஒரு திருப்புமுனையாக அமையும் என அரசியல் ஆய்வாளர்கள் கருதுகின்றனர். திராவிட கட்சிகளுக்கு மாற்றாக பல சக்திகள் உருவெடுத்தாலும், நடிகர் விஜய்யின் ‘தமிழக வெற்றிக் கழகம்’ ஏற்படுத்தியுள்ள தாக்கம் முன்னெப்போதும் இல்லாத ஒன்றாக உள்ளது. குறிப்பாக, இதுவரை திமுகவின் அசைக்க முடியாத கோட்டையாக கருதப்பட்ட சிறுபான்மையினரின் வாக்கு வங்கியில் விஜய் மிகப்பெரிய விரிசலை ஏற்படுத்தியுள்ளதாக கூறப்படுகிறது. விஜய்யின் பின்னணி மற்றும் அவர் முன்னெடுக்கும் மதச்சார்பற்ற கொள்கைகள், சிறுபான்மையினரிடையே ஒரு நம்பிக்கையை விதைத்துள்ளதால், அவர்களின் ஒட்டுமொத்த வாக்குகள் இந்த முறை விசிலுக்கு மாற வாய்ப்புள்ளதாக ஆய்வுகள் தெரிவிக்கின்றன.
தமிழக அரசின் மகளிர் உரிமைத் தொகை உள்ளிட்ட பல்வேறு நலத்திட்டங்கள் மகளிரிடையே வரவேற்பை பெற்றிருந்தாலும், அதிலுள்ள சில நிபந்தனைகள் மற்றும் விடுபட்டவர்களுக்கு நிலவும் அதிருப்தி ஆகியவை விஜய்க்கு சாதகமாக மாறியுள்ளன. 5,000 ரூபாய் என அதிரடியாக பணத்தைப் பகிர்ந்தாலும், பெண்கள் மத்தியில் நிலவும் ‘நிச்சயமற்ற தன்மை’ விஜய்யின் பக்கம் அவர்களை ஈர்க்கிறது. குறிப்பாக, சமூக பாதுகாப்பு மற்றும் போதைப்பொருள் ஒழிப்பு குறித்த விஜய்யின் தொடர்ச்சியான குரல், குடும்ப தலைவிகளின் வாக்குகளை தவெகவை நோக்கி திருப்பியுள்ளதாக கருத்துக்கணிப்பு வல்லுநர்கள் சுட்டிக்காட்டுகின்றனர்.
எந்தவொரு தேர்தலையும் தீர்மானிக்கும் சக்தியாக விளங்கும் இளைஞர்கள் மற்றும் முதல் தலைமுறை வாக்காளர்கள் , இந்த முறை விஜய்யின் பின்னால் அணிதிரண்டு நிற்பது மிகத்தெளிவாக தெரிகிறது. பாரம்பரிய அரசியல் கட்சிகளின் பிடியில் சிக்காமல், புதிய மாற்றத்தை எதிர்பார்க்கும் இளைய சமுதாயத்திற்கு விஜய் ஒரு ‘ஐகானாக’ மாறியுள்ளார். சினிமா பிம்பத்தையும் தாண்டி, அவர் முன்வைக்கும் அரசியல் தெளிவு மற்றும் செயல்பாடுகள், இளைஞர்களை தவெகவின் தீவிர தொண்டர்களாக மாற்றியுள்ளது. 18 முதல் 30 வயது வரையிலான வாக்காளர்களில் பெரும் பகுதியினர் விசிலை நோக்கி நகர்வது திராவிட கட்சிகளுக்குப் பெரும் சவாலாக உருவெடுத்துள்ளது.
திராவிடக் கட்சிகளான திமுக மற்றும் அதிமுக மீது மக்களுக்கு இருக்கும் இயல்பான அதிருப்தி ஓட்டுக்கள், இம்முறை எந்தவொரு குழப்பமுமின்றி விஜய்க்கு செல்லும் என கணிக்கப்படுகிறது. பல ஆண்டுகளாக ஆட்சியில் இருந்த கட்சிகளின் மீது நிலவும் சலிப்பு மற்றும் சிறிய அளவிலான ‘லெட்டர்பேடு’ கட்சிகளிடம் தங்களின் வாக்குகளை வீணாக்க விரும்பாத நடுத்தர மக்கள், விஜய்யை ஒரு மாற்று சக்தியாக பார்க்க தொடங்கிவிட்டனர். இதனால், நடுநிலை வாக்காளர்களின் முதல் தேர்வாக தமிழக வெற்றிக் கழகம் உருவெடுத்துள்ளது, தேர்தல் களத்தை மும்முனை போட்டியாக மாற்றியுள்ளது.
அதிமுக மற்றும் திமுகவின் ‘கோர்’ என்று அழைக்கப்படும் அடிமட்ட தொண்டர்களின் வாக்குகளில் விஜய் கைவைக்க தொடங்கியிருப்பது அக்கட்சிகளின் தலைமைக்கு பெரும் அதிர்ச்சியை ஏற்படுத்தியுள்ளது. எம்.ஜி.ஆரின் 1977-ம் ஆண்டு வெற்றியை விஜய் தனது உரைகளில் அடிக்கடி நினைவுபடுத்துவது, அதிமுகவின் பாரம்பரிய வாக்குகளைத் தன்பால் ஈர்க்கும் ஒரு தந்திரமாகவே பார்க்கப்படுகிறது. அதேபோல், திமுகவின் ‘திராவிட மாடல்’ கொள்கைகளில் திருப்தி அடையாத அதன் ஆதரவாளர்களும் விஜய்யின் ‘தமிழ் தேசிய-மதச்சார்பற்ற’ நிலைப்பாட்டிற்கு ஆதரவு தெரிவிக்கத் தொடங்கியுள்ளனர். இது திராவிட கட்சிகளின் பலமான அஸ்திவாரத்தையே அசைத்துப் பார்க்கும் ஒரு நகர்வாகும்.
சுருக்கமாக சொன்னால், 2026-ம் ஆண்டுத் தேர்தல் முடிவுகள் எவரும் எதிர்பார்க்காத வகையில் ஒரு மிகப்பெரிய ஆச்சரியத்தை தரும் என்பதில் ஐயமில்லை. கருத்துக்கணிப்பு வல்லுநர்கள் குறிப்பிடுவது போல, சிறுபான்மையினர், பெண்கள், இளைஞர்கள் மற்றும் அதிருப்தி வாக்காளர்கள் என அனைத்து தரப்பினரும் ஒரே நேர்க்கோட்டில் விஜய்யை ஆதரிக்கும் பட்சத்தில், தமிழகத்தின் 50 ஆண்டுகால அரசியல் வரலாறு மாற்றி எழுதப்படலாம். பணபலம் மற்றும் நிர்வாக பலத்தை தாண்டி, மக்களின் ‘மாற்றத்திற்கான தாகம்’ விஜய்யின் விசிலை ஜார்ஜ் கோட்டைக்கு அழைத்துச் செல்லுமா என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
