ஓ. பன்னீர்செல்வம் அணியின் மூத்த தலைவரும், டெல்டா பகுதியின் முக்கியமான முகமுமான வைத்திலிங்கம், சமீப காலமாக நடிகர் விஜய் தொடங்கியுள்ள ‘தமிழக வெற்றிக் கழகம்’ கட்சிக்கு செல்வதற்கான பேச்சுவார்த்தைகளில் ஈடுபட்டது உண்மைதான் என்ற தகவல் அரசியல் வட்டாரங்களில் பரபரப்பாக பேசப்படுகிறது.
அ.தி.மு.க. மற்றும் அதன் அணிகளுக்குள் நிலவும் அதிகார போட்டிகள் மற்றும் விஜய்யின் அரசியல் வருகை ஆகியவற்றால், தமிழக அரசியல் களத்தில் இத்தகைய அதிரடி நகர்வுகள் எதிர்பார்க்கப்பட்டாலும், வைத்திலிங்கத்தின் இந்த முயற்சி, ஓ.பி.எஸ். தரப்புக்கு பேரிடியாக அமைந்துவிடுமோ என்ற அச்சத்தை ஏற்படுத்தியுள்ளது.
தற்போதைய அரசியல் சூழலில், ஓ.பி.எஸ்ஸுக்கு இருக்கும் கொஞ்ச நஞ்ச செல்வாக்கும், கட்சிக்குள் அவர் தனது ‘தெம்பைத்’ தக்கவைத்திருப்பதும், டெல்டா பகுதிகளில் வைத்திலிங்கம் கொண்டுள்ள செல்வாக்கின் அடிப்படையில்தான் உள்ளது. இந்த முக்கியமான நிர்வாகியும் வேறு ஒரு இடம் தேடி நகர்ந்துவிட்டால், தனது அரசியல் எதிர்காலம் மொத்தமாக முடிவுக்கு வந்துவிடும் என்று ஓ.பி.எஸ்., தனக்கு நெருக்கமானவர்களிடம் மிகுந்த மனவருத்தத்துடன் புலம்பியிருக்கிறார் என்று கூறப்படுகிறது. ஏற்கெனவே, அ.தி.மு.க.வில் ஏற்பட்டுள்ள பிளவுகளால் ஆளும் தி.மு.க.வுக்கு சாதகமான சூழல் நிலவும்போது, வைத்திலிங்கத்தின் விலகல் ஓ.பி.எஸ்ஸை மேலும் பலவீனமாக்கும்.
வைத்திலிங்கத்தின் இந்த அணிமாற்ற முயற்சிகளுக்கு பின்னணியில் இருக்கும் முக்கிய தடையாக, அவர் மீதான அமலாக்கத்துறை வழக்கு உள்ளது. அவர் அமைச்சராக பதவி வகித்த காலத்தில், அடுக்குமாடி குடியிருப்புகள் கட்டுவதற்கு திட்ட அனுமதி வழங்குவதற்காக, ஒரு தனியார் நிறுவனத்திடம் இருந்து சுமார் ரூ.28 கோடி லஞ்சம் பெற்றதாக குற்றம் சாட்டப்பட்ட வழக்கை அமலாக்கத்துறை விசாரித்துவருகிறது. இந்த வழக்கில், ஏற்கனவே வைத்திலிங்கத்திற்கு சொந்தமான ரூ.100 கோடி மதிப்புள்ள சொத்துக்கள் அமலாக்கத்துறையால் முடக்கப்பட்டுள்ளன என்பதும் குறிப்பிடத்தக்கது.
சமீபத்தில் நடந்த பேச்சுவார்த்தைகளின்போது, ஓ.பி.எஸ்., டி.டி.வி. தினகரன் உள்ளிட்ட பல அரசியல் தலைவர்கள், இந்த வழக்கின் தீவிரத்தை காட்டி வைத்திலிங்கத்தை எச்சரித்திருக்கிறார்கள். “இப்போது நீங்கள் அணி மாறினால், அமலாக்கத்துறை வழக்கு சூடுபிடித்து, ஏதேனும் விபரீத விளைவுகள் ஏற்படலாம்” என்று அவர்கள் அறிவுறுத்தியுள்ளனர். ஆளும் கட்சிக்கு எதிராக செல்லும் எந்தவொரு நிர்வாகியும், மத்திய அரசின் விசாரணை அமைப்புகளின் பார்வைக்கு இலக்காக வாய்ப்புள்ள சூழலில், இந்த எச்சரிக்கை வைத்திலிங்கத்திற்கு ஒரு தற்காலிக தடையை ஏற்படுத்தியுள்ளது.
இந்த எச்சரிக்கைகள் மற்றும் வழக்கின் அழுத்தத்தின் காரணமாக, ‘தமிழக வெற்றிக் கழகம்’ கட்சிக்கு நகர்ந்துவிடலாம் என்ற தனது முடிவை தற்காலிகமாக தள்ளிப்போட்டிருக்கிறார் வைத்திலிங்கம் என்று கூறப்படுகிறது. அமலாக்கத்துறையின் விசாரணை ஒருபக்கம் இருக்க, அரசியல் ரீதியாக சரியான தருணத்தை தேர்ந்தெடுப்பதும் அவசியம் என்பதால், அவர் நிதானமாக முடிவெடுக்கிறார் என்று தெரிகிறது. எனினும், நிரந்தரமாக தனது முடிவை அவர் கைவிடவில்லை என்றே அரசியல் வட்டாரங்கள் நம்புகின்றன.
வைத்திலிங்கத்தின் இந்த தயக்கத்தைப் புரிந்துகொண்ட ‘தமிழக வெற்றிக் கழகம்’ தரப்பு, அவரை தங்கள் பக்கம் இழுக்கும் முயற்சியைத் தொடர்ந்து கொண்டிருக்கிறது. “அதெல்லாம் ஒண்ணும் ஆகாது… இங்க வாங்க, பார்த்துக்கலாம்…” என்று அவருக்கு ஆறுதல் கூறி, அமலாக்கத்துறை வழக்கால் எந்த பெரிய சிக்கலும் வராது என உத்தரவாதம் அளிப்பது போன்ற தொனியில், அவரைத்தங்கள் கட்சிக்கு இழுக்கத் தூண்டில் வீசுவதை த.வெ.க. தரப்பு நிறுத்தவில்லை என்றும் தகவல்கள் தெரிவிக்கின்றன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
