அ.தி.மு.க.வின் மூத்த தலைவரும், கொங்கு மண்டலத்தின் முக்கிய ஆளுமையுமான கே.ஏ. செங்கோட்டையன், தனது எம்.எல்.ஏ. பதவியை ராஜினாமா செய்து, தமிழக வெற்றிக் கழகத்தின் தலைவர் விஜய்யுடன் இணைந்திருப்பது தமிழக அரசியலில் பெரும் திருப்புமுனையாகப் பார்க்கப்படுகிறது. செங்கோட்டையன் இணைந்த சில மணி நேரங்களிலேயே, அவருக்கு புதிய மற்றும் அதிமுக்கியமான பொறுப்பை விஜய் அறிவித்துள்ளார். இது அ.தி.மு.க. மற்றும் தி.மு.க.வின் கோட்டையாக கருதப்படும் கொங்கு மண்டலத்தில் த.வெ.க.வின் பலத்தை நிறுவும் நோக்கம் கொண்டது.
த.வெ.க. தலைவர் விஜய், கே.ஏ. செங்கோட்டையனை ஈரோடு, கோயம்புத்தூர், நீலகிரி மற்றும் திருப்பூர் ஆகிய நான்கு மாவட்டங்களுக்கான அமைப்பு செயலாளராகவும், நிர்வாக குழுவின் தலைமை ஒருங்கிணைப்பாளராகவும் நியமித்துள்ளார். ஒரே நேரத்தில் நான்கு முக்கிய மாவட்டங்களுக்கு பொறுப்பாளராக நியமிக்கப்பட்டிருப்பது, கொங்கு மண்டலத்தில் கட்சியின் கட்டமைப்பை உருவாக்கும் முழு பொறுப்பையும் செங்கோட்டையனிடமே விஜய் ஒப்படைத்துள்ளதை காட்டுகிறது.
அ.தி.மு.க.வின் கோட்டையாகவும், தற்போது பா.ஜ.க. சவாலை எதிர்கொள்ளும் பகுதியாகவும் உள்ள கொங்கு மண்டலத்தில், செங்கோட்டையனின் செல்வாக்கு த.வெ.க.வுக்கு மிக பெரிய பலமாகும். அ.தி.மு.க.வில் அதிருப்தியில் உள்ள நிர்வாகிகளைத் த.வெ.க.வுக்குள் கொண்டுவரும் முதல் பணியை நிறைவேற்றும் தளத்தை இந்த அமைப்புச் செயலாளர் பதவி அவருக்கு வழங்குகிறது.
இந்த நியமனம் குறித்து பேசிய த.வெ.க. நிர்வாகிகள், “இது ஒரு டிரைலர் தான், இனிமேல் தான் மெயின் பிக்சரை பார்ப்பீங்க” என்று திராவிட கட்சிகளுக்கு சவால் விடும் தொனியில் கூறியுள்ளனர்.
நடிகராக இருந்து அரசியலுக்கு வரும்போதெல்லாம் எள்ளி நகையாடிய திராவிட கட்சிகள், தற்போது விஜய்யைப் பார்த்து உண்மையாகவே பயப்படுகிறதா என்ற கேள்வி தமிழக அரசியல் வட்டாரங்களில் எழுந்துள்ளது. செங்கோட்டையன் போன்ற அனுபவம் வாய்ந்த, மாவட்டங்களில் ஆழமான தொடர்புகளைக் கொண்ட ஒரு தலைவர் இணைவது, த.வெ.க.வின் வெற்றி வெறும் நட்சத்திர ஈர்ப்பை மட்டும் சார்ந்தது அல்ல, அது ஒரு நம்பகமான தேர்தல் அமைப்பாக வளரத் தொடங்கியுள்ளது என்பதை காட்டுகிறது.
அ.தி.மு.க.வில் நிலவும் உட்கட்சி பூசல் மற்றும் எடப்பாடி பழனிசாமியின் பிடிவாதத்தால் அதிருப்தியில் உள்ள நிர்வாகிகளை விஜய்யால் எளிதாக ஈர்க்க முடியும் என்பதை செங்கோட்டையனின் நகர்வு நிரூபித்துள்ளது. இந்த வெளியேற்றம் தொடர்ந்தால், அ.தி.மு.க.வின் வாக்கு வங்கி சிதறும்.
அ.தி.மு.க. பலவீனமடைந்தால், அதன் வாக்குகள் இயல்பாகவே தி.மு.க.வுக்கு செல்லும் என்று கருதப்பட்டது. ஆனால், இப்போது அந்த வாக்குகள் த.வெ.க.வுக்கு செல்ல வாய்ப்புள்ளதால், தி.மு.க.வுக்கும் சவால் வலுக்கிறது.
த.வெ.க.வின் இந்த திடீர் அரசியல் எழுச்சி, வரவிருக்கும் சட்டமன்ற தேர்தல் முடிவுகளில் ஆச்சரியங்கள் காத்திருக்கக்கூடும் என்பதற்கான அறிகுறிகளை காட்டுகிறது. கொங்கு மண்டலத்தின் முக்கிய தலைவரை இழந்தது, அ.தி.மு.க.வுக்கு பெரும் பின்னடைவாகும். இது, பல தொகுதிகளில் வெற்றி வாய்ப்பை பாதிக்கலாம்.
விஜய்யின் ரசிகர் பட்டாளம், செங்கோட்டையன் போன்ற தலைவர்கள் மூலம் அ.தி.மு.க.விலிருந்து வரும் பாரம்பரிய வாக்குகளுடன் இணைந்தால், அது தேர்தல் முடிவுகளை புரட்டி போட வாய்ப்புள்ளது. திராவிட கட்சிகளுக்கு மாற்றாக பார்க்கப்படும் த.வெ.க., குறிப்பாக இளைஞர்கள் மற்றும் முதல் தலைமுறை வாக்காளர்களை ஈர்த்து, தமிழக அரசியலின் சமன்பாட்டையே மாற்றியமைக்கலாம்.
தமிழக மக்கள் கடந்த ஐம்பது ஆண்டுகளுக்கும் மேலாக இரண்டு திராவிட கட்சிகளையே ஆட்சிக்கு தேர்ந்தெடுத்து வருகின்றனர். இந்த நிலையில், புரட்சிக்கு தயாராகிறார்களா தமிழக மக்கள்? என்ற கேள்வி எழுவது நியாயமானது.
மக்கள் தற்போது, திராவிடக் கட்சிகளின் ஆட்சியில் ஏற்பட்ட சலிப்பு, உட்கட்சி பூசல்கள் மற்றும் ஊழல் குற்றச்சாட்டுகள் ஆகியவற்றின் காரணமாக, புதிய, தூய்மையான தலைமைக்கு ஏங்கி நிற்கின்றனர். அந்த சூழலைப் பயன்படுத்தும் விதமாக, விஜய்யின் வருகை, ஒரு மாற்று அரசியலுக்கான நம்பிக்கையை விதைத்துள்ளது. செங்கோட்டையன் போன்ற பழுத்த அரசியல்வாதிகளை தனது கட்சிக்குள் கொண்டு வருவதன் மூலம், விஜய் வெறும் சினிமா புகழை மட்டும் நம்பி வரவில்லை, நடைமுறை அரசியலுக்கான வியூகத்துடனே களம் இறங்கியுள்ளார் என்பதை காட்டியுள்ளார். இது, தமிழக அரசியலில் ஒரு புதிய சகாப்தத்தின் தொடக்கமாக இருக்கலாம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
