நடிகர் விஜய்யின் ‘தமிழக வெற்றிக் கழகம்’ நடத்திய மதுரை மாநாடு, தமிழக அரசியலில் ஒரு புதிய அத்தியாயத்தை தொடங்கி வைத்துள்ளது. ரசிகர்கள் மட்டுமின்றி, இளைஞர்கள் மற்றும் பெண்கள் மத்தியில் பெரும் ஆதரவைப் பெற்றது இந்த மாநாடு. குறிப்பாக, மாநாட்டில் பேசிய விஜய்யின் பேச்சு, பல அரசியல் கட்சிகளுக்கு நேரடியாகவும், மறைமுகமாகவும் சவால்களை விடுத்துள்ளது.
மதுரை மாநாட்டின் மிகப்பெரிய பலம், ரசிகர்களின் கட்டுக்கோப்பான ஒழுங்குமுறைதான். இரண்டாவது முறையாக நடந்த இந்த மாநாட்டில், ரசிகர்களின் கூட்டம் அதிகமாக இருந்தபோதிலும், காவல்துறையின் ஒத்துழைப்பும், பாதுகாப்பும் சிறப்பாக இருந்தது.
மாநாட்டில் இளைஞர்களின் பங்களிப்பு அதிகமாக இருந்ததுடன், பெண்களின் வருகையும் குறிப்பிடத்தக்க அளவில் இருந்தது. இது விஜய்யின் அரசியல் நகர்வு, அனைத்து தரப்பு மக்களையும் ஈர்த்துள்ளது என்பதை காட்டுகிறது.
மாநாட்டின் இன்னொரு ஆச்சரியம், நாம் தமிழர் கட்சியில் இருந்து பலர் விஜய்யின் கட்சிக்கு மாறியுள்ளதுதான். இது சீமானின் வாக்கு வங்கியை வெகுவாக பாதிக்கும் என்று அரசியல் பார்வையாளர்கள் கூறுகின்றனர்.
விஜய் தனது பேச்சில் யாரையும் நேரடியாக தாக்காமல், மறைமுகமாக பல அரசியல் தலைவர்களை விமர்சித்தார். தி.மு.க.வை நேரடியாக தனது முதல் எதிரியாக அறிவித்துள்ளார். இதன் மூலம், தமிழக அரசியல் களம் தி.மு.க. vs தவெக என்ற இருமுனை போட்டியை நோக்கி நகர்கிறது என்பதை அவர் தெளிவுபடுத்தியுள்ளார்.
அரசியல் உலகில் ‘மார்க்கெட் இழந்தவர்கள்’ என்று சிலரை குறிப்பிட்டது, சீமானின் வாக்கு வங்கி குறையும் என்பதை உணர்த்துகிறது. அதே சமயம், காங்கிரஸை பற்றி எதுவும் பேசாதது, வருங்காலத்தில் காங்கிரஸுடன் கூட்டணி அமைய வாய்ப்புள்ளது என்பதற்கான அறிகுறியாக பார்க்கப்படுகிறது.
அ.தி.மு.க. மற்றும் பா.ஜ.க. குறித்து வெளிப்படையாக எதுவும் பேசாத விஜய், தனது ‘குட்டிக் கதை’ மூலம் எதிர்கால அரசியல் நகர்வுகளுக்கான முடிவை எடுத்துவிட்டார் என்பதையும் உணர்த்தியுள்ளார்.
தனது அரசியல் நுழைவு குறித்துப் பேசும்போது, விஜயகாந்தின் பிறந்த ஊரான மதுரையில் அவரை பற்றி பேசியது முக்கியத்துவம் வாய்ந்தது. இது விஜயகாந்தின் வாக்கு வங்கியை ஈர்க்கும் ஒரு முயற்சி அல்ல என்றும், நடிகர் என்ற முறையில் விஜயகாந்துக்கு மரியாதை செலுத்துவது என்றும் அவர் தரப்பில் கூறப்படுகிறது.
விஜய், எம்.ஜி.ஆரின் கொள்கைகளை கடைப்பிடிப்பதாக கூறியுள்ளார். முதியோர்கள், பெண்கள், மாணவர்கள் மற்றும் சிறுவர்களுக்கு அதிக முக்கியத்துவம் அளிப்பதாகவும், கல்விக்கு முன்னுரிமை அளிப்பதாகவும் அவர் தெரிவித்தார்.
அரசியல் விமர்சகர்களின் கணிப்புப்படி, 2026 தேர்தலில் விஜய்யின் ‘தமிழக வெற்றிக் கழகம்’ மிகப்பெரிய வெற்றியடையும் வாய்ப்புள்ளது. இளைஞர்கள் மற்றும் பெண்கள் மத்தியில் பெருகிவரும் ஆதரவு, அவரது வெற்றியை உறுதி செய்கிறது. மேலும், அவர் எந்தக் கட்சியுடனும் கூட்டணி வைக்காமல் தனியாக போட்டியிடவே அதிக வாய்ப்புள்ளதாகவும், முழு மெஜாரிட்டியுடன் அவர் ஆட்சிக்கு வரலாம் என்றும் கூறப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
